ມູຣິນໂຢ ພ້ອມທີ່ຈະປ່ອຍ ອາຊາ ກັບ ອີກ 3 ດາວເຕະເພື່ອປ່ຽນອາໄຫຼ່ເກມບຸກໃໝ່

ເດລີ ສະຕາ ສື່ກິລາຂອງເກາະອັງກິດຕີຂ່າວວ່າ ໂຊເຊ ມູຣິນໂຢ ນາຍໃຫຍ່ ເຊວຊີ ພ້ອມທີ່ຈະປ່ອຍ ເອເດັນ ອາຊາ ປີກຂວາຂອງທີມໃນຕະຫຼາດ ຊື້-ຂາຍ ນັກເຕະເດືອນມັງກອນນີ້ແລ້ວ ຫຼັງຈາກທີ່ຟອມການຫຼິ້ນຂອງເຂົາຕົກຕ່ຳ ພ້ອມທັງນາຍໃຫຍ່ຄົນນີ້ຍັງຢາກໄດ້ເງິນໄປເພື່ອເຮັດການເສີມທີມອີກ ນອກຈາກນີ້ ດິເອໂກ້ ຄອສຕ້າ, ອອສກ້າ ແລະ ເນມານຢາ ມາຕິດ ກໍຢູ່່ໃນກຸ່ມທີ່ຈະຖືກປ່ອຍອອກຈາກຖິ່ນ ສະແຕນຝອດ ບຣິດ ເຊັ່ນກັນ.

ໂຊເຊ ມູຣິນໂຢ ຜູ້ຈັດການທີມ “ສິງໂຕນ້ຳເງິນ” ເຊວຊີ ສະໂມສອນຍັກໃຫຍ່ຈາກແດນຜູ້ດີ ພຣີເມຍລີກ ອັງກິດ ພ້ອມທີ່ຈະຂາຍ ເອເດັນ ອາຊາ ປີກດາວດັງຂອງທີມໃນຕະຫຼາດ ຊື້-ຂາຍ ນັກເຕະຮອບສອງເດືອນມັງກອນນີ້ ເພື່ອເຮັດການຍົກເຄື່ອງຂຸມກຳລັງຂອງທີມຄືນໃໝ່ ຕາມການລາຍງານຂອງ ເດລີ ສະຕາ ສື່ຂອງເມືອງຜູ້ດີ.

ລະດູການນີ້ ທີມຂອງ ມູຣິນໂຢ ເຮັດຜົນງານໃນລີກໄດ້ຢ່າງຕົກຕ່ຳ ເກັບໄດ້ພຽງ 14 ຄະແນນ ຈາກການລົງຫຼິ້ນ 13 ນັດ ຢູ່ອັນດັບທີ 15 ຂອງຕາຕາລາງຄະແນນ ເຊິ່ງຖືວ່າເປັນຜົນງານທີ່ສວນທາງກັບລະດູການກ່ອນທີ່ທັບຂອງ ມູຣິນໂຢ ໄດ້ແຊມປ້ຽນລີກ.

ໜຶ່ງໃນສາເຫດທີ່ ເຊວຊີ ມີຜົນງານແບບນີ້ນັ້ນ ເປັນເພາະວ່າ ອາຊາ ຟອມຕົກແບບເປັນຕາຢ້ານ ທັງທີ່ລະດູການກ່ອນຫຼິ້ນໄດ້ດີຈົນໄດ້ລາງວັນນັກເຕະດີເດັ່ນປະຈຳລະດູການ 2014-2015 ຂອງ ພຣີເມຍລີກ ອັງກິດ ລວມເຖິງໄດ້ລາງວັນນັກເຕະດີເດັ່ນຂອງສະມາຄົມນັກເຕະບານອາຊີບ (ພີເອຟເອ) ແລະ ສະມາຄົມສື່ຂ່າວ (ເອຟດັບເບິ້ນຢູເອ) ດ້ວຍ.

ຈາກເລື່ອງດັ່ງກ່າວເຮັດໃຫ້ ມູຣິນໂຢ ພ້ອມທີ່ຈະປ່ອຍ ອາຊາ ອອກຈາກທີມ ເພື່ອຫາເງິນໄປຊື້ນັກເຕະຊັ້ນດີມາຮ່ວມທັບໃນເດືອນມັງກອນນີ້ ເຖິງວ່າໃຈແທ້ແລ້ວບໍ່ຢາກປ່ອຍ ອາຊາ ອອກທີມປານໃດກໍຕາມ ເຊິ່ງ ປາຣີ ແຊັງ-ແຊັກແມັງ ເປັນທີມທີ່ຢາກໄດ້ໂຕ ອາຊາ ຫຼາຍທີ່ສຸດ.

ນອກຈາກ ອາຊາ ແລ້ວ ເດລີ ສະຕາ ລະບຸວ່າອີກວ່າ ມູຣິນໂຢ ພ້ອມທີ່ຈະປ່ອຍ ດິເອໂກ້ ຄອສຕ້າ, ອອສກ້າ ແລະ ເນມານຢາ ມາຕິດ ເຊັ່ນກັນ ສ່ວນເປົ້າໝາຍທີ່ນາຍໃຫຍ່ຊາດ ປັອກຕຸຍການຕັ້ງໄວ້ຄື ເອດິສັນ ກາວານີ ຫົວຫອກຂອງ “ເປເອັດເຊ”, ອອງຕວນ ກຣິສມັນ ກອງໜ້າຂອງ ແອັດ ມາດຣິດ, ໄຊໂດ້ ເບຣາຮິໂນ້ ສູນໜ້າ ເວສບຣອມ ແລະ ມິຊີ ບາດຊູອາຢີ ດາວຍິງຈາກ ໂອລິມປິກ ມາກແຊ.

.....................................................................................................................................................