ຟິວຂາດຫວາ??ໂດ້ແກວ່ງກຳປັ້ນໃສ່ໂກເກ

 

ຄຣິສຕຽນໂນ ໂຣເນົາໂດ ປີກຊູເປີສະຕາຂອງ ເຣອັນ ມາດຮິດ ເບິ່ງຄືວ່າຈະຕັ້ງໃຈທີ່ຈະຊົກ ໂກເກ ມິດຟິວຂອງ ແອັດ ມາດຣິດ ໃນເກມທີ່ຕົ້ນສັງກັດຂອງທັງສອງຄົນພົບກັນ ຍັງດີທີ່ມັນບໍ່ຖືກໂຕອີກຝ່າຍຈົນເຮັດໃຫ້ບໍ່ມີເຫດການຮຸນແຮງຫຼາຍພໍເທົ່າໃດ.

 

ຄຣິສຕຽນໂນ ໂຣເນົາໂດ ປີກດາວດັງຂອງ ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນຄືຈະຕັ້ງໃຈຕີ ໂກເກ ກອງກາງຂອງ ແອັດເລຕິໂກ ມາດຣິດ ໃນເກມລີກນັດດາບີເມືອງມາດຣິດທີ່ “ລາຊາຊຸດຂາວ” ບຸກໄປຊະນະ 3-0 ທີ່ສະໜາມ ບິເຊັນເຕ ກັນເດຣອນ ເມື່ອວັນເສົາທີ່ຜ່ານມາ.

 

ຈັງຫວະດັ່ງກ່າວເກີດຂຶ້ນໃນນາທີ 62 ແລະ ເປັນຕອນທີ່ທີມຢາມນຳຢູ່ 1-0 ໂດຍໃນຕອນທຳອິດນັ້ນ ໂຣເນົາໂດ ພະຍາຍາມຈະໂດດໂໝ່ງບານທີ່ ແກເຣັດ ເບວ ໂໝ່ງມາໃຫ້ເຂົາແຕ່ຖືກ ໂກເກ ເຂົ້າມາຂວາງຈົນເຮັດໃຫ້ “ກາໝີ” ສາມາດສະກັດບານອອກໄປໄດ້.

 

ທັງນີ້ ໂຣເນົາໂດ ບໍ່ພໍໃຈຢ່າງຍິ່ງກັບຈັງຫວະນີ້ຈົນໝູນຕົວ ແລະ ເບິ່ງຄືວ່າພະຍາຍາມຈະແກວ່ງກຳປັ້ນໃສ່ ໂກເກ ຍັງດີທີ່ບໍ່ຖືກອີກຝ່າຍກ່ອນທີ່ຫຼັງຈາກນັ້ນທັງສອງຈະມາປະເຊີນໜ້າກັນ ແລະ ໄດ້ຮັບໃບເຫຼືອງໄປຄົນລະໃບ.