ພິທີມອບລາງວັນ ວັນນະກໍາແມ່ນໍ້າຂອງຄັ້ງທີ່ VIຈັດຂື້ນຢູ່ ສປປ ລາວ

ໃນວັນທີ 9 ທັນວາ 2015, ທີ່ ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໄດ້ມີການມອບລາງວັນວັນນະກຳ ແມ່ນໍ້າຂອງ ຄັ້ງທີ VI ຈາກ 6 ປະເທດ (ກໍາປູເຈຍ, ສປ ຈີນ, ສປປ ລາວ,ມຽນມາ,ໄທ ແລະ ຫວຽດນາມ) ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ ໃຫ້ຮູ້ວ່າ: ຜ່ານມາກອງປະຊຸມນັກປະພັນໃນພາກພື້ນນີ້, ໄດ້ຮັບການຈັດຕັ້ງຂື້ນມາແລ້ວ 5ຄັ້ງ , ໄດ້ມີບົດປະພັນຮັບລາງວັນ ວັນນະກໍາ ຊຶ່ງມາຈາກຫລາຍປະເທດສະມາຊິກ ຈໍານວນຫລາຍສິບບົດ,ການສໍາມະນາວິຊາການປະພັນແລະມອບລາງວັນ ວັນນະກໍາປະຈໍາປີແມ່ນບັນດາປະເທດລຸ່ມແມ່ນໍ້າຂອງ ໄດ້ໝູນວຽນຜຽນເປັນເຈົ້າພາບ , ແລະປີນີ້ກໍ່ແມ່ນໄດ້ຈັດຂື້ນທີ່ປະເທດລາວ , ໂດຍນັກປະພັນແຕ່ລະປະເທດທີ່ເຂົ້າຮ່ວມກອງປະຊຸມຄັ້ງນີ້ຫວັງຢ່າງຍິງຄົງຈະເພີ່ມທະວີຄູນຄວາມສຳພັນຂອງ 6 ປະເທດ ໃຫ້ມີຄວາມສຳພັນຫລາຍຂື້ນກວ່າເກົ່າ , ຮ່ວມປະດິດຄິດສ້າງວິທີທາງໃໝ່ ເພື່ອປະກອບສ່ວນຂຸກຍູ້ສົ່ງເສີມ ການປະພັນວັນນະກໍາ ແລະການເຜີຍແຜ່ຜົນການປະພັນທີ່ມີຄຸນຄ່າເສີມສ້າງ ມິດຕະພາບ ແລະ ຮ່ວມມືພັດທະນາບັນດາປະເທດໃນພາກພື້ນລ້ອງແມ່ນໍ້າຂອງ ຕາມຈຸດມຸ້ງໝາຍລາງວັນວັນນະກໍາແມ່ນໍ້າຂອງທີ່ຕັ້ງເອົາໄວ້ ສໍາລັບລາຍຊື່ນັກປະພັນວັນນະກໍາ 6 ປະເທດທີ່ໄດ້ຮັບລາງວັນມີດັ່ງລຸ່ມນີ້:

- ຜູ້ທີ່ໄດ້ຮັບລາງວັນຈາກປະເທດກໍາປູເຈຍມີ 
ທ່ານ ອຸນ ສົກ ແຮງ 
ທ່ານ ນ ອຸກ ສໍານາງ

- ຈາກ ສປ ຈີນ ມີ 
ທ່ານ ຮວງ ຢາວ
ທ່ານ ຢັງ ຮົງກຸນ

- ຈາກ ສປປ ລາວ ມີ
ພຣະ ໄພວັນ ມາລາວົງ 
ທ່ານ ຈັນທະພອນ ວັນນະຈິດ
ທ່ານ ຄຳແພງ ອອນສາ

- ຈາກ ປະເທດ ມຽນມາ ມີ
ທ່ານ ຊເວ ມິງ

- ຈາກປະເທດ ໄທ ມີ
ທ່ານ ກິດຕິສັກ ມີສົມສືບ
ທ່ານ ສາຄອນ ພູນສຸກ

- ແລະຜູ້ທີ່ໄດ້ຮັບລາງວັນຈາກ ສສ ຫວຽດນາມ ມີ
ທ່ານ ຫວຽນ ງອກ ມອກ 
ທ່ານ ກາວ ຊວນ ໄທ.