ມະຫາວິທະຍາໄລແຫ່ງຊາດລາວ ຈະສະຫຼອງວັນສ້າງຕັ້ງ ມຊ ຄົບຮອບ 19 ປີ ໃນທ້າຍປີ 2016

ຕອນບ່າຍວັນທີ 5 ພະຈິກນີ້, ທີ່ມະຫາວິທະຍາໄລແຫ່ງຊາດລາວ, ໄດ້ມີພິທີຖະແຫຼງຂ່າວ ຈະສະຫຼອງວັນສ້າງຕັ້ງ ມຊ ຄົບຮອບ 19 ປີ ຫລື 2 ທົດສະວັດແຫ່ງການພັດທະນາ ແລະ ການສ້າງຜົນງານທາງວິຊາການຂອງ ມຊ ໃນທ້າຍປີ 2016. ເປັນກຽດກ່າວໂດຍ ທ່ານ ສຈ. ດຣ. ສຸກກົງແສງ ໄຊຍະເລີດ ອະທິການບໍດີມະຫາວິທະຍາໄລແຫ່ງຊາດລາວ, ມີຄະນະອະທິການບໍດີມະຫາວິທະຍາໄລແຫ່ງຊາດລາວ, ຜູ້ອໍານວຍການໂຮງຮຽນອ້ອມຂ້າງ, ພາກສ່ວນກ່ຽວຂ້ອງ ແລະ ບັນດາສື່ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ. 
ທ່ານ ສຈ. ດຣ. ສຸກກົງແສງ ໄຊຍະເລີດ ກ່າວວ່າ: ມະຫາວິທະຍາໄລແຫ່ງຊາດຈະຈັດກິດຈະກຳຕ່າງໆເພື່ອສະເຫລີມສະຫລອງວັນສ້າງຕັ້ງ ມຊ. ຄົບຮອບ 19 ປີ. ຈຸດປະສົງເພື່ອໃຫ້ທົ່ວສັງຄົມເຫັນໄດ້ຂະບວນວິວັດແຫ່ງການຂະຫຍາຍຕົວແຕ່ລະດ້ານ, ຜົນງານທີ່ພົ້ນເດັ່ນຂອງ ມຊ. ທີ່ຍາດມາໄດ້ຕະຫລອດໄລຍະ 19 ປີທີ່ຜ່ານມາ. ເພື່ອເຜີຍແຜ່ບົດບາດ ແລະ ຊື່ສຽງຂອງມະຫາວິທະຍາໄລແຫ່ງຊາດສູ່ເວທີລະດັບຊາດ ແລະ ລະດັບສາກົນ ແລະ ເພື່ອເຮັດໃຫ້ງານສະຫລອງວັນດັ່ງກ່າວ ມີລັກສະນະປະຫວັດສາດ, ມີບັນຍາກາດຟົດຟື້ນມ່ວນຊື່ນ ແລະ ມີການປະກອບສ່ວນຂອງຄູອາຈານ ພະນັກງານ ແລະ ນັກສຶກສາ ຕະຫລອດຮອດສິດເກົ່າ ແລະ ທຸກພາກສ່ວນຕ່າງໆຂອງສັງຄົມ. ເຊິ່ງໃນງານຈະປະກອບມີ 14 ກິດຈະກຳ ເຊັ່ນ: ຂຽນປື້ມປະຫວັດສາດຂອງ ມຊ. ຂຽນບົດລາຍງານຜົນງານ 20. ຈັດກອງປະຊຸມວິທະຍາສາດລະດັບສາກົນ 1 ຄັ້ງ. ຈັດງານວາງສະແດງຜົນງານ ມຊ. ຄົບຮອບ 19 ປີ. ຈັດສະແດງວັດທະນະທຳຮີດຄອງປະເພນີ, ການນຸ່ງຖື ແລະ ອາຫານປະຈຳທ້ອງຖິ່ນ. ຈັດປະກວດຮ້ອງເພງ, ແຕ່ງບົດເພັງທີ່ມີເນື້ອໃນກ່ຽວກັບ ມຊ. ປະຈຳ ມຊ. ໂດຍຈະເຊີນນັກແຕ່ງເພັງລະດັບຊາດເຂົ້າຮ່ວມ. ຈັດແຂ່ງຂັນອອກແບບສັນຍາລັກງານສະເຫລີມສະຫລອງ ມຊ.ຄົບຮອບ 19 ປີ ແລະ ກິດຈະກໍາອື່ນໆ. ໃນນັ້ນ 13 ກິດຈະກຳຈະໄດ້ດຳເນີນໃນໄລຍະກ່ອນວັນທີ 5 ພະຈິກ 2016. ພ້ອມນັ້ນ, ຈະມີການຈັດໂຮມຊຸມນຸມມິດຕິງໃຫຍ່ ເຊິ່ງຈະເຊື້ອເຊີນການນຳພັກ-ລັດ, ຕາງໜ້າກະຊວງທະບວງກົມ, ອຳນາດການປົກຄອງທ້ອງຖິ່ນ, ສະຖາບັນການສຶກສາຕ່າງໆ, ນັກທຸລະກິດ, ບັນດາສິດເກົ່າ ຕະຫລອດເຖິງຜູ້ຕາງໜ້າອົງການຈັດຕັ້ງສາກົນ ແລະ ມະຫາວິທະຍາໄລຕ່າງໆຂອງຕ່າງປະເທດທີ່ເປັນຄູ່ຮ່ວມມືເຂົ້າຮ່ວມພິທີດັ່ງກ່າວ. 
ໃນໂອກາດນີ້ ຂໍເຊີນຊວນທຸກພາກສ່ວນຂອງສັງຄົມ ຕະຫລອດເຖິງບັນດາສິດເກົ່າຂອງ ມຊ. ແລະ ເພື່ອນມິດຕ່າງປະເທດ ຈົ່ງກະກຽມເຂົ້າຮ່ວມກິດຈະກຳດັ່ງກ່າວ.