ມຸ່ງໝັ້ນກັບ ລາຊີໂອ ເດຟຣາຍ ຢືນຢັນບໍ່ຍ້າຍໄປ ຜີສາດແດງ

ສະເຕຟານ ເດີ ຟຣາຍ ກອງຫຼັງ ລາຊີໂອ ປະກາດຢ່າງຊັດເຈນ ບໍ່ຄິດຈະຍ້າຍໄປ ແມນເຊສເຕີ້ ຢູໄນເຕັດ ລະບຸວ່າ ຕອນນີ້ຂໍມີສະມາທິກັບການຫຼິ້ນໃຫ້ກັບ “ບຽງໂຄເລສເຕ້” ເປັນອັນດັບທໍາອິດ.

ສະເຕຟານ ເດິ ຟຣາຍ ກອງຫຼັງຊາດ ໂຮນລັງ ຂອງ ລາຊີໂອ ສະໂມສອນຊັ້ນນຳຂອງ ກັນໂຊ ຊີຣີ ອາ ຢືນຢັນບໍ່ມີຄວາມຄິດທີ່ຈະຍ້າຍໄປຢູ່ກັບ ແມນເຊສເຕີ້ ຢູໄນເຕັດ ທີມດັງຈາກແດນຜູ້ດີ ພຣີເມຍລີກ ອັງກິດ ແຕ່ຢ່າງໃດ.

ນັກເຕະອາຍຸ 23 ປີຄົນນີ້ຕົກເປັນຂ່າວກັບຍອດທີມແຫ່ງຖິ່ນ ໂອນ ທຣາຟເຟິດ ນັບຕັ້ງແຕ່ທີ່ ຫຼຸຍ ຟານກາວ ເຂົ້າໄປເປັນນາຍໃຫຍ່ຂອງ ແມນຢູ ຫຼັງຈົບເສິກ ບານໂລກ 2014 ເນື່ອງຈາກວ່າຕົນເອງເປັນໜຶ່ງໃນຄົນທີ່ຮ່ວມງານກັບ ຫຼຸຍ ຟານກາວໃນທີມຊາດ ໂຮນລັງ ຊຸດດັ່ງກ່າວ.

“ຂ້ອຍຕົກເປັນຂ່າວກັບ ແມນເຊສເຕີ້ ຢູໄນເຕັດ ຢ່າງຕໍ່ເນື່ອງກໍເພາະວ່າ ຫຼຸຍ ຟານກາວ ເປັນຜູ້ຈັດການທີມຂອງພວກເຂົາ ມີນັກເຕະຊາດ ໂຮນລັງ ຫຼາຍຄົນທີ່ຕົກເປັນຂ່າວກັບ ແມນເຊສເຕີ້ ຢູໄນເຕັດ ແຕ່ມັນບໍ່ເຄີຍມີການຍ້າຍທີມເກີດຂຶ້ນເລີຍ ສິ່ງດຽວທີ່ຂ້ອຍຕ້ອງການໃນຕອນນີ້ຄືການໄດ້ແຊ້ມກັບ ລາຊີໂອ ຊ່ວງຕົ້ນລະດູການເຮົາປະສົບກັບບັນຫາມາໜ້ອຍໜຶ່ງ ແຕ່ຕອນນີ້ເຮົາຢູ່ໃນໄລຍະຂາຂຶ້ນອີກເທື່ອໜຶ່ງ ເຮົາກຳລັງໄຕ່ອັນດັບຂຶ້ນໄປເລື້ອຍໆ” ເດິ ຟຣາຍ ລະບຸ.

................................................................................................................................................................................