ມາເລເຊຍເພີ່ມທະວີການປ້ອງກັນຄວາມປອດໄພຢ່າງແໜ້ນແຟ້ນເພື່ອຮັບປະກັນຄວາມປອດໄພຂອງກອງປະຊຸມຕ່າງໆຂອງຜູ້ນຳອາຊີຕາເວັນອອກ

ເນື່ອງຈາກວ່າໄດ້ເກີດເຫດການຫຼອນໂຈມຕີແບບກໍ່ການຮ້າຍຢ່າງໜັກໜ່ວງຢູ່ນະຄອນຫຼວງປາຣີຂອງຝຣັ່ງໃນວັນທີ 14 ພະຈິກນີ້, ມາເລເຊຍກໍ່ແມ່ນເປົ້າໝາຍການຫຼອນໂຈມຕີແບບກໍ່ການຮ້າຍຂອງກຸ່ມຫົວຮຸນແຮງ IS ມາໂດຍຕະຫຼອດ, ມາເລເຊຍຈຶ່ງຈະໃຊ້ມາດຕະການດ້ານການປ້ອງກັນຄວາມປອດໄພຢ່າງແໜ້ນແຟ້ນ, ເພື່ອຮັບປະກັນຄວາມປອດໄພຂອງກອງປະຊຸມຮ່ວມມືຕ່າງໆຂອງຜູ້ນຳອາຊີຕາເວັນອອກທີ່ຈະເລີ່ມຈັດຂຶ້ນໃນວັນທີ 21 ພະຈິກນີ້.

ຫົວໜ້າກອງປ້ອງກັນປະເທດຂອງມາເລເຊຍກ່າວວ່າ: ຝ່າຍທະຫານຈະຮ່ວມມືກັບຝ່າຍຕຳຫຼວດຂອງມາເລເຊຍຢ່າງແໜ້ນແຟ້ນ, ເພື່ອຮັບປະກັນຄວາມປອດໄພຂອງກອງປະຊຸມສຸດຍອດຄັ້ງນີ້. ທ່ານກ່າວວ່າ: ໄດ້ໃຊ້ທະຫານ 4.500 ຄົນເຊິ່ງກຽມພ້ອມແລ້ວທີ່ຈະປະຕິບັດໜ້າທີ່ຂະນະທີ່ມີຄວາມຈຳເປັນ. ໃນນັ້ນ, ທະຫານ 2.000 ຄົນຈະປະຈຳຢູ່ໃນເມືອງກົວລາລຳເປີ, ອີກ 2.500 ຄົນຈະປະຈຳຢູ່ບໍລິເວນໃກ້ກັບເມືອງກົວລາລຳເປີ, ເພື່ອກຽມຈະໃຫ້ການຊ່ວຍເຫຼືອໃນທຸກເວລາ.

ທ່ານຕານສຣີ ຄາລິດ, ຜູ້ບັນຊາການຕຳຫຼວດແຫ່ງຊາດມາເລເຊຍກ່າວວ່າ: ໄດ້ໃຊ້ມາດຕະການດ້ານການປ້ອງກັນຄວາມປອດໄພທີ່ສຸຂຸມຮອບຄອບແລ້ວເພື່ອຈະໄຂກອງປະຊຸມຄັ້ງນີ້, ເພື່ອຮັບມືກັບສະພາບຕ່າງໆທີ່ອາດຈະເກີດຂຶ້ນ, ຊຶ່ງລວມທັງການໂຈມຕີຈາກກຸ່ມ IS.