ມາເຟຍສະເໜີດັບອະນາຄົດອິຄາດີໃຫ້ໂລເປດ

 

ເຣດິໂອ 10 ສື່ໃນອາເຈັນຕິນາລະບຸວ່າ ມາເຟຍກຸ່ມໜຶ່ງເຂົ້າໄປຫາ ມັກຊີ ໂລເປດ ກອງໜ້າຂອງ ໂຕຣິໂນ ເພື່ອສະເໜີທີ່ຈະຢຸດອາຊີບນັກເຕະຂອງ ເມົາໂຣ ອິຄາດີ ຫົວຫອກຂອງ ອິນເຕີ ມິລານ ຫຼັງຈາກທີ່ທັງຄູ່ເປັນອະລິກັນແຕ່ວ່າ ໂລເປດ ປະຕິເສດໄປ.

 

ກຸ່ມມາເຟຍໄດ້ໄປຫາ ມັກຊີ ໂລເປດ ກອງໜ້າຊາວອາເຈັນຕິນາຂອງ ໂຕຣິໂນ ສະໂມສອນດັງໃນ ກັນໂຊ ຊີຣີ ອາ ອີຕາລີເພື່ອສະເໜີຕົວທີ່ຈະດັບອະນາຄົດຂອງ ເມົາໂຣ ອິຄາດີ ດາວຍິງຄົນດັງຂອງ ອິນເຕີ ມິລານ ທີ່ເປັນຄູ່ອະລິຂອງເຂົາ ຕາມການລາຍງານຂອງ ເຣດິໂອ 10 ສື່ໃນອາເຈັນຕິນາ.

 

ອິຄາດີ ເຄີຍສະນິດກັບ ໂລເປດ ຕອນທີ່ທັງສອງຄົນຢູ່ກັບ ຊາມໂດເຣຍ ນຳກັນແຕ່ສາຍສຳພັນນັ້ນຕ້ອງຂາດສະບັ້ນລົງເມື່ອ ອິຄາດີ ໄປຫຼິ້ນຊູກັບ ຊາຣາ ເຊິ່ງຕອນນັ້ນເປັນພັນລະຍາຂອງ ໂລເປດ.

 

ສຸດທ້າຍແລ້ວ ໂລເປດ ກັບ ຊາຣາ ກໍຕ້ອງເລີກລາກັນ ແລະ ຫຼັງຈາກນັ້ນຝ່າຍຍິງກໍໄປແຕ່ງງານກັບ ອິຄາດີ ເຊິ່ງຫົວຫອກ ອິນເຕີ ກໍເຮັດ ໂລເປດ ຕ້ອງເຈັບຊຳ້ຍິ່ງກວ່າເກົ່າເມື່ອມີການໂພສຮູບທີ່ຕົນເອງຖ່າຍຄູ່ກັບລູກຂອງ ໂລເປດ ແລະ ນາຣາ ລົງທະວິດເຕີ.

 

ເລື່ອງທັງໝົດເຮັດໃຫ້ ໂລເປດ ຊັງຂີ້ໜ້າ ອິຄາດີ ສຸດໆຈົນເຄີຍບໍ່ຍອມຈັບມືກັບອີກຝ່າຍກ່ອນລົງຫຼິ້ນມາແລ້ວເຊິ່ງ ເຣດິໂອ 10 ລາຍງານວ່າກຸ່ມມາເຟຍເອງກໍເຂົ້າໃຈເຖິງເລື່ອງນີ້ຈົນເຖິງຂັ້ນຂັບລົດໄປຫາ ໂລເປດ ແລະ ສະເໜີທີ່ຈະດັບອະນາຄົດຂອງ ອິຄາດີ ຈົນຮອດຂັ້ນຖາມວ່າຢາກໃຫ້ຫັກຂາ ອິຄາດີ ໃຫ້ຫຼືບໍ່ ແຕ່ວ່າ ໂລເປດ ກໍໄດ້ປະຕິເສດຂໍ້ສະເໜີໄປ.