ຢືນຢັນແລ້ວ!! ວາດີ ບໍ່ຍ້າຍໄປໃສແນ່ນອນ

 

ເຈມີ ວາດີ ຫົວຫອກ ເລສເຕີ ຊີຕີ ລະບຸຊັດເຈນແລ້ວວ່າຊ່ວງຊຳເມີນີ້ຈະບໍ່ຍ້າຍໄປໃສແນ່ນອນ ພ້ອມກັບບອກຕົ້ນສັງກັດວ່າພະຍາຍາມເກັບບັນດານັກເຕະຫຼັກໄວ້ກັບທີມຕໍ່ໄປ.

 

ເຈມີ ວາດີ ຫົວຫອກຂອງ ເລສເຕີ ຊີຕີ ສະໂມສອນແຊມລີກຜູ້ດີຢືນຢັນວ່າ ກຳລັງມີຄວາມສຸກກັບການໂມ້ແຄ່ງໃນຖິ່ນ ຄິງ ພາວເວີ ສະເຕດຽມ ແລະ ຊ່ວງຊຳເມີນີ້ຈະບໍ່ຍ້າຍໄປໃສແນ່ນອນ.

 

ດ້ວຍຜົນງານອັນດີຂອງ “ຈິງຈອກເງິນ” ໃນລະດູການນີ້ເຮັດໃຫ້ນັກເຕະແກນຫຼັກຄື ວາດີ, ມາເຣດ ແລະ ກອງເຕ ອາດຈະຍ້າຍໄປຢູ່ກັບສະໂມສອນອື່ນທີ່ໃຫຍ່ກວ່າ ແຕ່ວ່າຫຼ້າສຸດຫົວຫອກທີມຊາດອັງກິດຢືນຢັນແລ້ວວ່າພ້ອມທີ່ຈະຢູ່ຊ່ວຍຕົ້ນສັງກັດຕໍ່ໄປ ໂດຍສະເພາະຢ່າງຍິ່ງກັບການທີ່ ເລສເຕີ ຈະຕ້ອງໄປໂຊເທບໃນ ຢູຟາ ແຊມປຽນລີກ ລະດູການໜ້າ.

 

“ຂ້ອຍຫາກໍໄດ້ແຊມລີກ ແລະ ກຳລັງຈະໄດ້ຫຼິ້ນໃນຖ້ວຍ ແຊມປຽນລີກ ລະດູການໜ້າ ຂ້ອຍແຮັບປີກັບທີ່ນີ້ ນັກເຕະຫຼາຍຄົນໃນທີມຈະມີຂ່າວຕະຫຼອດໝົດຊ່ວງຊຳເມີແນ່ນອນ ເຮົາຫາກໍໄດ້ແຊມລີກ ແລະ ກຳລັງຈະໄປຫຼິ້ນ ແຊມປຽນລີກ ລະດູການໜ້າ ຂ້ອຍກໍຫວັງຢ່າງຍິ່ງວ່າ ເຮົາຈະສາມາດເກັບນັກເຕະທຸກຄົນໄວ້ກັບທີມໄດ້”.

 

“ຕອນນີ້ເຮົາຍັງບໍ່ໄດ້ລົມຫຍັງກັນ (ເລື່ອງການຍ້າຍທີມ) ເຮົາຕັ້ງສະມາຖິໄປກັບເກມທີ່ຍັງເຫຼືອ ສິ່ງທຳອິດທີ່ເຮົາຈຳເປັນຕ້ອງເຮັດຄືຮັກສາຄວາມກະຫາຍຢາກໄດ້ໄຊຊະນະ ເຮົາຈະກັບໄປລົງຊ້ອມອີກຄັ້ງໃນອາທິດນີ້ ແລະ ກໍຫວັງວ່າ ເຮົາຈະປ່ອຍຟອມເທບອອກມາໄດ້ໃນເກມວັນອາທິດນີ້ ແລະ ເກັບໄຊຊະນະຍ່າງກັບອອກມາ”.