ພໍ່ເຜີຍ!!ຊາເນອາດຈະຢູ່ເສືອໃຕ້-ລາຊາຊຸດຂາວຫຼາຍກວ່າເຮືອໃບ

 

ພໍ່ເຜີຍ ເລີຣອຍ ຊາເນ ກອງກາງຕົວເກັ່ງຂອງ ຊາວເກ 04 ອາດຈະຍ້າຍໄປ ບາເຢິນ ມິວນິກ ຫຼື ເຣອັນ ມາດຣິດ ຫຼາຍກວ່າ ແມນເຊສເຕີ ຊີຕີ ໃນຊຳເມີນີ້ ຫຼັງມີຂ່າວລືນັກເຕະຕົກລົງສັນຍາກັບ “ເຮືອໃບສີຟ້າ” ແລ້ວ.

 

ເລີຣອຍ ຊາເນ ມິດຟິວໂຕເກັ່ງຂອງ ຊາວເກ 04 ສະໂມສອນດັງຂອງ ບຸນເດສລີກາ ອາດຈະຕັດສິນໃຈຍ້າຍໄປຢູ່ກັບ ບາເຢິນ ມິວນິກ ຫຼື ເຣອັນ ມາດຣິດ ທີມດັງຈາກສະເປນຫຼາຍກວ່າທີ່ຈະເປັນ ແມນເຊສເຕີ ຊີຕີ ສະໂມສອນມະຫາເສດຖີຂອງອັງກິດຈາກການເປີດເຜີຍຂອງ ຊູເລມາເນ ຊາເນ ພໍ່ຂອງນັກເຕະເມື່ອວັນພຸດທີ່ຜ່ານມາ.

 

ແມນ ຊີຕີ ຕົກເປັນຂ່າວວ່າເປັນຕົວເຕັງທີ່ຈະໄດ້ນັກເຕະ ແລະ ມີລາຍງານວ່ານັກເຕະດາວລຸ້ງໄດ້ຕົກລົງສັນຍາໄລຍະເວລາ 4 ປີກັບພວກເຂົາແລ້ວຢ່າງໃດກໍຕາມ ຫຼ້າສຸດພໍ່ຂອງນັກເຕະໄດ້ອອກມາອ້າງວ່າການຕົກລົງຍັງບໍ່ມີຂຶ້ນ ແລະ ລູກຊາຍອາດຈະໄປຟາດແຄ່ງໃນຖິ່ນ ຊານດິເອໂກ ເບີນາເບວ ຫຼື ເອົາຣີອັນ ອາຣີນາ ໃນລະດູການໜ້າຫຼາຍກວ່າ.

 

“ການຕົກລົງຍັງບໍ່ມີຂຶ້ນກັບໃຜເທື່ອ ແລະ ທັງ ມາດຣິດ ກັບ ບາເຢິນ ກໍຍັງມີໂອກາດ” ພໍ່ຂອງ ຊາເນ ກ່າວ.

 

ສຳລັບ ຊາເນ ເຮັດຜົນງານໄດ້ໜ້າປະທັບໃຈກັບ ຊາວເກ ໂດຍການຍິງ 8 ປະຕູຈາກ 33 ນັດໃນ ບຸນເດສລີກາ ລະດູການທີ່ຜ່ານມາຈົນມີຊື່ຕິດທີມຊາດ “ອິນຊີເຫຼັກ” ຊຸດ ຢູໂຣ 2016.

 

 

ບົດຄວາມໃຫມ່ໆ