ມາເຣດໄດ້ລາງວັນແຄ່ງດີເດັ່ນອາຟຣິກາຂອງບີບີຊີ

 

ຣີຢາດ ມາເຣດ ປີກຂອງ ເລສເຕີ ຊີຕີ ໄດ້ລາງວັນນັກເຕະດີເດັ່ນທະວີບອາຟຣິກາປະຈຳປີ 2016 ຂອງ ບີບີຊີ ມາຄອງຮຽບຮ້ອຍແລ້ວ ພ້ອມກັບເປີດໃຈວ່າສຸດດີໃຈ ແລະ ຂໍມອບລາງວັນນີ້ໃຫ້ກັບແຟນໆ ແລະ ຄອບຄົວ.

 

ຣີຢາດ ມາເຣດ ປີກທີມຊາດແອວຈິເລຍຂອງ ເລສເຕີ ຊີຕີ ສະໂມສອນດັງຂອງ ພຣີເມຍລີກ ໄດ້ຮັບການໂຫວດຈາກແຟນບານທົ່ວໂລກໃຫ້ເປັນຜູ້ໄດ້ລາງວັນນັກເຕະດີເດັ່ນຂອງທະວີບອາຟຣິກາປະຈຳປີ 2016 ຈາກການຈັດຂອງ ບີບີຊີ ສື່ຊັ້ນນຳເມືອງຜູ້ດີເມື່ອວັນຈັນທີ່ຜ່ານມາ.

 

ດາວເຕະອາຍຸ 25 ປີເປັນກຳລັງສຳຄັນໃນການຊ່ວຍທັບ “ຈິງຈອກເງິນ” ຂຶ້ນມາຄວ້າແຊມ ພຣີເມຍລີກ ຢ່າງຍິ່ງໃຫຍ່ເມື່ອລະດູການ 2015-2016 ທີ່ຜ່ານມາພ້ອມກັບຍິງໄດ້ເຖິງ 18 ລູກຈາກການລົງຫຼິ້ນລວມທຸກລາຍການ 39 ນັດ ນອກຈາກນີ້ເຂົາຍັງລົງສະໜາມຮັບໃຊ້ທີມຊາດແອວຈິເລຍ 5 ນັດໃນປີ 2016 ແລະ ເຮັດໄດ້ 2 ປະຕູເຊິ່ງເກີດຂຶ້ນໃນເກມ ອາຟຣິກັນ ເນຊັນ ຄັບ ຮອບຄັດເລືອກທີ່ພົບກັບ ເລໂຊໂທ.

 

“ມັນມີຄວາມໝາຍສຳລັບຂ້ອຍຫຼາຍ ມັນເປັນສິ່ງທີ່ຍິ່ງໃຫຍ່ສຳລັບນັກເຕະຊາວອາຟຣິກາ ເພາະສະນັ້ນຂ້ອຍຈຶ່ງມີຄວາມສຸກ ແລະ ຮູ້ສຶກພາກພູມໃຈຫຼາຍ ການໄດ້ລາງວັນຖືເປັນຫຍັງທີ່ດີສະເໝີ ແລະ ສຳລັບນັກເຕະອາຟຣິກາແລ້ວມັນຖືເປັນກຽດຢ່າງສູງເລີຍ ຂ້ອຍຂໍຂອບໃຈແຟນບານທຸກຄົນ ຂ້ອຍຂໍຂອບໃຈແຟນບານແອວຈິເລຍພ້ອມ ຂ້ອຍຂໍມອບລາງວັນນີ້ໃຫ້ກັບພວກເຂົາລວມເຖິງຄອບຄົວຂອງຂ້ອຍ” ມາເຣດ ເປີດໃຈ.

 

ທັງນີ້ ຊາດິໂອ ມາເນ ປີກທີມຊາດເຊເນເກົາຂອງ ລີເວພູ ເຂົ້າມາເປັນອັນດັບ 2 ສ່ວນ ປີແອ-ເອເມີຣິກ ໂອບາເມຢອງ ດາວຍິງທີມຊາດກາບອງຂອງ ໂບຣຸສເຊຍ ດອດມຸນ, ອັງເດຣ ອາຢິວ ປີກທີມຊາດການາຂອງ ເວສແຮມ ຢູໄນເຕັດ ແລະ ຢາຢາ ຕູເຣ ມິດຟິວໄອວາຣີໂຄດຂອງ ແມນເຊສເຕີ ຊີຕີ ໄດ້ອັນດັບຕໍ່ໆກັນມາ.