ພົບເບາະແສກ່ຽວກັບ MH 370 ທີ່ຕົກມາດົນເຖິງ 17ເດືອນ

ນາຍົກ​ລັດຖະມົນ​ຕີ ນາ​ຈິບ ລາ​ຊັດ ​ແຫ່ງມາ​ເລ​ເຊຍ ຖະ​ແຫລ​ງການ​ວ່າ: ວັນນີ້ 515 ວັນ ນັບ​ຕັ້ງ​ແຕ່​ຍົນ​ລຳ​ນີ້​ຫາຍ​ໄປ ​ແລ​ະ ທິມຜູ້​ຊ່ຽວຊານນາໆ​ຊາດ​​​ໃນ​ເມືອງ ຕູ​ລູດ ຂອງ ຝຣັ່ງ ໄດ້​ກຳລັງ​​ເຮັດ​ການ​ຕວດ​ສອບ​ຊາກ​ຍົນ​ສ່ວນ​ປີກ​ຍົນຂອງ ​ໂບອິ້ງ 777 ທີ່​ພົບ​ເທີິງ​ເກາະ ​ເຮ​ອູ​ນິຍົງ ​​ໃນ​ມະຫາ​ສະຫມຸດ​ອິນ​ເດຍຕອນ​ໃຕ້ ​​ເມື່ອ​ອາທິດ​ກ່ອນໄດ້​ສະຫລຸບ​ວ່າ: ຊີ້ນ​ສ່ວນ​ນີ້​ມາ​ຈາກ​ທ້ຽວບິນ MH 370 ຂອງ​ສາຍ​ການບິນ​ມາ​ເລ​ເຊຍ ​ແອ​ລາຍ ທີ່​ຫາຍ​ສາບ​ສູນ​ໄປ​ເມື່ອ ວັນ​ທີ 8/3/2014 ​ເພື່​ອຜູ້​ໂດຍສານ ​ແລະ ລູກ​ເຮື​ອ 239 ຄົນ.

ທັງ​ນີ້ ​ໂບອິ້ງ 777-200 ທ້ຽວບິນ​ທີ່ MH 370 ພ້ອມ​ຜູ້​ໂດຍສານ ​ແລະ ລູກ​ເຮືອ 239 ຄົນ ຫາຍ​ຈາກ​ຈໍເຣດ້າ​ໃນ​ທະ​ເລ​ຈີນ​ໃຕ້​ຂະນະ​ເດີນທາງ​ຈາກ​ເມືອງ ກົວ​ລາ​ລຳ​ເປີ ຂອງ​ມາ​ເລ​ເຊ​ຍ ​ໄປ​ຫາເມືອງ ປັກ​ກິ່ງ ປະ​ເທດ​ຈີນ ​ເມື່ອ​ວັນ​ທີ່ 8/32014 ​ໂດຍ​ຈາກ​ຫລັກ​ຖານ​ທີ່​ພົບ​ຈາກ​ຕອນ​ນີ້​ເຮັດ​ໃຫ້​ເຈົ້າ​ຫນ້າ​ທີ່​ເຊື່ອ​ວ່າ ຍົນ​ລຳ​ນີ້​ບິນ​ວົນ​ກັບ​ມາ​ທາງ​ບໍລິ​ເວນ​ຊ່ອງ​ແຄບ​ມາ​ລະກາ ​ແລະ ບິນ​ລົງ​ໄປ​ຕອນ​ໄຕ້ຂອງ​ມະຫາ​ສະຫມຸດ​ອິນ​ເດຍຈົນນ້ຳມັນ​ຫມົດ ​ແລະ ຕົກລົງ​ສູ່​ທະ​ເລ​ຕາ​ເວັນ​ຕົກສຽງ​ໃຕ້​ຂອງ​ປະ​ເທ​ດ ອອດ​ສະ​ເຕຼ​ເລຍ ​ແຕ່​ບໍ່​ພົບ​ຂ່າວ​ຫລືຊາກ​ຍົກ​ແມ້​ແຕ່​ຢ່າງ​ດຽວ.

ຈົນ​ມາ​ຮອດ​ວັນ​ພຸດ ທີ29 ກໍ​ລະ​ກົ​ດ ທີ່​ຜ່ານ​ມາ ​ເຈົ້າ​ຫນ້າ​ທີ່​ກອງທັບ​ທາງ​ອາກາດ​ຂອງ ຝຣັ່ງ​ເທິງ​ເກາ​ະ ​ເຮ​ອູ​ນິຍົງ ດິນ​ແດນ​ພົ້ນທະ​ເລ​ຂອງ ຝຣັ່ງ ​ເປິ​ດ​ເຜີຍ​ວ່າ: ມີ​ການ​ພົບ​ຊາກ​ຍົນ​ປິດສະຫນາ​ທີ່​ຄາດ​ວ່າ​ເປັນ​ຊີ້ນ​ສ່ວນ ​ແຟຣບ​ເພີຣອນ (Flaperon) ສ່ວນປີກ ເຊິ່ງເຮັດຫນ້າທີ່ເພີ່ມແຮງໃຫ້ກັບປີກໃນກໍລະນີທີຄວາມໄວຫລຸດລົງ ແລະ ເຮັດໃຫ້ມີຄວາມຫວັງຫວັງວ່າອາດຈະເປັນເສດຊີ້ນສ່ວນຂອງ MH 370​.

 

​ທ່ານ ​ເຊີ​ເຊີ້ ມາ​ໂກວິ​ຍາດ ຮອງ​ໄອ​ຍາ​ການ ຝຣັ່ງ ກ່າວ​ວ່າ: ຜົນ​ລັບ​ຈາກ​ການ​ທົດ​ສອບ​ເບື້ອ​ງຕົ້ນນີ້​ເປັນ​ຂໍ້​ບົ່ງ​ບອກ​ສຳຄັນວ່າ ​ແຟຣບ​ເພີຣອນ (Flaperon) ຊີ້ນ​ສ່ວນ​ນີ້ ມາ​ຈາກ MH 370 ​ແລະ ຈະ​ມີ​ການ​ຢືນຢັນ​ຢ່າງ​ເປັນ​ທາງ​ການ​ຕາມ​ມາ ຫລັງ​ມີ​ການ​ທົດ​ສອບ​ເພີ່ມ​ເຕີມ​ຄາດ​ວ່າ​ຈະ​​ເລີ່​ມຕົ້ນ​ໃນ​ໄວໆ​ນີ້.

...................................................................................................................................................................................................

ຮຽບຮຽງ​ໂດຍ​: ທຳ​ມະ​ຈັກ

 

ບົດຄວາມໃຫມ່ໆ