ມອນເຕວລາປ້ອງດອນນາຣຸມມາຫຼັງເຮັດພາດແບບເກີນຄາດ

 

ວິນເຊັນໂຊ ມອນເຕວລາ ນາຍໃຫຍ່ຂອງ ມິລານ ອອກມາປົກປ້ອງ ຈານລຸຍຈິ ດອນນາຣຸມມາ ມືກາວອະນາຄົດໄກຫຼັງຈາກທີ່ເຂົາພາດຈົນສົ່ງຜົນໃຫ້ສະເໝີກັບ ເປສຄາຣາ 1-1 ພ້ອມລະບຸວ່າ “ຣອສໂຊເນຣີ” ຍັງມີໂອກາດໄດ້ສິດຫຼິ້ນລາຍການລະດັບທະວີບເອີຣົບໃນລະດູການໜ້າ.

 

ວິນເຊັນໂຊ ມອນເຕວລາ ຜູ້ຈັດການທີມຂອງ ເອຊີ ມິລານ ກ່າວປົກປ້ອງ ຈານລຸຍຈິ ດອນນາຣຸມມາ ຜູ້ຮັກສາປະຕູດາວລຸ້ງຂອງທີມເປັນການໃຫຍ່ຫຼັງຈາກທີ່ເຂົາຫຼິ້ນພາດຈົນສົ່ງຜົນໃຫ້ທີມເຮັດໄດ້ພຽງສະເໝີກັບ ເປສຄາຣາ 1-1 ໃນເກມລີກເມື່ອວັນອາທິດທີ່ຜ່ານມາ.

 

ໃນນາທີ 12 ນັ້ນ ກາບຽວ ປາເລັດຕາ ກອງຫຼັງຂອງທີມຢາມສົ່ງບານກັບຫຼັງໃຫ້ ດອນນາຣຸມມາ ແບບປົກກະຕິແຕ່ວ່າມືກາວາອາຍຸ 18 ປີກະຈັງຫວະບານພາດຈົນປ່ອຍໃຫ້ບານກິ້ງຜ່ານຕີນຂອງເຂົາເຂົ້າປະຕູຍັງດີທີ່ສຸດທ້າຍ ມິລານ ມາຕີ ສະເໝີໄດ້ຈາກ ມາຣິໂອ ປາຊາລິດ ໃນນາທີ 41.

 

“ມັນມີໂອກາດທີ່ຈະເກີດຄວາມຜິດພາດແບບນີ້ໄດ້ຢູ່ແລ້ວ ຈິຈິໂອ ຕ້ອງຢ່າໄປຄຽດກັບມັນ ຖ້າວ່າເຮົາຊະນະເກມນີ້ເຮົາຄືສິຫົວແບບຕະຫຼົກກັບຈັງຫວະນີ້ໄປແລ້ວ ມັນເກີດຄວາມເຂົ້າໃຈຜິດກັນ ປາເລັດຕາ ຖືກບີບ ແລະ ດອນນາຣຸມມາ ກໍໄປຢືນຢູ່ໃນຈຸດທີ່ຖືກຕ້ອງແລ້ວແຕ່ເຂົາພຽງກະຈັງຫວະບານພາດເທົ່ານັ້ນ” ມອນເຕວລາ ລະບຸ.