ຟານກາວ ດີໃຈທີ່ ເປັບ ຈະມາຄຸມ ເຮືອ

 

ຫຼຸຍ ຟານກາວ ນາຍໃຫຍ່ ແມນເຊສເຕີ ຢູໄນເຕັດ ຮັບຍິນດີກາບ ໂຈເຊບ ກວາດິໂອລາ ນາຍໃຫຍ່ ບາເຢິນ ມິວນິກ ທີ່ຈະມາເປັນນາຍໃໝ່ຂອງ ແມນເຊສເຕີ ຊີຕີ ໃນລະດູການໜ້າ ຫຼັງຈາກເຄີຍມີອະດີດຜູກພັນກັນແບບເຈົ້ານາຍລູກນ້ອງທີ່ ບາເຊໂລນາ.

 

ຫຼຸຍ ຟານກາວ ຜູ້ຈັດການທີມ ແມນເຊສເຕີ ຢູໄນເຕັດ ສະໂມສອນດັງຈາກ ພຣີເມຍລີກ ອັງກິດ ອອກມາກ່າວຕ້ອນຮັບ ແລະ ຮ່ວມສະແດງຄວາມຍິນດີກັບ ເປັບ ກວາດິໂອລາ ນາຍໃຫຍ່ ບາເຢິນ ມິວນິກ ມະຫາອຳນາດລູກໜັງ ບຸນເດສລີກາ ເຢຍລະມັນ ທີ່ໄດ້ຮັບກການແຕ່ງຕັ້ງເປັນນາຍໃຫຍ່ຄົນໃໝ່ຂອງ ແມນເຊສເຕີ ຊີຕີ ດ້ວຍສັນຍາໄລຍະເວລາ 3 ປີ ເມື່ອວັນຈັນທີ່ຜ່ານມາ.

 

ຟານກາວ ກັບ ກວາດິໂອລາ ເຄີຍຮ່ວມງານຕອນຢູ່ທີ່ ບາເຊໂລນາ ມາແລ້ວ ແລະ ເປັບ ກໍເຄີຍເປັນກັບຕັນທີມຂອງນາຍໃຫຍ່ຊາວດັດກ່ອນທີ່ນາຍໃຫຍ່ສະເປນຈະໄປຮັບງານຜູ້ຈັດການ ແລະ ພາ ບາເຊໂລນາ ກັບ ບາເຢິນ ກວາດແຊມມາແລ້ວນັບບໍ່ຖ້ວນ.

 

ປ້າຍຕໍ່ໄປຂອງ ເປັບ ຄື ເອຕິຮັດ ສະເຕດຽມ ເມື່ອ ເຮືອໃບສີຟ້າ ແມນເຊສເຕີ ຊີຕີ ປະກາດຢືນຢັນຈະແຕ່ງຕັ້ງອະດີດຫ້ອງເຄື່ອງທີມຊາດ ສະເປນ ມາຄຸມບັງຫຽນຕໍ່ຈາກ ມານູເອວ ເປເຢກີນີ ທີ່ຈະອຳລາທີມຈົບລະດູການນີ້ ແລະ ເປັນຄູ່ແຂ່ງຂອງ ຟານກາວ ໂດຍກົງໃນລະດູການໜ້າ ລ່າສຸດ ຟານກາວ ເຜີຍວ່າຕົນເອງມີຄວາມສຸກທີ່ຈະໄດ້ເຫັນ ເປັບ ຄຸມທີມ ຊີຕີ.

 

ເຂົາເປັນອະດີດກັບຕັນທີມຂອງຂ້ອຍ ຂ້ອຍດີໃຈທີ່ຈະໄດ້ພົບເຂົາ ຂ້ອຍສາມາດເວົ້າພາສາສະເປນໄດ້ ເພາະສະນັ້ນ ມັນເປັນເລື່ອງງ່າຍສຳລັບຂ້ອຍ!! ອະດີດນາຍໃຫຍ່ທີມຊາດຮອນແລນກ່າວ.