ມາກແຊດຶງຊາກາອິຮ່ວມທັບແລ້ວ

 

ມາກແຊ ປະກາດດຶງ ຮິໂຣກິ ຊາກາອິ ແບັກຂວາເລືອດປາດິບມາຈາກ ຮັນໂນເວີ ໄດ້ແລ້ວໂດຍພວກເຂົາຍັງໄດ້ ອອງຣີ ເບດິໂມ ຟູແບັກໂຕເກົ໋າມາຮ່ວມທີມນຳ.

 

ໂອລິມປິກ ມາກແຊ ສະໂມສອນດັງຂອງ ລີກແອັງ ຝຣັ່ງປະກາດເມື່ອວັນພະຫັດທີ່ຜ່ານມາວ່າໄດ້ເຊັນສັນຍາດຶງໂຕ ຮິໂຣກິ ຊາກາອິ ແບັກຂວາທີມຊາດຍີ່ປຸ່ນຂອງ ຮັນໂນເວີ ມາຮ່ວມທັບເປັນທີ່ຮຽບຮ້ອຍແລ້ວ.

ຊາກາອິ ມີປະສົບການຫຼາຍພໍສົມຄວນກັບການຫຼິ້ນໃນເອີຣົບ ຫຼັງຢູ່ກັບ ຮັນໂນເວີ ມາດົນ 4 ລະດູການໂດຍນັກເຕະຖືເປັນນັກເຕະຄົນຍີ່ປຸ່ນຄົນທີສອງທີ່ຫຼິ້ນໃຫ້ກັບ ມາກແຊ ຕໍ່ຈາກ ໂຄຈິ ນາກາຕະ ອະດີດແບັກຊ້າຍເລືອກຊາມູໄລທີ່ເຄີຍໃສ່ເສື້ອ “ໂອແອັມ” ໃນຊ່ວງປີ 2005-2006.

 

ນອກຈາກນີ້ ມາກແຊ ຍັງປະກາດອີກວ່າໄດ້ໂຕ ອອງຣີ ເບດິໂມ ຟູແບັກໂຕເກົ໋າຊາດແຄມມາລູນມາຈາກ ໂອລິມປິກ ລີຢົງ ໂດຍນອກຈາກ “ໂອແອນ” ແລ້ວນັ້ນ ເບດິໂມ ຍັງຫຼິ້ນໃຫ້ອີກຫຼາຍທີມໃນແດນນ້ຳຫອມເຊັ່ນ ຕູລົວ ແລະ ມົງເປລິເຢ ເປັນຕົ້ນ.