ພົນລະເມືອງດີແຈ້ງ! ເຈົ້າໜ້າທີ່ຢຶດຢາບ້າໄດ້ກວ່າ 4 ລ້ານເມັດ

ທີມເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ເຂົ້າກວດຄົ້ນລົດກະບະວີໂກ້ສີຂາວຕ້ອງສົງໃສ ຫຼັງໄດ້ຮັບໂທລະສັບແຈ້ງຂ່າວຈາກພົນລະເມືອງດີ ພົບຢາບ້າ 4.300.000ເມັດ ຢຶດໄວ້ເປັນຂອງກາງ ສ່ວນກຸ່ມຄົນຂົນຢາລົບໜີໄປໄດ້.

ໃນເມື່ອເວລາປະມານ 21:30 ນາທີ, ຂອງວັນທີ 04 ຕຸລາ 2018ທີ່ຜ່ານມາ ເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ເມືອງຕົ້ນເຜິ້ງ, ແຂວງບໍ່ແກ້ວ ໄດ້ຮັບໂທລະສັບຈາກພົນລະເມືອງດີ ວ່າມີລົດວີໂກ້ສີຂາວ ໄດ້ແລ່ນເຂົ້າໄປທາງແຄມຂອງເຂດເໜືອບ້ານໃຫຍ່ສີເມືອງງາມ ທ່າທາງຜິດປົກກະຕິ; ເມື່ອໄດ້ຮັບລາຍງານທາງເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມ ຈຶ່ງໄດ້ປະສານສົມທົບກັບທະຫານເມືອງຕົ້ນເຜິ້ງ ພ້ອມກັນລົງໄປກວດກາຈຸດດັ່ງກ່າວ ແລະ ປະກົດເຫັນກຸ່ມຄົນເພດຊາຍ ປະມານ 7-8 ຄົນ ກໍາລັງຂົນເປົາເຄື່ອງອອກຈາກເຮືອທີ່ບັນຈຸມາສົ່ງໃຫ້ ຂື້ນໃສ່ທ້າຍກະບະລົດວີໂກ້ສີຂາວ ໝາຍເລກທະບຽນ ກໍາແພງນະຄອນ ກຈ 2511. ດັ່ງນັ້ນ, ທາງເຈົ້າໜ້າທີ່ຈຶ່ງໄດ້ຊ່ອງໄຟສາຍໃສ່ ພ້ອມທັງເອີ້ນຖາມວ່າ “ຂົນເຄື່ອງຫຍັງ?” ເມື່ອກຸ່ມຄົນດັ່ງກ່າວເຫັນເຈົ້າໜ້າທີ່ ຈິ່ງໄດ້ພາກັນແລ່ນລົບໜີເຂົ້າໄປໃນປ່າແຄມຂອງ ທາງເຈົ້າໜ້າທີ່ຈຶ່ງໄດ້ຍິງປືນນາບຄູ່ປະມານ 7-8 ນັດ ເພື່ອໃຫ້ກຸ່ມຄົນດັ່ງກ່າວຢຸດໜີແຕ່ກຸ່ມຄົນດັ່ງກ່າວແມ່ນລົບໜີໄປໄດ້.

ຫລັງຈາກການເຂົ້າກວດສອບຂອງເຈົ້າໜ້າທີ່ໄດ້ພົບເຫັນເປົາກະສອບຈໍານວນ 38 ເປົາທີ່ບັນຈຸສີ່ງເສບຕິດປະເພດຢາບ້າໄວ້. ທາງເຈົ້າໜ້າທີ່ ປກສ ກຸ່ມບ້ານໃຫຍ່ສີເມືອງງາມຈຶ່ງໄດ້ລາຍງານໃຫ້ທາງ ປກສ ເມືອງຕົ້ນເຜິ້ງຮັບຊາບ ແລະ ແຕ່ງຕັ້ງເຈົ້າ ໜ້າທີ່ລົງມາສົມທົບກັນກວດກາສະຖານທີ່ເກີດເຫດ ແລະ ຂອບເຂດບໍລິເວນປ່າອ້ອມຂ້າງ ພົບເຫັນເປົາຢາບ້າຊຸກເຊື່ອງໄວ້ໃນປ່າອີກ ຈໍານວນ 05 ເປົາ, ລວມຢາບ້າທີ່ຄົ້ນໄດ້ທັງ 2 ຈຸດ ມີ 43 ເປົາ ແລະ ແຕ່ລະເປົາບັນຈຸຢາບ້າໄວ້ເປົາລະ 50 ມັດ ລວມມີ 2.150 ມັດ ນັບເປັນຈຳນວນເມັດມີ 4.300.000 ເມັດ, ທາງເຈົ້າໜ້າທີ່ຈິ່ງໄດ້ຢຶດຂອງກາງຢາຈຳນວນດັ່ງກ່າວໄວ້ ພ້ອມດ້ວຍລົດກະບະວີໂກ້ ແລະ ເຮືອອີກ 1 ລຳ ເພື່ອເປັນຫຼັກຖານ

ແຫຼ່ງຂໍ້ມູນ: ຂ່າວສານປະເທດລາວ
ແຫຼ່ງຂ່າວ: ຮທ ນາຊູ ອິນທະບັນດິດ
ຮູບປະກອບ: ຮທ ວິທູນ ແກ້ວກັນຍາ