ມ້າລາຍເຈັບຕັບ ດິບາລາ ຍັງເຈັບອາດຕ້ອງອົດລົງຟາດກັບ ມິລານ

 

“ຟຸດບອນອີຕາເລຍ” ເວັບໄຊ້ຂ່າວສານວົງການລູກໜັງຂອງອີຕາລີຕີຂ່າວ ເປົາໂລ ດິບາລາ ຫົວຫອກ ມ້າລາຍ ອາດຈະອົດຊ່ວຍທີມໃນເກມຢາມ ມິລານ ວັນເສົານີ້ຫຼັງຕ້ອງໄປຊ້ອມແບບດ່ຽວໆເພາະຍັງບໍ່ເຊົາຈາກອາການດ້ຽງບ່ອນຕົ້ນຂາ ໂດຍຂ່າວນີ້ເຮັດໃຫ້ “ບຽງໂຄເນຣີ” ເຈັບຕັບ ເພາະກອງຄົນໂຫດຄື ຈໍໂຈ ຄິເອວລິນີ ກໍຕ້ອງນັ່ງຕັ່ງ 3 ອາທິດເພາະເຈັບຕົ້ນຂາ.

 

ຢູເວັນຕຸດ ຈ່າຝູງຂອງ ກັນໂຊ ຊີຣີ ອາ ອາດຈະໝົດສິດໃຊ້ງານ ເປົາໂລ ດິບາລາ ກອງໜ້າຄົນສຳຄັນໃນເກມລີກນັດບຸກໄປຢາມ ເອຊີ ມິລານ ທີ່ສະໜາມ ຊານ ຊີໂຣ ໃນວັນເສົາທີ 9 ນີ້ຫຼັງຈາກເຂົາຍັງບໍ່ເຊົາຂາດຈາກອາການບາດເຈັບກ້າມຊີ້ນຈົນຖືກຈັບແຍກໄປຊ້ອມດ່ຽວ ຕາມການລາຍງານຂອງ ຟຸດບອນອີຕາເລຍ ເວັບໄຊ້ທີ່ນຳສະເໜີຂ່າວວົງການລູກໜັງແດນກະໂລນີ.

ດິບາລາ ເຊິ່ງລະດູການນີ້ຍິງປະຕູໃຫ້ທີມໃນລີກໄປ 14 ນັດຈາກການລົງຫຼິ້ນ 29 ນັດນັ້ນ ມີອາການບາດເຈັບບໍລິເວນດັ່ງກ່າວຕັ້ງແຕ່ກັບມາຈາກການຫຼິ້ນໃຫ້ທີມຊາດອັດຊັງຕິນແລ້ວ ເຊິ່ງແຕ່ນັ້ນເປັນຕົ້ນມາເຂົາກໍບໍ່ໄດ້ຊ້ອມກັບເພື່ອນຮ່ວມທີມເລີຍຈັກເທື່ອ.

 

ຖ້າວ່າດາວຍິງເລືອດຟ້າຂາວລົງບໍ່ໄດ້ແທ້ ມັນກໍຖືກເປັນຂ່າວຮ້າຍຢ່າງໜັກສຳລັບ “ມ້າລາຍ” ເພາະ ຈໍໂຈ ຄິເອວລິນີ ກອງຫຼັງກໍມີອາການບາດເຈັບຕົ້ນຂາຈົນຕ້ອງນັ່ງຍາວ 3 ອາທິດໄປກ່ອນແລ້ວ ຍັງມີ ຊາມີ ເຄດີຣາ ກອງກາງໂຕຕັດເກມຂອງທີມກໍຈະໝົດສິດລົງຫຼິ້ນເກມກັບ ມິລານ ເພາະຕິດໂທດແບນເຊັ່ນກັນ.