ຢາກໃຫ້ສື່ສິ່ງພິມ ເຂົ້າເຖິງໄວໜຸ່ມ ຕ້ອງຫັນເປັນ ລະບົບອອນລາຍ

​ທ່ານ ຢັງ ສະຕິ​ນ ຜູ້​ຊຽວຊານ​ດ້ານ​ສື່​ມວນ​ຊົນ ຈາກ​ປະ​ເທດ​ນອກ​ແວ ​ໄດ້​ນຳ​ເອົາ​ບົດຮຽນ ​ແລະ ປະສົບ​ການ​ຂອງ​ຕົນ​ ມາ​ແລກປ່ຽນ​ກັບ​ສື່​ມວນ​ຊົນ ​ໃນ​ວັນ​ທີ 6 ຕຸລາ 2015 ນີ້​ ວ່າ: ໃນ​ປັດຈຸ​ບັນ ລະບົບ​ອິນ​ເຕີ​ເນັດ ​ແມ່ນ​ມີ​ອິດ​ທິພົນ​ຫລາຍ ​ໃນ​ການ​ດຳລົງ​ຊີວິດ​ ປະຈຳ​ວັນ​ຂອງ​ຄົນ​ເຮົາ ​ໂດຍ​ສະ​ເພາະ ​ແມ່ນ​ໄວ​ໜຸ່ມ ​ເຊິ່ງ​ໄດ້​ສົ່ງ​ຜົນ​ໃຫ້ການ​ບໍລິ​ໂພ​ກຂໍ້​ມູນ​ຂ່າວສານ​ຜ່ານ​ທາງ​ ສື່​ສິ່ງ​ພິມ​ຕ່າງໆ​ຫລຸດ​ລົງ, ສະນັ້ນ ​ເພື່ອ​ເຮັດ​ໃຫ້​ກຸ່ມ​ໄວ​ໜຸ່ມ ຫັນ​ມາ​ສົນ​ໃຈ​ບໍລິ​ໂພ​ກຂໍ້​ມູນ​ຂ່າວສານ ພວກ​ເຮົາ​ຕ້ອງ​ນຳ​ເອົາ​ຂໍ້​ມູນ​ຂ່າວສານ ​ຂອງ​ສື່​ສິ່ງ​ພິມ​​ເຜີຍ​ແຜ່​ຜ່ານ​ລະບົບ ​ອອນ​ລາຍ​ໃຫ້​ຫລາຍ​ຂຶ້ນ ຄຽງ​ຄູ່​ກັບ​ການ​ສ້າງ​ເນື້ອ​ໃນ ​ຂ່າວ​ໃຫ້​ໜ້າ​ສົນ​ໃຈ, ​ເໝາະ​ສົມ​ກັບ​​​​ໄວອາຍຸ ​ແລະ ​ເນັ້ນ​ໃສ່​ສິ່ງ​ທີ່​ໄວ​ໜຸ່ມ ​ໃຫ້​ຄວາມ​ສົນ​ໃຈ​ເປັນ​ພິ​ເສດ.



ອີງ​ຕາມ​ປະສົບ​ການ​ຂອງທ່ານ ຢັງ​ ສະຕິ​ນ ​ໃຫ້​ຮູ້​ຕື່ມ​ວ່າ: ຖ້າ​ຢາກ​ໃຫ້​ຂໍ້ມູນ​ຂ່າວສານ ສາມາດ​​ເຂົ້າ​ເຖິງ​ ໄວ​ໜຸ່ມ​ຢ່າງ​ກວ້າງຂວາງ ສະ​ຖາ​ບັນ​ກາ​ສຶກສາ ​ກໍ​ຕ້ອງ​ໄດ້​ປູກ​ຈິດ​ສຳນຶກ​ໃຫ້​ເຂົາ​ເຈົ້າມັກ​ການ​ອ່ານ, ​ບໍລິ​ໂພ​ກຂ່າວ​ໂດຍ​ການ​ສ້າງ​ຫລັກສູດ​ ການ​ຮຽນ-ການ​ສອນ ທີ່​ກ່ຽວຂ້ອງ​ກັບ​ວຽກ​ງານ ​ຂໍ້​ມູນ​ຂ່າວສານ ​ເພື່ອ​ແນ​ໃສ່​ໃຫ້​ນັກຮຽນ ກໍ​ຄື​ໄວ​ໜຸ່ມຫັນ​ມາຄົ້ນຄວ້າ ​ແລະ ຊອກ​ຫາ​ຂໍ້​ມູນ​ຕ່າງໆ​ ຈາກ​ໜັງສື​ພິມ​ໃຫ້​ຫລາຍ​ຂຶ້ນ. ການ​ນຳ​ສະ​ເໜີ​ຂໍ້​ມູນ​ຂ່າວ​ສານ​ຕ່າງໆ ​ຜ່ານ​ລະບົບ​ອອນ​ລາຍ ຍັງ​ເຮັດ​ໃຫ້​ຜູ້​ບໍລິ​ໂພ​ກ​ເຂົ້າ​ເຖິງ ​ຂໍ້​ມູນ​ຂ່າວສານ​ໄດ້​ໄວ ​ແລະ ສະດວກ​ສະບາຍ​ ທັງ​ສາມາດ​ດຶງ​ດູດ​ຄວາມ​ສົນ​ໃຈ​ຂອງສັງຄົມ ກໍ​ຄື​ໄວ​ໜຸ່ມ​ໃຫ້​ຫັນ​ມາ​ບໍລິ​ໂພ​ກ ຂ່າວສານ​ຫລາຍ​ຂຶ້ນ ​ແລະ ເປັນ​ການ​ປະຢັດ​ຕົ້ນທຶນ ​ການ​ພິມ​ໜັງສືພິມ​ຕື່ມ​ອີກ

ທີ່ມາ http://kpl.gov.la/