ມອບ-ຮັບລາງວັນສິນໄຊລາງວັນ ວັນນະກໍາສ້າງສັນດີເດັ່ນປະຈໍາປີ 2015

ຂປລ. ໃນວັນທີ 25 ມີນາ ນີ້ ຢູ່ນະຄອນຫລວງວຽງຈັນ ວາລະສານວັນນະສິນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຈັດພິທີມອບ-ຮັບລາງວັນສິນໄຊ ລາງວັນວັນນະກໍາສ້າງສັນດີເດັ່ນປະຈໍາປີ 2016 ໃຫ້ກຽດເຂົ້າຮ່ວມໂດຍມີທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ຄໍາໃບ ໂພທິສານ ຮອງຫົວໜ້າຫ້ອງການກະຊວງ ຖວທ, ປະທານສະມາຄົມນັກປະພັນລາວ, ມີບັນດາຫົວໜ້າກົມ, ຮອງກົມ ພ້ອມດ້ວຍບັນດານັກປະພັນອາຊີບ ແລະ ສະໝັກຫລິ້ນ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ທ່ານ ໂອທອງ ຄໍາອິນຊູ ຫົວໜ້າອໍານວຍການວາລະສານວັນນະສິນ ໃນນາມຕາງໜ້າຄະນະຮັບຜິດຊອບກວດສອບຄັດເລືອກກ່າວວ່າ: ວາລະສານວັນນະສິນໄດ້ປະກາດຮັບບົດແຕ່ວັນທີ 30 ກໍລະກົດ 2015 ມີຜູ້ສົ່ງບົດເຂົ້າແຂ່ງຂັນທັງໝົດ 254 ບົດ ໃນນີ້ ເລື່ອງສັ້ນ 87 ເລື່ອງ, ບົດກະວີ 158 ບົດ ແລະ ນະວະນິຍາຍ 9 ບົດ ຜ່ານການຄັດເລືອກຂອງຄະນະກໍາມະການເຫັນວ່າ ບົດເລື່ອງສັ້ນທີ່ໄດ້ຮັບລາງວັນຊະນະເລີດໄດ້ແກ່ ບົດນາຣົກຂຸມທໍາອິດໂດຍ ອາໂນລາດ ພິມໂວຫານ, ໄດ້ຮັບເງິນສົດ 4 ລ້ານກີບ, ພ້ອມດ້ວຍໃບຢັ້ງຢືນ, ບົດເລື່ອງນະວະນິບາຍ ລາງວັນຊະນະເລີດໄດ້ແກ່ບົດ ເມື່ອເລືອກເກີດບໍ່ໄດ້ໂດຍ ນອ້ຍ ດອກກະເດົາ ໄດ້ຮັບເງິນສົດ 3 ລ້ານກີບ ພ້ອມດ້ວຍໃບຢັ້ງຢືນ ແລະ ບົດກາວີ ທີ່ໄດ້ຮັບລາງວັນຊະນະເລີດໄດ້ແກ່ ບົດເລື່ອງໄປຢາມຍ່າໄດ້ຫຍັງມານໍາ ໂດຍແກ້ວບຸນທັນ ແກ້ວປະກາສິດ ໄດ້ຮັບເງິນສົດ 2,5 ລ້ານກີບ ແລະ ໃບຢັ້ງຢືນ ນອກນີ້, ຍັງມີລາງວັນຊົມເຊີຍຕື່ມອີກ 11 ບົດ ໃນນີ້ ເລື່ອງສັ້ນ 5 ບົດ, ກາວີ 5 ບົດ, ນະວະນິຍາຍ 1 ບົດ ແລະ ໄດ້ຮັບລາງວັນລະ 8 ແສນກີບ.

ແຫຼ່ງຂ່າວ: Pathedlao Lao.