ມາເລເຊຍ ສະຫຼອງວັນປະກາດເອກະລາດ ຄົບຮອບ 58 ປີ

    ທ່ານ ດາ​ໂຕະ ຕັນໄຕ​ເຮັງ ເອກ​ອັກ​ຄະ​ຣາ​ຊະ​ທູດມາ​ເລ​ເຊຍ ປະຈຳ​ລາວ ຈັດ​ງານ​ລ້ຽງ​ສະເຫຼີມສະຫຼອງ ວັນ​ປະກາດ​ເອກະລາດ ຄົບຮອບ 58 ປີ ແລະ ວັນ​ມາ​ເລເຊຍ ຄົບຮອບ 52 ປີ ຂຶ້ນ​ໃນ​ວັນ​ທີ 16 ກັນຍາ 2015 ທີ່​ໂຮງແຮມດອນ​ຈັນ​ພາ​ເລດ ໂດຍ​ມີ​ທ່ານ ຫຽມ ພົມມະຈັນ ລັດຖະມົນຕີ​ວ່າການ​ກະຊວງ​ໄປສະນີ ໂທລະ​ຄົມມະ​ນາ​ຄົມ ແລະ ການ​ສື່ສານ ທ່ານ​ນາງ ຄຳ​ເພົາ ເອີນ​ທະ​ວັນ ລັດຖະມົນຕີ​ຊ່ວຍ​ວ່າການ ກະຊວງ​ການ​ຕ່າງປະເທດ ບັນດາທ່ານ​ລັດຖະມົນຕີ ທູຕານຸທູດ ແຂກ​ຖືກ​ເຊີນ ທັງ​ພາຍ​ໃນ ແລະ ຕ່າງປະເທດ​ເຂົ້າ​ຮ່ວມ.

   ໂອກາດ​ນີ້ ທ່ານ ດາ​ໂຕະ ຕັນໄຕ​ເຮັງ ໄດ້​ກ່າວ​ວ່າ: ພາຍຫຼັງການ​ປະກາດ​ເອກະລາດ 1957 ເປັນຕົ້ນ​ມາ ມີ​ບາດກ້າວ​ຂະຫຍາຍ​ຕົວຢ່າງ​ຕໍ່​ເນື່ອງ GDP ໄດ້ເຕີບ​ໃຫຍ່​ໃນ​ອັດຕາ​ສະເລ່ຍ 6,5% ຕໍ່​ປີ ແລະ 2009-2014 ລວມ​ຍອດ​ລາຍ​ຮັບ​ແຫ່ງ​ຊາດ​ໄດ້ເຖິງ 47,7% ໃນ​ຄະນະ​ດຽວ​ກັນ ການ​ລົງທຶນ​ຕ່າງປະເທດ​ກໍ່​ເພີ່ມຂຶ້ນ ໂດຍ​ສະເພາະ ການ​ລົງທຶນທາງ​ດ້ານ​ການ​ຜະລິດ ແລະ ການບໍລິການກ່ຽວ​ກັບ​ການທ່ອງທ່ຽວ ແມ່ນ​ຕິດ​ອັນ​ດັບ​ທີ 12 ຂອງ​ໂລກ ໃນ​ປີ 2014 ທີ່​ຜ່ານ​ມາ ມີ​ນັກທ່ອງ​ທ່ຽວ​ເຂົ້າ​ມາ​ປະເທດ​ເຖິງ 27,4 ລ້ານ​ເທື່ອ​ຄົນ.

    ນັບ​ແຕ່​ມີ​ການ​ສ້າງຕັ້ງ​ສາຍພົວພັນ​ການ​ທູດ​ກັບ ​ສປປ ລາວ ມາ​ແຕ່ 1966 ໄດ້​ຮັກສາ​ສາຍ​ພົວພັນ​ອັນ​ໃກ້ຊິດ ແລະ ຮ່ວມ​ມື ບົນພື້ນຖານ​ເຄົາລົບ​ສິດ​ໃນ​ສອງ​ຝ່າຍ ມີ​ການ​ແລກປ່ຽນ​ຢ້ຽມຢາມ​ການນຳ​ຂັ້ນ​ສູງ​ທັງ​ສອງ​ປະເທດ ເປັນການ​ເພີ່ມ​ທະວີ​ສາຍ​ພົວພັນ​ທັງສອງ​ປະເທດ ເພື່ອ​ຜົນ​ປະໂຫຍດສອງ​ຝ່າຍ​ໃນ​ຂົງເຂດ​ການ​ຮ່ວມ​ມືການ​ຄ້າ ການ​ລົງທຶນ ໄດ້​ເພີ່ມ​ຂຶ້ນໃນ​ແຕ່​ລະ​ປີ.

    ສຳລັບ​ກິດຈະກຳ​ການ​ສະເຫຼີມ​ສະຫຼອງ​ຢູ່​ນະຄອນຫຼວງ​ວຽງຈັນ​ໃນ​ປີ​ນີ້ ພິເສດ​ຫ້ອງການອົງການທ່ອງທ່ຽວ​ມາ​ເລ​ເຊຍ​ຢູ່​ລາວ ຮ່ວມ​ກັບ​ສຳນັກງານ​ໃຫຍ່​ຂອງຕົນ ຈັດ​ເທ​ສະການ​ອາຫານ ແລະ ວັດທະນະທຳ ປະຈຳ​ປີ 2015 ຂຶ້ນ ໃນ​ລະຫວ່າງ​ວັນ​ທີ 17-20 ກັນຍາ 2015 ທີ່​ຫໍ​ວັດທະນະທຳ​ແຫ່ງຊາດ ພາຍ​ໃນ​ງານ​ຍັງ​ມີ​ກິດ​ຈະກຳ​ອີກ​ຫຼາຍ​ຢ່າງ​ທີ່​ໜ້າ​ສົນໃຈ ທີ່​ບັນດາ​ທ່ານ​ສາມາດ​ເຂົ້າ​ຮ່ວມໂດຍ​ບໍ່​ໄດ້​ເສຍ​ຄ່າ​ຜ່ານ​ປະຕູ.

ທີ່ມາ   www.vientianemai.net