ມອບລາງວັນ ໃຫ້ຜູ້ຊະນະເລີດ ການແຂ່ງຂັນຖ່າຍຮູບດ້ວຍມືຖື

ໃນວັນທີ 10 ພະຈິກ 2015 ນີ້, ທ່ານ ນາງ ຄາຣິນາ ອິມໂມເນັນ, ຜູ້ປະສານງານອົງການສະຫະປະຊາຊາດ ປະຈຳ ລາວ, ໄດ້ຈັດພິທີມອບລາງວັນໃຫ້ຜູ້ຊະນະເລີດການແຂ່ງຂັນຖ່າຍຮູບດ້ວຍມືຖື ໃນຫົວຂໍ້ “ ນຳກັນ 2030 ” ຢູ່ສູນການຄ້າວຽງຈັນເຊັນເຕີ ນະຄອນຫລວງວຽງຈັນ.
ຜູ້ຊະນະເລີດ ໃນການແຂ່ງຂັນ ດັ່ງກ່າວ, ໄດ້ແກ່ ທ້າວ ພອນປະສິດ ນັນທະລາດ, ອາຍຸ 23 ປີ ຈາກແຂວງ ສະຫວັນນະເຂດ ຮູບຂອງລາວສະແດງເຖິງການປ່ຽນແປງຂອງສະພາບດິນຟ້າອາກາດ ໄດ້ຮັບ ປີ້ຍິນໄປ-ກັບ ຫລວງພະບາງ ແລະ ກ້ອງຖ່າຍຮູບ Toshiba 1 ເຄື່ອງ. ລາງວັນທີ 2 ນາງ ພິມພາ ເພັດສະໝອນ ອາຍຸ 18 ປີ, ຮູບຂອງລາວສະແດງເຖິງການສຶກສາ ໄດ້ຮັບແພັກເກດ ທີ່ພັກຢູ່ໂຮງແຮມສາລານາ, ແຜ່ນເພງຈາກ ອາເລັກຊານດຣາ ບຸນຊ່ວຍ ແລະ ບັດຕື່ມເງິນບີລາຍ. ລາງວັນທີ 3 ທ້າວ ພາກິນດາ ຂັນທະວິໄລ, ອາຍຸ 26 ປີ ຮູບຂອງລາວສະແດງເຖິງຄວາມບໍ່ສະເໜີພາບ ລະຫວ່າງຍິງ-ຊາຍ ໄດ້ຮັບ ບັດຕື່ມເງິນບີລາຍ ແລະ ອາລະບຳເພງຈາກ ອາເລັກແຊນດຣາ ບຸນຊ່ວຍ. ນອກຈາກ ລາງວັນດັ່ງກ່າວແລ້ວ ຍັງມີລາງວັນຂວັນໃຈມວນຊົນ ແລະ ຜູ້ທີ່ໄດ້ຮັບລາງວັນຊະນະເລີດອັນດັບ 1 ແມ່ນ ທ້າວ ກິ່ງມະໂນ ດວງພະຈັນລາ ອາຍຸ 17 ປີ, ຮູບຂອງລາວສະແດງເຖິງການສຶກສາເພື່ອທຸກຄົນ, ລາງວັນທີ 2 ທ້າວ ສອນສັກສິດ ສີວົງໄຊ, ອາຍຸ 18 ປີ, ຮູບຂອງລາວສະແດງເຖິງການລືບລ້າງຄວາມທຸກຍາກ ແລະ ລາງວັນທີ 3 ນາງ ນຸດທະລາ ອຸດົມສຸກ ອາຍຸ 18 ປີ ຮູບຂອງລາວສະແດງເຖິງຊີວິດການເປັນຢູ່ຂອງປະຊາຊົນລາວບັນດາເຜົ່າ. 


ໂອກາດດັ່ງກ່າວ, ທ່ານນາງ ຄາຣິນາ ອິມໂມເນັນ ຜູ້ປະສານງານອົງການສະຫະປະຊາຊາດປະຈຳ ລາວ ໃຫ້ຮູ້ວ່າ: ການແຂ່ງຂັນ ດັ່ງກ່າວ ຈັດຂຶ້ນເພື່ອສະຫລອງວັນສ້າງຕັ້ງອົງການສະຫະປະຊາຊາດຄົບຮອບ 70 ປີ ແລະ 60 ປີແຫ່ງການເຮັດວຽກຮ່ວມກັນລະຫວ່າງລັດຖະບານລາວ ແລະ ອົງການສະຫະປະຊາຊາດ, ໂດຍໄດ້ກຳນົດວ່າ ຮູບທີ່ສົ່ງເຂົ້າປະກວດຕ້ອງສະແດງເຖິງເປົ້າໝາຍເພື່ອການພັດທະນາແບບຍືນຍົງທີ່ຖືກຮັບຮອງເອົາໂດຍລັດ ແລະ ສະມາຊິກອົງການສະຫະປະຊາຊາດ ໃນເດືອນກັນຍາທີ່ຜ່ານມາ ເຊິ່ງເນັ້ນໃສ່ການລືບລ້າງຄວາມທຸກຍາກ, ຕ້ານຄວາມບໍ່ສະເໝີພາບ, ຄວາມບໍ່ຍຸດຕິທຳ, ແກ້ໄຂບັນຫາການປ່ຽນແປງຂອງສະພາບດິນຟ້າອາກາດ ແລະ ອື່ນໆ.