ມິລານເລັງດຶງຊະໄນເດີລິນເສີມກາງ

 

“ຜີສາດແດງ-ດຳ” ເອຊີ ມິລານ ຫວັງດຶງໂຕ ມອກການ ຊະໄນເດີລິນ ມິດຟິວສ່ວນເກີນຂອງ ແມນເຊສເຕີ ຢູໄນເຕັດ ມາຮ່ວມທັບຊ່ວງເດືອນມັງກອນນີ້ ຄາດວ່າ “ຜີສາດແດງ” ອາດຈະຍອມປ່ອຍແບບສັນຍາຢືມໂຕກ່ອນ.

 

ເອຊີ ມິລານ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ຕົກເປັນຂ່າວເມື່ອວັນອັງຄານທີ່ຜ່ານມາວ່າກຳລັງໃຫ້ຄວາມສົນໃຈທີ່ຈະດຶງໂຕ ມອກການ ຊະໄນເດີລິນ ກອງກາງເລືອດນຳ້ຫອມຂອງ ແມນເຊສເຕີ ຢູໄນເຕັດ ສະໂມສອນຍັກໃຫຍ່ຂອງ ພຣີເມຍລີກ ມາເສີມທັບໃນຊ່ວງເດືອນມັງກອນນີ້.

 

ດາວເຕະອາຍຸ 27 ປີຍ້າຍມາຈາກ ເຊົາແຮມຕັນ ມາຮ່ວມທັບ “ຜີສາດແດງ” ເມື່ອຊ່ວງຊໍາເມີປີ 2015 ແຕ່ລະດູການນີ້ໄດ້ຮັບໂອກາດລົງໜ້ອຍຫຼາຍໃນຍຸກຂອງ ໂຊເຊ ມູຣິນໂຢ ໂດຍຫາກໍລົງຫຼິ້ນລວມທຸກລາຍການພຽງ 7 ນັດເທົ່ານັ້ນເຊິ່ງສ່ວນໃຫຍ່ເປັນການລົງຕົວສຳຮອງຊ່ວງທ້າຍເກມອີກດ້ວຍ ແລະ ມີຄວາມເປັນໄປໄດ້ສູງທີ່ “ເຮຍມູ” ຈະປ່ອຍໂຕ ຊະໄນເດີລິນ ໃຫ້ທີມອື່ນຢືມໃຊ້ງານໃນຊ່ວງເດືອນມັງກອນນີ້.

 

ກັນໂຊແມຄາໂຕເວັບດັອດໄອທີ ແລະ ເດິ ມິນເລີ ສອງສື່ດັງຕາງກໍພາກັນລາຍງານກົງກັນວ່າ ມິລານ ເປັນທີມເຕັງທີ່ໄດ້ໂຕ ຊະໄນເດີລິນ ໄປຮ່ວມທີມເຖິງວ່າມີ ທັອດແນມ ຮັອດສະເປີ ແລະ ຄຣິສຕັນ ພາເຫຼດ ໃຫ້ຄວາມສົນໃຈນັກເຕະຢູ່ກໍຕາມ.

 

ທັງນີ້ ຊະໄນເດີລິນ ມີຄ່າຫົວຍ້າຍຂາດຢູ່ທີ່ປະມານ 15 ລ້ານປອນ.