ມາບອກເຄັດລັບ ການຮັກສາຜິວໃນໜ້າໜາວ

ອາກາດໜາວໆແບບນີ້ ສາວໆຜິວແຫ້ງກໍຫວັ່ນໃຈຢ້ານເມກອັບບໍ່ງາມ ເພາະຜິວມັກແຫ້ງ ສ່ວນສາວຜິວມັນກໍຕ້ອງແປກໃຈວ່າເປັນຫຍັງເຂົ້າໜ້າໜາວຜິວແຫ້ງຈົນເປັນຂຸ່ຍຂາວທຸກເທື່ອ. ສະນັ້ນ, ເພື່ອຕັດບັນຫາດັ່ງກ່າວ ແອັດມິນຈະມາແນະນຳ 5 ເຄັບລັບໃນການຮັກສາຜິວໜ້າໃນໜ້າໜາວບໍ່ໃຫ້ເປັນຂຸ່ຍຂາວ ແຖມຍັງເຮັດໃຫ້ສຸຂະພາບຜີວດີນຳອີກ.


1 ພະຍາຍາມໃຊ້ນໍ້າລ້າໆ ຫຼື ຜະລິດພັນທີ່ອ່ອນໂຍນກັບຜິວລ້າງໜ້າໃນຕອນເຊົ້າ
ຊ່ວງເຊົ້າອາກາດຈະເຢັນຫຼາຍກວ່າປົກກະຕິ ຄວນຫຼີກລ່ຽງການໃຊ້ສະບູ່ ຫຼື ໂຟມລ້າງຫນ້າໃນຊ່ວງເຊົ້າ ຄົນຜິວແຫ້ງຄວນເລືອກໃຊ້ເປັນນ້ຳລ້າ ຫຼື ກໍລະນີມີຜິວມັນ ຫຼື ມີສິວງ່າຍຄວນເລືອກໃຊ້ຜະລິດພັນທີ່ອ່ອນໂຍນກັບຜິວເຊັ່ນ: ເຈວລ້າງໜ້າທີ່ມີຄ່າ pH ທີ່ສົມດຸນ ແລະ ບໍ່ມີສ່ວນປະສົມຂອງແອລກໍຮໍ
ຄວນຫຼີກລ່ຽງການໃຊ້ນໍ້າອຸ່ນລ້າງໜ້າເພາະຈະເຮັດໃຫ້ຜິວແຫ້ງ ແລະ ເປັນຜື່ນຄັນ ທາງທີ່ດີຄວນໃຊ້ນໍ້າອຸນຫະພູມປົກກະຕິຈະດີກວ່າ.

 


2 ຫ້າມຂັດ ຫຼື ຖູໜ້າເດັດຂາດ
ຄົນທີ່ມີຜິວແຫ້ງຊ່ວງອາກາດໜາວໆ ບໍ່ຄວນຂັດ ຫຼື ຖູໜ້າແຮງ ເພາະຈະເຮັດໃຫ້ຜິວແຫ້ງຂຶ້ນໄປອີກ (ຍົກເວັ້ນກໍລະນີຄົນຜິວມັນ ແລະ ບໍ່ແຫ້ງເປັນຂຸ່ຍຂາວໃນໜ້າໜາວສາມາດຂັດ ຫຼື ຖູໄດ້ຕາມປົກກະຕິອາທິດລະ 1 ຄັ້ງຈະເຮັດໃຫ້ຜິວສວຍໃສເມກອັບຕິດທົນກວ່າລະດູອື່ນໆ)
ທີ່ສຳຄັນຄົນທີ່ມີຜິວແຫ້ງ ຫຼື ຜິວມັນຂາດຄວາມຊຸ່ມຊື່ນ (ແຫ້ງເປັນຂຸ່ຍຂາວໃນໜ້າໜາວ) ຄວນຫັນມາບໍາລູງດ້ວຍການໝັກ ເນື່ອງຈາກການໝັກໜ້າກ່ອນນອນເປັນປະຈໍາ ຈະເຮັດໃຫ້ຜິວທີ່ແຫ້ງຂາດນໍ້າເຕັ່ງຕຶງສົດຊື່ນຂຶ້ນຢ່າງເຫັນໄດ້ຊັດ.

 


3 ທາຄີມກັນແດດກ່ອນອອກຈາກເຮືອນ
ໜ້າໜາວແດດຈະແຮງຫຼາຍໃນຊ່ວງກາງເວັນ ເຮັດໃຫ້ຜິວໜ້າຖືກທຳຮ້າຍຫຼາຍກວ່າເກົ່າ ດັ່ງນັ້ນ, ຄີມກັນແດດຈຶ່ງເປັນເຄື່ອງສໍາອາງ ທີ່ສໍາຄັນທີ່ຂາດບໍ່ໄດ້ໃນລະດູການນີ້.
4 ເລືອກໃຊ້ເຄື່ອງສໍາອາງທີ່ເໝາະກັບຜິວ
ບໍ່ຄວນເລືອກເຄື່ອງສໍາອາງ ທີ່ມີຄຸນສົມບັດຄຸມມັນຫຼາຍຈົນເກີນໄປ ບໍ່ວ່າຈະເປັນຮອງພື້ນ, ແປ້ງ ຫຼື ບີບີຄີມເພາະຜິວທີ່ແຫ້ງເກີນໄປໃນໜ້າໜາວເຊັ່ນນີ້ ຫາກຖືກຫຼຸດຄວາມມັນຫຼາຍຜິດປົກກະຕິ ແລະຈະໄປກະຕຸ້ນໃຫ້ຜິວໜັງເກີດການອັກເສບເປັນຜື່ນແດງ ແລະ ລອກເປັນຂຸ່ຍຂາວໄດ້.


5 ດື່ມນໍ້າໃຫ້ຫຼາຍຍິ່ງຂຶ້ນ
ນໍ້າຈະຊ່ວຍເພີ່ມຄວາມຊຸ່ມຊື່ນແກ່ຜິວຈາກພາຍໃນ ແລະ ຄວນເລືອກຮັບປະທານຜັກ, ໝາກໄມ້ເພື່ອເຕີມວິຕາມິນເອ, ຊີ, ອີ ແລະ ສານອາຫານບໍາລຸງຜິວໃຫ້ສວຍສົດໃສຢ່າງສະໝໍ່າສະເໝີ ພຽງເທົ່ານີ້ຜິວພັນຂອງທ່ານກໍ່ຈະງົດງາມຕະຫຼອດລະດູໜາວແລ້ວ.