ມາເຣຍຍິ້ມແປ່ນແວ່ນ..ກັບມາລົງຫຼິ້ນເກມການກຸສົນ

 

ເລີ່ມຍິ້ມອອກແນ່ໜ້ອຍໜຶ່ງແລ້ວ!! ມາເຣຍ ຊາຣາໂປວ້າ ແຣັກເກັດສາວຄົນດັງຍິ້ມແກ້ມບານທີ່ໄດ້ກັບມາຫຼິ້ນໃນແມັດການກຸສົນທີ່ອາເມລິກາຫຼັງຈາກທີ່ຫ່າງຈາກສະໜາມໄປດົນຕັ້ງແຕ່ຊ່ວງຕົ້ນປີ ເພາະເຈິກັບມໍລະສຸມເລື່ອງການໃຊ້ສານກະຕຸ້ນ ກ່ອນທີ່ຈະໄດ້ຫຼຸດໂທດແບນໃຫ້ກັບມາແຂ່ງຢ່າງເປັນທາງການໃນເດືອນເມສາປີໜ້າ.

 

ມາເຣຍ ຊາຣາໂປວ້າ ນັກເທັນນິດສາວເລືອດໝີຂາວລັດເຊຍກັບມາລົງຫຼິ້ນຄັ້ງທຳອິດແລ້ວນັບຕັ້ງແຕ່ຖືກສະຫະພັນເທັນນິດນາໆຊາດ ຫຼື ໄອທີເອຟ ລົງໂທດແບນ 2 ປີເມື່ອເດືອນມີນາທີ່ຜ່ານມາ ຈາກການໃຊ້ສານກະຕຸ້ນກ່ອນທີ່ສານອະນຸຍາໂຕຕຸລາການກິລາໂລກ ຫຼື ຊີເອເອສ ຈະຫຼຸດໂທດລົງມາເຫຼືອພຽງ 15 ເດືອນເທົ່ານັ້ນ.

 

ນັກຫວດສາວຖືກກວດພົບວ່າມີສານປະເພດເມວໂດນຽມຢູ່ໃນຮ່າງກາຍເຊິ່ງສານປປະເພດດັ່ງກ່າວຊ່ວຍໃຫ້ຫົວໃຈໃຊ້ອົກຊີແຊນໜ້ອຍລົງ ແລະ ຊ່ວຍໃຫ້ເນື້ອເຍື່ອກ້າມຊີ້ນບໍ່ເກີດຄວາມເສຍຫາຍ ໂດຍອົງກອນຕໍ່ຕ້ານການໃຊ້ສານກະຕຸ້ນໂລກ ຫຼື ວາດ້າ ຫາກໍລະບຸໃຫ້ສານດັ່ງກ່າວເປັນສານຕ້ອງຫ້າມເມື່ອວັນທີ 1 ມັງກອນສົ່ງຜົນໃຫ້ເຂົາຖືກ ໄອທີເອຟ ລົງໂທດແບນເຖິງ 2 ປີໂດຍມີຜົນຕັ້ງແຕ່ວັນທີ 26 ມັງກອນທີ່ຜ່ານມາກ່ອນທີ່ ຊີເອເອສ ຈະຕັດສິນຫຼຸດໂທດແບນຂອງເຂົາ 9 ເດືອນເຮັດໃຫ້ສາມາດກັບມາລົງແຂ່ງຂັນໄດ້ໃນເດືອນເມສາປີໜ້າ.

 

ຫຼ້າສຸດ ຊາຣາໂປວ້າ ລົງແຂ່ງໃນລາຍການການກຸສົນ “ເວິວ ທີມ ເທັນນິດ ສະແມດ ຮິດ” ທີ່ລາສເວກັສປະເທດອາເມລິກາເມື່ອວັນຈັນທີ 10 ຕຸລາທີ່ຜ່ານມາໂດຍຈັບຄູ່ກັບ ເທເລີ ຈອນສັນ ນັກຫວດດາວລຸ້ງສາວເລືອດລຸງແຊມເສຍໃຫ້ກັບຄູ່ຂອງ ມາຕິນ້າ ນາຟຣາຕິໂລວ້າ ແລະ ລີເຊວ ຮູເບີ.

 

“ນີ້ເປັນໂອກາດດີສຳລັບເຂົາ (ຈອນສັນ) ລວມທັງໂຕຂ້ອຍພ້ອມ ຂ້ອຍບໍ່ໄດ້ລົງຫຼິ້ນມາດົນແລ້ວ ພວກເຮົາທັງສອງມີໄລຍະເວລາທີ່ມ່ວນ ແລະ ຫົວກັນຕະຫຼອດ” ອະດີດນັກເທັນນິດສາວມື 1 ຂອງໂລກກ່າວ.