ຢ່າຫວັງ!! ຟຣານ ບອກບໍ່ປ່ອຍນັກເຕະໃຫ້ ເປັບ

 

ຟຣານ ເບັກເຄັນບາວເອີ ປະທານກິຕິມະສັກຂອງ ບາເຢິນ ມິວນິກ ຢືນຢັນ ເປັບ ກວາດິໂອລາ ນາຍໃຫຍ່ຂອງທີມໝົດສິດດຶງໂຕນັກເຕະ ເສືອໃຕ້ ໄປຮ່ວມງານທີ່ ແມນເຊສເຕີ ຊີຕີ ເນື່ອງຈາກສະໂມສອນຈະບໍ່ຍອມຢ່າງເດັດຂາດ ຫຼັງມີຂ່າວວ່ານາຍໃຫຍ່ຈ້ອງດຶງ 3 ແຄ່ງໄປຮ່ວມທັບນຳ.

 

ຟຣານ ເບັກເຄັນບາວເອີ ປະທານກິຕິມະສັກ “ເສືອໃຕ້” ບາເຢິນ ມິວນິກ ສະໂມສອນຍັກໃຫຍ່ ບຸນເດສລີກາ ອອກມາກ່າວເມື່ອວັນພຸດທີ 16 ນີ້ວ່າ ເປັບ ກວາດິໂອລາ ນາຍໃຫຍ່ຂອງທີມບໍ່ໄດ້ຮັບອະນຸຍາດໃຫ້ດຶງນັກເຕະຄົນໃດຂອງຕົ້ນສັງກັດໄປຮ່ວມທັບ “ເຮືອໃບສີຟ້າ” ແມນເຊສເຕີ ຊີຕີ ສະໂມສອນມະຫາເສດຖີຈາກ ພຣີເມຍລີກ ໃນຊ່ວງຊໍາເມີນີ້.

ກວາດິໂອລາ ຈະຍ້າຍໄປຄຸມທັບ ແມນຊີຕີ ເມື່ອຈົບລະດູການນີ້ ແລະ ມີການຄາດໝາຍວ່າເຂົາຈະເສີມທັບຄັ້ງໃຫຍ່ໃນຊ່ວງຊຳເມີ ໂດຍນາຍໃຫຍ່ສະເປນຕົກເປັນຂ່າວວ່າກຽມດຶງນັກເຕະ ບາເຢິນ ຫຼາຍຄົນທັງ ດາວິດ ອະລາບາ, ຕິເອໂກ ອະກັນຕາລາ ແລະ ມານູເອວ ນອຍເອີ ແຕ່ລ່າສຸດ ເບັກເຄັນບາວເອີ ຢືນຢັນວ່າ “ເສືອໃຕ້” ຈະບໍ່ຍອມປ່ອຍນັກເຕະອອກໄປຢ່າງແນ່ນອນ.

 

“ມັນຈະບໍ່ມີທາງເກີດຂຶ້ນ ຖ້າມັນເປັນກໍລະນີນີ້ ມັນບໍ່ຖືກຕ້ອງ ແຕ່ຂ້ອຍບໍ່ຄິດວ່າ ກວາດິໂອລາ ຈະເຮັດແບບນັ້ນ ໃນຄວາມເຫັນຂ້ອຍມັນເປັນເລື່ອງຍາກສຳລັບທຸກຝ່າຍທີ່ກ່ຽວຂ້ອງທັງ ບາເຢິນ ແລະ ເປັບ ມັນມີຂ່າວລືໃໝ່ໆເກີດຂຶ້ນຢູ່ຕະຫຼອດ” ເບັກເຄັນບາວເອີ ກ່າວ.