ມູຣີໂຢເນື້ອຫອມ!!ຍັກໃຫຍ່ໃນເອີຣົບສົນດຶງຮ່ວມທັບ

 

ເຮຊອນ ມູຣີໂຢ ກອງຫຼັງທີມຊາດໂຄລຳເບຍຂອງ ອິນເຕີ ມິລານ ກຳລັງເນື້ອຫອມເມື່ອສື່ປ່ອຍຂ່າວວ່າເຂົາເປັນທີ່ໝາຍປອງຂອງ ບາເຢິນ ມິວນິກ, ເຊນິດ ເຊນ ປີເຕີສະເບີກ ແລະ ອາເຊນອນ ທີ່ພ້ອມເດີນໜ້າດຶງນັກເຕະຊ່ວຍເກມຮັບໃຫ້ໄດ້.

 

ອາເຊນອນ, ບາເຢິນ ແລະ ເຊນິດ 3 ທີມດັງຈາກສະໂມສອນໃນເອີຣົບຕົກເປັນຂ່າວວ່າກຽມເດີນໜ້າດຶງໂຕ ເຮຊອນ ມູຣີໂຢ ກອງຫຼັງຂອງ ອິນເຕີ ມິລານ ສະໂມສອນດັງຂອງ ກັນໂຊ ຊີຣີອາ ໃນຊ່ວງຊຳເມີນີ້.

 

ກອງຫຼັງທີມຊາດໂຄລຳເບຍທີ່ອາດຈະມີຄ່າໂຕ 20 ລ້ານເອີໂຣຍ້າຍຈາກ ກຣານາດາ ມາຢູ່ໃນຖິ່ນ ຈູເຊັບເປ ເມອັດຊາ ກັບຄ່າຫົວ 10 ລ້ານເອີໂຣບວໂບນັດເມື່ອປີ 2015 ແລະ ຍິງໄປ 2​ ລູກ, 1 ແອສຊິດຈາກ 34 ນັດລວມທຸກລາຍການໃນ ຊີຣີ ອາ ເມື່ອລະດູການທີ່ຜ່ານມາແຕ່ອາດຈະຕ້ອງປັບປຸງວິໄນໃນການຫຼິ້ນຈາກການຖືກໃບແດງ 3 ເທື່ອໃນເກມລີກ ແລະ ອີກໜຶ່ງເທື່ອໃນເກມ ໂຄປາ ອີຕາເລຍ.

 

“ສະກາຍ ສະປອດ ອີຕາເລຍ” ສື່ດັງຂອງອີຕາລີຕີຂ່າວວ່າ ມູຣີໂຢ ໄດ້ຮັບຄວາມສົນໃຈຈາກຫຼາຍທີມໃນເອີຣົບໃນຊ່ວງຊຳເມີນີ້ໂດຍມີ ອາເຊນອນ ທີ່ຕົກເປັນຂ່າວກັບນັກເຕະມາດົນລວມເຖິງ ບາເຢິນ ມິວນິກ ກັບ ເຊນິດ ທີ່ຄາດວ່າກຳລັງຈັບຕາເບິ່ງສະຖານະການຂອງນັກເຕະຢູ່.

 

ທັງນີ້ ມູຣີໂຢ ເຄີຍອອກມາເຜີຍກ່ອນໜ້ານີ້ວ່າ “ຂ້ອຍຈະຢູ່ກັບ ອິນເຕີ ຕໍ່ໄປໃນລະດູການໜ້າ ຫຼື ບໍ່? ຂ້ອຍບໍ່ຮູ້ ແລະ ຕອນນີ້ຂ້ອຍມີສະມາທິກັບແຕ່ທີມຊາດ ແລະ ເສິກ ໂກປາ ອາເມຣິກາ ເທົ່ານັ້ນ”.