ມາແບບພະເອກ..ແຟນບານກະທິງຫີນເຮຕ້ອນຮັບໂຈຮາດກຽມເຊັນຢືມ 1 ລະດູການ

 

ໂຈ ຮາດ ຜູ້ຮັກສາປະຕູຜູ້ດີປື້ມອົກປື້ມໃຈຫຼັງຈາກທີ່ໄດ້ຮັບການຕ້ອນຮັບທີ່ດີຈາກແຟນບານຂອງ ໂຕຣິໂນ ທີ່ມາຢືນຖ້າພ້ອມກັບສົ່ງສຽງເຮເມື່ອເຂົາມາຮອດສະໂມສອນເພື່ອກຽມເຊັນສັນຍາຢືມໂຕ 1 ລະດູການ ພ້ອມກັນນີ້ນັກເຕະຍັງໄດ້ຍົກເສື້ອຕົ້ນສັງກັດໃໝ່ເຊິ່ງເປັນສັນຍານຢືນຢັນຊັດເຈນວ່າຈະເຂົ້າມາເປັນສະຊິກໃໝ່.

 

ໂຈ ຮາດ ຜູ້ຮັກສາປະຕູທີມຊາດອັງກິດໄດ້ການຕ້ອນຮັບຢ່າງອົບອຸ່ນຈາກແຟນບານ ໂຕຣິໂນ ຕົ້ນສັງກັດໃໝ່ໃນ ກັນໂຊ ຊີຣີ ອາ ຂະນະດຽວກັນນັກເຕະຍັງໄດ້ຖ່າຍຮູບຍົກເສື້ອທັບ “ກະທິງຫີນ” ຫຼັງຈາກເດີນທາງມາຮອດສະໂມສອນເພື່ອກຽມເຊັນສັນຍາຢືມໂຕ 1 ລະດູການ.

 

ກ່ອນໜ້ານີ້ນາຍດ່ານ ແມນເຊສເຕີ ຊີຕີ ຖືກຖ່າຍພາບຂະນະມາຮອດສະໜາມບິນໃນເມືອງຕູຣິນຕອນເຊົ້າກ່ອນເດີນທາງໄປທີ່ສະໂມສອນ “ກະທິງຫີນ” ເພື່ອບັນລຸຂໍ້ຕົກລົງໃຫ້ລຸລ່ວງກ່ອນປິດຕະຫຼາດຊື້ຂາຍໃນພຸດນີ້ ພ້ອມກັບເປັນນາຍທະວານຜູ້ດີຄົນທຳອິດທີ່ມາຫຼິ້ນໃນ ກັນໂຊ ຊີຣີ ອາ ນັບຕັ້ງແຕ່ກໍ່ຕັ້ງລີກປີ 1929.

 

ທັງນີ້ນັກເຕະຍັງພົບກັບຊະຕາກຳທີ່ຄາດບໍ່ເຖິງເມື່ອຕົກໄປເປັນຕົວສຳຮອງຂອງ ວິນລີ ກາບາເຢໂລ ນາຍທະວານອາເຈັນຕິນາໃນຍຸກຂອງ ໂຈເຊັບ ກວາດິໂອລາ ຊ່ວງອອກສະຕາດລະດູການໃໝ່ ແລະ ຍິ່ງໝົດອະນາຄົດໄປອີກຫຼັງຈາກ “ເຮືອໃບສີຟ້າ” ດຶງໂຕ ເຄລາດິໂອ ບຣາໂວ ນາຍດ່ານຊີລີມາຈາກ ບາເຊໂລນາ ແລ້ວ.