ມີນັກຮຽນ 142 ຄົນເຂົ້າຮ່ວມສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດປະຈໍາປີ 2016-2017

ບັ້ນສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດ ມ4 ແລະ ມ 7 ປະຈໍາປີ 2016-2017 ແມ່ນໄດ້ເລີ່ມແຕ່25 ຮອດ 28 ເມສາ ທີ່ນະຄອນຫຼວງວຽງຈັນ ໂດຍມີນັກຮຽນເຂົ້າຮ່ວມສອບເສັງທັງໝົດ 142 ຄົນ, ຍິງ 57 ຄົນ ໃນນັ້ນ ມ4 ມີ 72 ຄົນ, ຍິງ 29 ຄົນ ສ່ວນ ມ7 ມີ 70 ຄົນ, ຍິງ 28 ຄົນ.

ການສອບເສັງຄັ້ງນີ້ມີ 4 ວິຊາຄື: ພາສາລາວ-ວັນນະຄະດີ, ຄະນິດສາດ, ເຄມີສາດ ແລະ ຟິຊິກສາດ ໂດຍແຕ່ລະວິຊາຈະໃຊເວລາ 120 ນາທີ ໂດຍແບ່ງເປັນ 2 ຫ້ອງ ທີ່ສະໂມສອນ ມະຫາວິທະຍາໄລຍແຫ່ງຊາດ ໂດຍຈະມີການສະຫຫຼັບກັນລະຫວ່າງຊັ້ນ ມ4 ແລະ ມ7 ຢູ່ຫ້ອງດຽວກັນ.

ທ່ານ ຮສຈ. ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກີລາໄດ້ຂຶ້ນກ່າວເປີດພິທີເປີດບັ້ນສອບເສັງວ່າ: ໃນແຕ່ລະສົກຮຽນ, ກົມມັດທະຍົມສຶກສາ ກະຊວງສຶກສາທິການ ແລະ ກີລາ ໄດ້ຈັດໃຫ້ມີການ ສອບເສັງແຂ່ງຂັນນັກຮຽນເກັ່ງຊັ້ນມັດທະຍົມສຶກສາລະດັບຊາດຂຶ້ນໂດຍມີຈຸດປະສົງ ເພື່ອເຮັດໃຫ້ນັກຮຽນໄດ້ສະແດງອອກຄວາມຮູ້ຄວາມສາມາດ ແລະ ພອນສະຫວັນຂອງຕົນເອງຕາມແຕ່ລະວິຊາທີ່ຕົນເອງຖະໜັດ, ເພື່ອຊຸກຍູ້ສົ່ງເສີມຂະບວນການສອນດີ-ຮຽນເກັ່ງຂອງກະຊວງສຶກສາທິການ ແລະ ກີລາ, ຍ້ອງຍໍ ແລະ ໃຫ້ໂອກາດແກ່ນັກຮຽນຜູ້ທີ່ເສັງໄດ້ອັນດັບ 1 ໃນແຕ່ລະວິຊາ, ເຊິ່ງໄດ້ໄດ້ຮັບທຶນການສຶກສາເພື່ອໄປຮຽນຕໍ່ວິຊາຊີບທີ່ຕົນເອງມັກຢູ່ໃນມະຫາວິທະຍາໄລພາຍໃນປະເທດ ອີກດ້ານກໍເພື່ອວັດ ແລະ ປະເມີນຜົນການຮຽນຂອງນັກຮຽນ ແລະ ການສິດສອນຂອງຄູອາຈານຢູ່ແຕ່ລະໂຮງຮຽນເພື່ອຄັດເລືອກເອົານັກຮຽນເກັ່ງ ແລະ ສົ່ງເສີມເສີມພອນສະຫວັນຂອງເຂົາເຈົ້າໃຫ້ເປັນຕົວແທນຂອງປະເທດເພື່ອໄປແຂງຂັນລະດັບພາກພື້ນ ແລະ ສາກົນ.

ຂໍ້ມູນຈາກ: ຂ່າວເສດຖະກິດ-ການຄ້າ Lao Economic Daily