ມັນແທ້!!! ແຣງ ເປີດບ້ານຮັບການມາຢາມຂອງ ລີດ

ສະຕາດ ເດີ ແຣງ ເຈົ້າຖິ່ນພົກພາສະຖິຕິທີ່ດີກວ່າທີມມາຢາມຄື ລີດ ແຕ່ຜົນການແຂ່ງຂັນຈະອອກມາເປັນແບບໃດກຽມລຸ້ນກັນໄດ້ໃນເສິກກິລາບານເຕະ ລີກ ແອັງ ຝຣັ່ງ ຄືນວັນສຸກວັນທີ 25 ກັນຍາ.

ສະໜາມ : ສະຕາດ ໂອກຸສ ເດີໂລນ

 

ສະຕາດ ເດີ ແຣງ ສະໂມສອນຈາກແຄວ້ນນອງປານ-ອາກແດນ ທາງພາກຕາເວັນອອກສຽງເໜືອຂອງນະຄອນປາຣີ ຈະເປີດ ສະຕາດ ໂອກຸສ ເດີໂລນ ປະທະກັບ ລີດ ໃນລີກ ແອັງ ຝຣັ່ງ ນັດທີ 8 ຂອງລະດູການ.

ທັ້ງສອງທີມພົບກັນທີ່ບ້ານຂອງ ແຣງ ໃນລີກ ແອງ ມາແລ້ວ 22 ຄັ້ງ ເຊິ່ງເຈົ້າຖິ່ນກຳໄຊຊະນະໄປ 13 ນັດ ຍິງໄດ້ 42 ປະຕູ ສະເໝີ 6 ທີມຢາມຊະນະ 3 ຍິງ 29 ປະຕູ ແຕ່ ລີດ ບໍ່ຊະນະທີ່ນີ້ໃນ ລີກ ແອັງ ນັບຕັ້ງແຕ່ລະດູການ 1996-1997 ໂດຍທີ່ທັງຄູ່ພົບກັນລ່າສຸດທີ່ນີ້ເມື່ອວັນອາທິດທີ 9 ພຶດສະພາ 2014 ເຊິ່ງ ແຣງ ຊະນະໄປ 2-0 ໃນ ລີກ ແອັງ ນັດທີ 13 ຂອງລະດູການທີ່ຜ່ານມາ.

ໂອລິວິເຢ ເກກອງ ເທຣນເນີ້ຂອງ ສະຕາດ ເດີ ແຣງ ກັບໄວ 42 ປີ ນຳທີມລົງສະໜາມລ່າສຸດສະເໝີເກມທີ່ໄປຢາມ ອອງເຊ ນ້ອງໃໝ່ 0-0 ທີ່ ສະຕາດ ນອງ-ບວງ ໃນ ລີກ ແອັງ ນັດທີ 7 ເມື່ອວັນອັງຄານທີ 22 ກັນຍາ ເທົ່າກັບວ່າທີມຍັງບໍ່ເສຍໄຊມາ 4 ນັດຕິດຕໍ່ກັນ.

ເວລານີ້ ແຣງ ຂາດຜູ້ຫຼິ້ນໂຕຫຼັກຫຼາຍຄົນທັງ ແພຣັງ ອັນຢອງເກ້ ກອງກາງທີ່ບາດເຈັບຫົວເຂົ່າຊ້າຍ, ຄອສຊີ ອາກັສຊ້າ ນາຍທະວານໂຕໂກອາຍຸ 37 ປີ ບາດເຈັບກ້າມຊິ້ນຕົ້ນຂາຂວາ ເຮັດໃຫ້ ຈອນນີ ພລາຊິດ ປະຕູມືສອງເຝົ້າເສົາແທນ.

ນອກຈາກນັ້ນ ອູໂກ້ ໂຣດຣິເກດ ນັກເຕະກອງກາງບາດເຈັບກ້າມຊິ້ນຕົ້ນຂາຂວາ, ອອງຕວນ ກົງເຕ້ ກອງຫຼັງບາດເຈັບຫົວເຂົ່າຂວາ, ເກຣຈອນ ຄີ ກອງໜ້າບາດເຈັບສົ້ນໜ່ອງ.

ແຕ່ ອອງຕວນ ເດິໂວ,ຟຣອງ ຊິນໂຢຣິໂນ,ອອງໂຕນີ ວາແບ ທີ່ໄດ້ພັກໃນເກມລ່າສຸດ ກັບສູ່ກຸ່ມທັງໝົດ.

