ພິທີສະຫຼອງວັນຊາດ 2 ທັນວາ ຄົບຮອບ 40 ປີ ແລະ ວັນເກີດປະທານໄກສອນພົມວິຫານ ຄົບຮອບ 95 ປີ

ຕອນເຊົ້າວັນທີ 13 ທັນວານີ້, ອຳນາດການປົກຄອງແຂວງຫົວພັນ ໄດ້ຈັດພິທີໂຮມຊຸມນຸມໃຫຍ່ ເພື່ອສະຫຼອງວັນຊາດທີ 2 ທັນວາ ຄົບຮອບ 40 ປີ ແລະ ວັນເກີດປະທານໄກສອນ ພົມວິຫານ ຄົບຮອບ 95 ປີ ຢູ່ອານຸສອນສະຖານໄກສອນ ພົມວິຫານ ເມືອງວຽງໄຊ ແຂວງຫົວພັນ. ເປັນກຽດເຂົ້າຮ່ວມມີທ່ານ ທອງສິງ ທຳມະວົງ ນາຍົກລັດຖະມົນຕີ ພ້ອມດ້ວຍລັດຖະມົນຕີວ່າການ, ລັດຖະມົນຕີຊ່ວຍວ່າການ, ພະນັກງານປະຕິວັດອາວຸໂສ, ມວນຊົນຊາວເມືອງວຽງໄຊ ພ້ອມດ້ວຍຂະບວນຄາລາວານ 1 ພັນກວ່າຄົນເຂົ້າຮ່ວມ.
ໃນໂອກາດນີ້, ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ກ່າວປາໃສຕໍ່ການໂຮມຊຸມນຸມຄັ້ງນີ້ວ່າ: ພວກເຮົາໄດ້ພ້ອມກັນຈັດຕັ້ງພິທີໂຮມຊຸມນຸມ ເພື່ອລະນຶກວັນເກີດທ່ານປະທານໄກສອນ ພົມວິຫານ ຄົບຮອບ 95 ປີ ຜູ້ນຳທີ່ແສນເຄົາລົບຮັກຂອງປວງຊົນລາວທັງຊາດ, ແຂວງຫົວພັນດິນແດນວິລະຊົນ ຖິ່ນກຳເນີດຂອງການປະຕິວັດບ່ອນທີ່ປະທານໄກສອນ ພົມວິຫານ ນຳພາສ້າງຕັ້ງກອງທັບປະຕິວັດຂອງປະຊາຊົນ ແລະ ພັກປະຊາຊົນປະຕິວັດລາວທີ່ມີກຽດສະຫງ່າ. ປະຈຸບັນ, ພວກເຮົາພວມກະກຽມຄວາມພ້ອມຕ່າງໆເພື່ອກອງປະຊຸມໃຫຍ່ຄັ້ງທີ X ຂອງພັກ. ພວກເຮົາຈື່ງຄິດຄະນຶງຫາປະທານໄກສອນ ພົມວິຫານ ຜູ້ທີ່ໄດ້ອຸທິດສະຕິປັນຍາ ແລະ ເຫື່ອແຮງຕະຫຼອດຊີວິດຂອງເພິ່ນ ເພື່ອຄວາມເປັນເອກະລາດ ອິດສະຫຼະພາບແລະຄວາມຮັ່ງມີຜາສຸກມາໃຫ້ປະຊາຊົນລາວບັນດາເຜົ່າ.
ທ່ານຍັງກ່າວຕື່ມອີກວ່າ: ປະຊາຊົນລາວບັນດາເຜົ່າຕ້ອງສືບຕໍ່ພາລະກິດທີ່ເພິ່ນໄດ້ປະໄວ້ໃຫ້ພວກເຮົາ ເພື່ອສືບຕໍ່ເຈດຕະນາລົມຂອງເພິ່ນໃຫ້ປະກົດຜົນເປັນຈິງ ພວກເຮົາຕ້ອງສືບທອດແນວຄິດຂອງປະທານໄກສອນ ພົມວິຫານ ເພື່ອເປັນເຂັມທິດຊີ້ນຳການປະຕິວັດໃນໄລຍະໃໝ່ຂອງຊາດລາວ ການນຳ, ພະນັກງານສະມາຊິກທຸກຄົນ ຈົ່ງປະກອບສ່ວນຮັບພິຊອບສູງເຂົ້າໃຫ້ການກະກຽມກອງປະຊຸມໃຫຍ່ຄັ້ງນີ້, ເປັນຕົ້ນ, ສຸມໃສ່ຜັນຂະຫຍາຍຜົນສຳເລັດຂອງກອງປະຊຸມໃຫຍ່ຂອງຕົນ ໂດຍເຂົ້າສູ່ຊີວິດຕົວຈິງ ພ້ອມທັງເສີມຂະຫຍາຍຈຸດດີຢ່າງຕັ້ງໜ້າ ແລະ ແກ້ໄຂຈຸດບົກຜ່ອງຂໍ້ຄົງຄ້າງຕ່າງໆໃຫ້ໝົດໄປເປັນກ້າວໆ, ດັດແປງແກ້ໄຂວິທີນຳພາໃຫ້ມີປະສິດທິຜົນສູງຂື້ນກວ່າເກົ່າ ເຊີດຊູອິດທິພົນຂອງພັກໃຫ້ສູງເດັ່ນຂື້ນ ປັບປຸງ ແລະ ເພີ່ມທະວີຄວາມເຊື່ອໝັ້ນຂອງປະຊາຊົນບັນດາເຜົ່າຕໍ່ພັກຂື້ນຕື່ມອີກ. ຫຼັງຈາກນັ້ນ, ຄະນະຜູ້ແທນ ພ້ອມດ້ວຍຂະບວນຄາລາວານ ໄດ້ເດີນທາງໄປສະຖານທີ່ທ່ອງທ່ຽວບັນດາຖໍ້າທ່ານຜູ້ນຳ ແລະ ໄດ້ເຂົ້າຮ່ວມພິທີເປີດງານວາງສະແດງຮູບພາບຢູ່ຖໍ້າຊ້າງລອດ ດ້ວຍບັນຍາກາດຝົດຟື້ນ.