ຢານນາຊາຍເນື້ອຫອມ!! 4 ຍັກລີກຝຣັ່ງສົນດຶງຮ່ວມທັບ

 

ສໍ່ແວວເປັນສ່ວນເກີນກັບ ແມນ ຢູໄນເຕັດ ຈົນອາດຈະຕ້ອງຍ້າຍທີມໜີຫຼັງຈົບລະດູການນີ້ແຕ່ວ່າ ອັດນານ ຢານນາຊາຍ ປີກແບນຊິກອາດຈະເບົາໃຈໄດ້ໜ້ອຍໜຶ່ງຫຼັງຈາກທີ່ ເປເອັດເຊ, ໂມນາໂກ, ລີຢົງ ແລະ ມາກຊາຍ ສົນດຶງເຂົາໄປຮ່ວມທັບ ແລະ ຍັງຕິດຕໍ່ກັບເອເຢນຂອງນັກເຕະແລ້ວອີກດ້ວຍ.

 

ອັດນານ ຢານນາຊາຍ ປີກສັນຍາເຊົ່າຂອງ ຊັນເດີແລນ ສະໂມສອນດັງໃນ ພຣີເມຍລີກ ເນື້ອຫອມສົມຄວນເມື່ອມີ 4 ຍັກໃຫຍ່ໃນວົງການບານເຕະເມືອງນຳ້ຫອມສົນໃຈຢາກໄດ້ເຂົາໄປຮ່ວມທັບໃນຊ່ວງຊຳເມີນີ້ ຫຼັງຈາກທີ່ອະນາຄົດກັບ ແມນເຊສເຕີ ຢູໄນເຕັດ ຕົກຢູ່ໃນຄວາມບໍ່ແນ່ນອນແລ້ວ.

 

ປີກອາຍຸ 22 ປີຖືກ “ຜີສາດແດງ” ປ່ອຍໄປຢູ່ກັບ “ແມວດຳ” ແບບຢືມຕົວ 1 ຊີຊັນແຕ່ກໍຍັງຍິງບໍ່ໄດ້ຈັກລູກໃນລະດູການນີ້ແຖມ ຊັນເດີແລນ ຍັງມີຜົນງານທີ່ຕົກຕ່ຳຢູ່ອັນດັບສຸດທ້າຍຂອງຕາຕາລາງຄະແນນຈໍ່ທີ່ຈະຕົກຊັ້ນສູ່ ເດິ ແຊມປຽນຊິບ ລະດູການໜ້າເຕັມຕົວ ສ່ວນກັບ ແມນ ຢູໄນເຕັດ ກໍຍັງບໍ່ເປັນທີ່ແນ່ນອນເຖິງວ່າ ໂຊເຊ ມູຣິນໂຢ ຜູ້ຈັດການທີມຈະເຜີຍເອງວ່າຕັດສິນເລື່ອງອະນາຄົດໃນຖິ່ນ ໂອນ ທຣາຟເຟິດ ແລ້ວກໍຕາມເຊິ່ງເຊື່ອວ່າ ຢານນາຊາຍ ມີໂອກາດຍ້າຍອອກໄປໃນຊ່ວງຊຳເມີນີ້ສູງ.

 

ສື່ດັງໃນແບນຊິກເຜີຍວ່າຕອນນີ້ມີ ປາຣີ ແຊັງ-ແຊັກແມງ, ໂມນາໂກ, ໂອລິມປິກ ລີຢົງ ແລະ ໂອລິມປິກ ມາກຊາຍ ກຳລັງຈັບຕາເບິ່ງສະຖານະການຂອງ ຢານນາຊາຍ ຢ່າງໃກ້ຊິດແຖມ 4 ສະໂມສອນແດນນຳ້ຫອມຍັງຕິດຕໍ່ກັບເອເຢນຂອງນັກເຕະແລ້ວພ້ອມຫວັງວ່າຈະໄດ້ຮັບອະນຸຍາດຈາກ ແມນ ຢູໄນເຕັດ ໃນການດຶງຕົວນັກເຕະໄປເສີມທັບຫຼັງຈົບລະດູການນີ້ດ້ວຍ.

 

ບົດຄວາມໃຫມ່ໆ