ຢຸດນໍາໃຊ້ຂົວນ້ຳຄານເກົ່າ ຢູ່ຫຼວງພະບາງຊົ່ວຄາວເພື່ອບູລະນະຄືນໃໝ່

         ອໍານາດການປົກຄອງເມືອງຫລວງພະບາງສັ່ງຢຸດນໍາໃຊ້ຂົວນ້ຳຄານເກົ່າຊົ່ວຄາວເພື່ອປັບປຸງ ແລະ ສ້ອມແປງຄືນໃໝ່ ເຊິ່ງຂົວດັ່ງກ່າວເປັນຂົວຂົວເຫຼັກ ໂດຍເຊື່ອມຕໍ່ລະຫວ່າງບ້ານໝື່ນນາ ຫາ ບ້ານເມືອງງາ ເມືອງຫຼວງພະບາງ ແລະ ໄດ້ສ້າງຂຶ້ນປະມານ 50 ປີຜ່ານມາແລ້ວ ປັດຈຸບັນແມ່ນມີສະພາບຊຸດໂຊມຫຼາຍ ການສັນຈອນ ແມ່ນອານຸຍາດໃຫ້ພຽງການສັນຈອນດ້ວຍລົດຈັກ, ລົດຖີບ ແລະ ຄົນຍ່າງ, ເຊີ່ງຜ່ານມາ ພາກສ່ວນກ່ຽວຂ້ອງ ໄດ້ມີການປັບປຸງສ້ອມແປງມາແລ້ວຫຼາຍຄັ້ງ ແຕ່ເປັນພຽງການສ້ອມແປງເລັກນ້ອຍ.

        ທ່ານ ບຸນເພັງ ຈິດຕະພອນ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງຫຼວງພະບາງ ໄດ້ໃຫ້ສຳພາດວ່າ ຂົວແຫ່ງນີ້ ແມ່ນມີສະພາບຊຸດໂຊມຫຼາຍໃນປັດຈຸບັນ ເປັນຕົ້ນແມ່ນໄມ້ລານແລ່ນ ແລະ ໄມ້ລະນາດຂອງຂົວນັ້ນ ແມ່ນແຕກຫັກ ແລະ ເປື່ອຍຫຼາຍຈຸດ, ບວກກັບຄວາມຮູ້ເທົ່າບໍ່ເຖີງການຂອງບາງກຸ່ມຄົນ ໄປຖອດເອົາຊີ້ນສ່ວນຂອງໂຄງຂົວອອກ ເຊີ່ງເຮັດໃຫ້ມີຄວາມສ່ຽງຕໍ່ການເຂດອຸບັດເຫດ ອາດຈະສ້າງຄວາມສູນເສຍໃຫ້ແກ່ປະຊາຊົນ ທີ່ສັນຈອນໄປມາ, ແຕ່ໃນປັດຈຸບັນນີ ແມ່ນໄດ້ປິດການສັນຈອນສຳລັບທາງຍ່າງທັງສອງຂ້າງ ເພື່ອຮັບປະກັນຄວາມປອດໄພ.
         ສຳລັບການສ້ອມແປງໃນໄລຍະເບື້ອງຕົ້ນ ຄາດວ່າຈະໃຊ້ງົບປະມານເຂົ້າໃນການປັບປຸງ ເພື່ອໃຫ້ສັນຈອນຊົ່ວຄາວປະມານ 400 ລ້ານກີບ, ໃນນັ້ນ ຈະມີການປ່ຽນຖ່າຍໄມ້ລານແລ່ນ ແລະ ໄມ້ລະນາດບາງອັນ ລວມທັງເຫຼັກບາງຈຸດ, ແຕ່ຖ້າຫາກຈະມີການສ້ອມເປງໃຫ່ຍ ຫຼື ສ້າງໃໝ່ ອາດຈະໃຊ້ທືນຫຼາຍກ່າວນີ້ ດັ່ງທ່ານ ບຸນເພັງ ຈິດຕະພອນ ກ່າວຕື່ມວ່າ: 
ຫົວໜ້າຫ້ອງການໂຍທາ ທິການ ແລະ ຂົນສົ່ງ ໄດ້ຮຽກຮ້ອງມາຍັງປະຊາຊົນທີ່ໄດ້ຊົມໃຊ້ ແລະ ສັນຈອນໄປມາຂົວດັ່ງກ່າວ ຈົ່ງມີສະຕິລະວັງຕົວໃນການສັນຈອນ ເພື່ອຫຼີກລ້ຽງການເກີດອຸບັດເຫດທີ່ອາດຈະເກີດຂື້ນ.

ຂ່າວ-ພາບ: ອາພຸດເດດ ບຸບຜາ.

ແຫຼ່ງຂ່າວ: ສໍານັກຂ່າວສານປະເທດລາວ.