ມັກໃຕ້ທຽນຫອມ ໃນຫ້ອງນອນລະວັງ ສານເຄມີໃນທຽນ ປ່ຽນເປັນສານກໍ່ມະເຮັງໄດ້

 

ທຽນຫອມລະເຫີຍ ອາດກໍ່ໃຫ້ເກີດມະເຮັງໄດ້ ໂດຍສະເພາະຄົນທີ່ມັກຈູດທຽນຫອມໃນຫ້ອງທີ່ອາກາດບໍ່ຖ່າຍເທ ເລື່ອງນີ້ມີງານວິໄຈຢືນຢັນມາແລ້ວ.

ທຽນຫອມລະເຫີຍ ເປັນໜຶ່ງໃນເຄື່ອງຫອມທີ່ຫຼາຍໆຄົນມັກ ແລະນໍາມາໃຊ້ຈູດເພື່ອຜ່ອນຄາຍຫຼຸດຄວາມເມື່ອຍ ຊື່ງກໍ່ມີຫຼາຍກິ່ນໃຫ້ເລືອກຕາມໃຈມັກ ແຕ່ຮູ້ຫຼືບໍ່ວ່າ ທຽນຫອມລະເຫີຍນີ້ອາດຈະບໍ່ໄດ້ດີຢ່າງທີ່ເຮົາຄິດສະເໝີໄປ ໂດຍທີ່ມີຜົນວິໄຈຫຼ້າສຸດທີ່ເວັບໄຊເດລີ່ເມລນໍາມາເປີດເຜີຍ ເຫັນວ່າເມື່ອຈູດທຽນແລ້ວ ສານເຄມີທີ່ຢູ່ໃນທຽນຈະໄປທໍາການປະຕິກິລິຍາກັບອາກາດກາຍເປັນສານກໍ່ມະເຮັງສຸດອັນຕະລາຍ ແຖມຍັງເພີ່ມຄວາມສ່ຽງໂລກມະເຮັງໄດ້ອີກຫຼາຍ.

ສາດສະດາຈານ Alastair Lewis ແຫ່ງ National Centre for Atmospheric Science ຈາກມະຫາວິທະຍາໄລນິວຢອກ ເປີດເຜີຍຜົນການວິໄຈທີ່ໜ້າຕົກໃຈວ່າ ການທີ່ຈູດທຽນຫອມໃນຫ້ອງນອນທີ່ບໍ່ມີອາກາດຖ່າຍເທ ຈະເຮັດໃຫ້ຢູ້ຢູ່ອາໄສສ່ຽງຕໍ່ການໄດ້ຮັບສານເຄມີມາຈາກທຽນຫອມ ຊື່ງນໍາໄປເຮັດປະຕິກິລິຍາກັບອາກາດຈົນກາຍເປັນສານກໍ່ມະເຮັງໄດ້.

     ໂດຍສານທີ່ເຫັນເປັນສານເຄມີໃນກຸ່ມສານເຄມີໄອລະເຫີຍ  (Volatile organic chemicals ຫຼື VOCs)  ໄດ້ແກ່ ສານເບນຊິນ ຊື່ງມັກພົບໃນຄວັນພິດຈາກທໍ່ຄວັນ, ສານອັລຟາໄພນີນ (alpha-pinene) ເຫັນຫຼາຍໃນຜະລິດຕະພັນທໍາຄວາມສະອາດ ນອກຈາກນີ້ກໍ່ຍັງເຫັນສານໄລໂມນີນ(Limonene) ທີ່ເຖິງຈະມີຄຸນສົມບັດໃນການສ້າງກິ່ນຫອມ ແຕ່ເມື່ອເກີດການລວມຕົວຂອງສານຊະນິດນີ້ 2 ໂມເລກຸນເຂົ້າດ້ວຍກັນແລ້ວຈະກາຍສະພາບເປັນຟໍມາດີໄຮ (Formaldehyde) ຊື່ງຈະມີຄວາມອັນຕະລາຍຫຼາຍຂຶ້ນກວ່າເກົ່າ.

     ນັ້ນເປັນເພາະຟໍມາດີໄຮຂຶ້ນຊື່ວ່າເປັນໜື່ງໃນສານກໍ່ມະເຮັງ ໂດຍສະເພາະໂລກມະເຮັງດັງ ແລະໂລກມະເຮັງຄໍ ອີກທັງຍັງສົ່ງຜົນກະທົບຕໍ່ສຸຂະພາບໄດ້ຢ່າງຮ້າຍແຮງຫາກໄດ້ຮັບເຂົ້າສູ່ຮ່າງກາຍໃນປະລິມານທີ່ຫຼາຍຈົນເກີນໄປໂດຍອາດເຮັດໃຫ້ເກີດອາການເຈັບຄໍ ໄອເປັນເລືອດ, ເຄືອງຕາ ແລະເລືອດດັງໄຫຼ ນອກຈາກນີ້ບໍ່ວ່າຈະເປັນຟໍມາດີໄຮ ຫຼືໄລໂມນີນ ກໍ່ຈະບໍ່ສາມາດລະລາຍຫາຍໄປເອງໄດ້ ແລະຈະສະສົມຫຼາຍຂຶ້ນຫາກບໍລິເວນເຫຼົ່ານັ້ນບໍ່ມີການຖ່າຍເທອາກາດທີ່ດີ.

     ຮູ້ເຖິງຄວາມອັນຕະລາຍຂອງສານຊະນິດນີ້ແລ້ວ ໃຜທີ່ມັກຈູດທຽນຫອມລະເຫີຍໃນຫ້ອງນອນທີ່ປິດ ຄວນຫຼີກລຽງຢ່າງເດັດຂາດເລີຍ ເຖິງຈະຊ່ວຍໃຫ້ກິ່ນຫອມຫຼາຍຂຶ້ນ ແຕ່ເບື້ອງຫຼັງກິ່ນຫອມເຫຼົ່ານັ້ນກໍ່ອາດນໍາມາສູ່ໄພສຸຂະພາບໃນອະນາຄົດໄດ້ ຫາກຕ້ອງການໃຊ້ທຽນຫອມຄວນຈູດໃນສະຖານທີ່ທີ່ອາກາດຖ່າຍເທໄດ້ສະອາດດີກວ່າ.