ມີຜູ້ເສຍຊີວິດ 20 ຄົນ ຈາກເຫດແຜ່ນດິນໄຫວຢູ່ຈີນ

ຫ້ອງການຖະແຫຼງຂ່າວອຳນາດການປົກຄອງແຂວງເສສວນ ສປ ຈີນ ຢືນຢັນວ່າ: ມາຮອດ 12:00 ໂມງ ຂອງວັນທີ 10 ສິງຫາ ທີ່ຜ່ານມາ ມີຜູ້ເສຍຊີວິດ 20 ຄົນ ແລະ ຜູ້ບາດເຈັບ 431 ຄົນ. ໃນນີ້, ບາດເຈັບສາຫັດ 18 ຄົນ ຈາກເຫດແຜ່ນດິນໄຫວຢູ່ຈິວຈ້າຍໂກ່ວ ແຂວງເສສວນ.
ເຈົ້າໜ້າທີ່ກະຊວງຄົມມະນາຄົມຂົນສົ່ງຈີນ ແຈ້ງວ່າ: ໄປພ້ອມກັບການເຮັດໃຫ້ການຄົມມະນາຄົມຢູ່ເສັ້ນທາງຕອນໃຈກາງແຜ່ນດິນໄຫວຫາຈິວຈ້າຍຖ່ຽນຖາງ ກັບສູ່ສະພາບປົກກະຕິແລ້ວ, ທາງຫຼວງເຂດປະສົບໄພກໍ່ໄດ້ສ້ອມແປງເຮັດໃຫ້ການສັນຈອນກັບມາເປັນປົກກະຕິແລ້ວເຊັ່ນດຽວກັນ, ນັກທ່ອງທ່ຽວຫຼາຍສິບພັນຄົນທີ່ຄ້າງຢູ່ເຂດແຜ່ນດິນໄຫວໄດ້ອອກຈາກເຂດເກີດເຫດ. ໃນ ນີ້, ເກືອບ 9,000 ຄົນ ໄດ້ຂີ່ລົດໂດຍສານສຸກເສີນອອກຈາກເຂດປະສົບໄພ.
ທ່ານ ສະຕີຟານ ດູຈາຣິກ ໂຄສົກເລຂາທິການໃຫຍ່ອົງການສະຫະປະຊາຊາດ ຫຼື ສປຊ ເປີດເຜີຍໃນພິທີຖະແຫຼງຂ່າວທີ່ຈັດຂຶ້ນຢູ່ສຳນັກງານໃຫຍ່ອົງການສະຫະປະຊາຊາດນະຄອນນິວຢອກ ເມື່ອບໍ່ດົນມານີ້ ວ່າ: ສປຊ ສະແດງຄວາມເປັນຫ່ວງຫຼັງເກີດແຜ່ນດິນໄຫວຮຸນແຮງຢູ່ແຂວງເສສວນ ແລະ ເຂດຊິ່ນຈ່ຽງ.
ສປຊ ໃຫ້ຮູ້ວ່າຫາກທາງການຈີນມີຄວາມຕ້ອງການຄວາມຊ່ວຍເຫຼືອ, ສປຊ ກໍ່ຈະເລັ່ງລະດົມກໍາລັງໃຫ້ຄວາມຊ່ວຍເຫຼືອທຸກເວລາ.

Cr: https://laoedaily.com