ມາແລ້ວ!!ຂຸນຄ້ອນເຊັນ 3 ປີດຶງຊິຊາຣິໂຕ້ຮ່ວມທັບ

 

ເວສແຮມ ຢູໄນເຕັດ ຈັດການດຶງຕົວ ຮາເວຍ ເອີນານເດດ ຫົວຫອກເລືອດຈັງໂກ້ມາຈາກ ໄບເອີ ເລເວີຄູເຊັນ ຮຽບຮ້ອຍດ້ວຍຄ່າຕົວ 16 ລ້ານປອນພ້ອມກັບເຜີຍວ່າດີໃຈທີ່ໄດ້ກັບມາຫຼິ້ນໃນ ພຣີເມຍລີກ ອີກຄັ້ງໜຶ່ງ.

ເວສແຮມ ຢູໄນເຕັດ ສະໂມສອນດັງຂອງ ພຣີເມຍລີກ ປະກາດຢືນຢັນເມື່ອວັນທີ 24 ກໍລະກົດທີ່ຜ່ານມາວ່າ ໄດ້ດຶງຕົວ ຮາເວຍ ເອີນານເດດ ກອງໜ້າເລືອດແມັກຊີໂກມາຈາກ ໄບເອີ ເລເວີຄູເຊັນ ສະໂມສອນໃນລີກ ບຸນເດສລີກາ ເຢຍລະມັນເປັນທີ່ຮຽບຮ້ອຍໂດຍເຊັນສັນຍາຮ່ວມງານກັນເປັນເວລາ 3 ປີ.

ສຳລັບຄ່າຫົວການຍ້າຍທີມຂອງ ຊິຊາຣິໂຕ້ ຄັ້ງນີ້ຢູ່ທີ່ 16 ລ້ານປອນໂດຍທີ່ອະດີດດາວເຕະຂອງ ແມນເຊສເຕີ ຢູໄນເຕັດ ອາຍຸ 29 ປີຈະໄດ້ຮັບຄ່າເມື່ອຍອາທິດລະ 140,000 ປອນເຊິ່ງຖືວ່າສູງສຸດໃນປະຫວັດສາດຂອງສະໂມສອນ.

“ຂ້ອຍມີຄວາມສຸກທີ່ໄດ້ມາຢູ່ກັບ ເວສແຮມ ຢູໄນເຕັດ” ຫົວຫອກທີມຊາດແມັກຊີໂກເປີດໃຈ “ສຳລັບຂ້ອຍແລ້ວ ພຣີເມຍລີກ ເປັນລີກທີ່ດີທີ່ສຸດໃນໂລກ ແລະ ເມື່ອໂອກາດນີ້ມາຮອດຂ້ອຍກໍຕັດສິນໃຈເຊັນສັນຍາກັບສະໂມສອນແຫ່ງນີ້ທັນທີ”.

“ມັນບໍ່ແມ່ນການຕັດສິນໃຈທີ່ຍາກ ເວສແຮມ ເປັນສະໂມສອນທີ່ມີປະຫວັດສາດ ມີຄວາມທະເຍີທະຍານ ເຊິ່ງຊ່ວງຊຳເມີນີ້ເຈົ້າກໍສາມາດເບິ່ງເຫັນນັກເຕະທີ່ພວກເຂົາດຶງເຂົ້າມາ ຂ້ອຍມີສາມປີທີ່ດີກັບການຫຼິ້ນທີ່ສະເປນ ແລະ ເຢຍລະມັນ ແຕ່ອັງກິດເປັນເວທີໃຫຍ່ແຫ່ງທຳອິດສຳລັບຂ້ອຍ ເຊິ່ງຂ້ອຍກໍແຮັບປີ້ຫຼາຍທີ່ໄດ້ກັບມາຫຼິ້ນຢູ່ທີ່ນີ້ອີກ ຂ້ອຍຢາກໃຫ້ລະດູການມັນເລີ່ມຂຶ້ນໄວໆ”.