ມາແລ້ວ!!! ລູກທີ 500 ຂອງ ເມສຊີ

 

ລີໂອເນວ ເມສຊີ ດາວຍິງ ບາເຊໂລນາ ຍິງປະຕູທີ 500 ໃນການເປັນນັກເຕະອາຊີບໄດ້ແລ້ວ ຫຼັງຍິງໄດ້ໃນເກມຕົ້ນສັງກັດພົບກັບ ບາເລັນເຊຍ ໂດຍແບ່ງເປັນ 450 ລູກກັບ ບາເຊໂລນາ ແລະ 50 ລູກກັບທີມຊາດ.

 

ລີໂອເນວ ເມສຊີ ດາວຍິງຊຸບເປີສະຕາຂອງ ບາເຊໂລນາ ຍິງປະຕູທີ 500 ໃນອາຊີບໄດ້ແລ້ວຫຼັງຈາກຍິງໄດ້ໃນເກມພົບກັບ ບາເລັນເຊຍ ເມື່ອວັນອາທິດທີ່ຜ່ານມາແຕ່ທີມປລາໄຊ.

 

ປະຕູດັ່ງກ່າວເກີດຂຶ້ນໃນນາທີ 63 ແລະ ເປັນລູກທີ່ເຮັດໃຫ້ ບາຊາ ໄລ່ຂຶ້ນມາເປັນ 1-2 ຫຼັງຈາກທີ່ທີມຢາມອອກນຳໄປກ່ອນສອງລູກຕັ້ງແຕ່ເຄິ່ງເວລາທຳອິດ ໂດຍ 500 ລູກຂອງເຂົານັ້ນແບ່ງເປັນກັບ ບາຊາ 450 ລູກລວມທຸກລາຍການ ແລະ 50 ລູກເປັນຜົນງານຂອງເຂົາທີ່ເຮັດໃຫ້ກັບທີມຊາດອາເຈັນຕິນາ.

 

ເມສຊີ ຍິງລູກທຳອິດກັບ ບາຊາ ໃນເດືອນພະຈິກປີ 2005 ໂດຍເປັນເກມພົບກັບ ອັນບາເຊເຕ ເຊິ່ງຕອນນັ້ນເຂົາມີອາຍຸພຽງແຕ່ 17 ປີເທົ່ານັ້ນ ສ່ວນປະຕູຂອງເຂົາກັບທີມຊາດແມ່ນເກີດຂຶ້ນໃນເກມອຸ່ນເຄື່ອງນັດທີ່ອາເຈັນຕິນາເສຍໃຫ້ກັບໂຄເອເຊຍ 2-3.

 

ທັງນີ້ ປັດຈຸບັນ ເມສຊີ ເປັນດາວຍິງສູງສຸດຕະຫຼອດການຂອງ ບາເຊໂລນາ ສ່ວນໃນທີມຊາດແມ່ນເປັນອັນດັບສອງຮອງຈາກ ກາບຽວ ບາຕິສຕູຕາ ໂດຍທີ່ ບາຕິສຕູຕາ ຍິງໄປ 56 ເມັດ.