ທາງດ້ານ ແອກເວ້ ເຣີນາ ເທຣນເນີ້ຂອງ ລີດ ກັບໄວ 46 ປີ ບໍ່ໄດ້ນຳທີມລົງແຂ່ງຂັນ ລີກ ແອັງ ນັດທີ 7 ເມື່ອກາງອາທິດເກມນີ້ຖືກຍ້າຍໄປຫຼິ້ນຄືນວັນອາທິດທີ 29 ກັນຍາ ເວລາ 23.30 ແທນ ເຊິ່ງທີມຈະເປີດ ສະຕາດ ປີແອ ໂມຣົວ ພົບກັບ ແອັຟເຊ ນອງ ເນື່ອງຈາກເມື່ອວັນອາທິດທີ 20 ກັນຍາທີ່ຜ່ານມາ ສະໜາມ ອິນດໍ ຂອງ ລີດ ໃຊ້ຈັດງານ ບາສເກັດບອນຊິງຊະນະເລີດແຫ່ງຊາດເອີຣົບ ປະຈຳປີ 2015 ນັດຊິງຊະນະເລີດ ແລະ ຊິງອັນດັບ 3 .

ເຣີນາ ນຳ ລີດ ບໍ່ເສຍໄຊ 5 ເກມຕິດຕໍ່ກັນ ຫຼັງຈາກສະເໝີນັດທີ່ໄປຢາມ ແຣນ 1-1 ທີ່ ໂຣອາຊອນ ປາກ ໃນລີກ ແອັງ ນັດທີ 6 ເມື່ອວັນສຸກທີ 18 ກັນຍາທີ່ຜ່ານມາ.

ສະພາບຂອງທິີມລ່າສຸດ ລີດ ບໍ່ມີ ອາດາມາ ຊູມາໂອໂຣ ເຊັນເຕີ້ແບັກບາດເຈັບກ້າມຊິ້ນຂາຂວາຈີກຂາດ ພັກດົນເຖິງ 3 ອາທິດ ແລະ ວິນເຊັນ ເອັນເຢຍມາ ນາຍທະວານໄນຈີເຣຍ ປະຕູມືໜຶ່ງຂອງທີມຕິດໂທດແບນຫຼັງຈາກບັດແດງຈາກເກມລ່າສຸດເຮັດໃຫ້ ມິກ ເມຢອງ ນາຍທະວານອາຍຸ 20 ປີ ເຝົ້າເສົາແທນ.

ຢ່າງໃດກໍຕາມ ລີດ ໄດ້ຜູ້ຫຼິ້ນຫຼາຍຄົນກັບມາຝຶກຊ້ອມບໍ່ວ່າຈະເປັນ ສະຕີບ ເອລານາ ນາຍທະວານມືສອງ 35 ປີ ເຊົາຈາກອາການບາດເຈັບ, ມາກວິນ ມາກແຕັງ ກອງກາງໂຕບຸກເຊົາຈາກອາການບາດເຈັບສົ້ນນ່ອງ ຫຼັງຈາກທີ່ບໍ່ໄດ້ລົງສະໜາມມາດົນເຖິງ 9 ເດືອນ, ຟຣອງ ເບເຣຍ ກອງຫຼັງທີ່ເຊົາເຈັບຈາກເອັນຫົວເຂົ່າ ຫຼັງຈາກທີ່ເຂົາບໍ່ໄດ້ລົງຫຼິ້ນຕັ້ງແຕ່ວັນທີ 8 ມີນາຄົມທີ່ຜ່ານມາ.

ໃນສ່ວນຂອງ ມາໂກ ບາຊາ ເຊັນເຕີແບັກມອນເຕເນໂກຣເຊົາຈາກການເຈັບນິ້ວຕີນ ລົງສະໜາມຕັ້ງແຕ່ນັດທີ່ພົບກັບ ແຣນ.

ອີກທັງທີມໄດ້ຮັບຂ່າວດີເມື່ອ ຟໍຣອງ ບັນມົງ ກອງກາງໂຕຫຼັກເຊົາເຈັບກ້າມຊິ້ນຕົ້ນຂາຊ້າຍຈີກຂາດ ພ້ອມລົງສະໜາມ.

.......................................................................................................................................................