ມາເກວສຄວ້າແຊ້ມໂລກ ໂມໂຕ ຈີພີ 3 ສະໄໝໃນຮອບ 4 ປີ

 

ມາກ ມາເກວສ ນັກຊິ້ງເລືອດກະທິງປະກາດສັກກະຫຼາດຄວ້າແຊ້ມໂລກ ໂມໂຕ ຈີພີ ສະໄໝທີສາມໃນຮອບ 4 ປີຫຼັງຈາກທີ່ໄດ້ແຊ້ມ ເຈແປນນິສ ກຣັງປຣີ ຂະນະທີ່ ວາເລັນຕິໂນ ຣອສຊີ ແລະ ຄໍເກ ລໍເລັນໂຊ ແຂ່ງບໍ່ຈົບ ພ້ອມກັບຍົກວ່າທີມງານ ເຣັບໂຊ ຮອນດ້າ ເປັນສ່ວນສຳຄັນທີ່ເຮັດໃຫ້ປະສົບຄວາມສຳເລັດ.

 

ມາກ ມາເກວສ ນັດບິດເລືອດສະເປັນຂອງ ເຣັບໂຊ ຮອນດ້າ ຄວ້າແຊ້ມໂລກ ໂມໂຕ ຈີພີ ສະໄໝທີ່ 3 ໃນຮອບ 4 ປີເຖິງວ່າຍັງການແຂ່ງຂັນອີກ 3 ລາຍການໃນປີນີ້ກໍຕາມຫຼັງຄູ່ແຂ່ງລຸ້ນແຊ້ມທັງ ວາເລັນຕິໂນ ຣອສຊີ ແລະ ຄໍເກ ລໍເລັນໂຊ ສອງນັກຊິ້ງຈາກທີມ ໂມບິສຕາ ຢາມາຮ້າ ພາດທ່າລົ້ມໃນລາຍການ ເຈແປນນິສ ກຣັງປຣີ ທີ່ປະເທດຍີ່ປຸ່ນເມື່ອວັນອາທິດທີ່ຜ່ານມາ.

 

ມາເກວສ ເຊິ່ງກ່ອນໜ້ານີ້ເຄີຍໄດ້ແຊ້ມໂລກເມື່ອປີ 2013 ແລະ 2014 ກ່ອນທີ່ປີຈະເສຍແຊ້ມໃຫ້ ລໍເລັນໂຊ ເຜີຍວ່າ “ການແຂ່ງຂັນທຸກປີຈະມີຄວາມໜັກໜາສາຫັດ ແລະ ເຈົ້າຕ້ອງທຸ່ມເທຢ່າງສຸດຄວາມສາມາດແຕ່ໃນປີນີ້ຄວາມຮູ້ສຶກກົດດັນທີ່ຂ້ອຍມີໂດຍສະເພາະໃນຊ່ວງອອກເລີ່ມຕົ້ນລະດູການຖືວ່າສູງຫຼາຍ”.

 

“ຂ້ອຍຮູ້ສຶກກົດດັນຫຼາຍຂຶ້ນແຕ່ຂ້ອຍກໍທຸ່ມເທເປັນພິເສດ ມັນເປັນຄວາມຮູ້ສຶກທີ່ມະຫັດສະຈັນ ແລະ ເຫຼືອເຊື່ອຫຼາຍເພາະຂ້ອຍບໍ່ຄິດວ່າຈະໄດ້ແຊມໂລກທີ່ນີ້ ທີມມີສ່ວນສຳຄັນຢ່າງຫຼາຍທີ່ຊ່ວຍໃຫ້ຂ້ອຍໄດ້ແຊ້ມໂລກໃນປີນີ້ ພວກເຂົາຊ່ວຍໃຫ້ຂ້ອຍລືມຄວາມກົດດັນ ນອກຈາກນັ້ນຂ້ອຍຍັງໄດ້ຮຽນຮູ້ຈາກປີທີ່ຜ່ານມາແລ້ວວ່າຄວາມຄົງເສັ້ນຄົງວາເປັນສິ່ງສຳຄັນຫຼາຍ” ມາເກວສ ກ່າວ.