ພິທີການເປີດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ຂອງ ລັດຖະມົນຕີຕ່າງປະເທດອາຊຽນ

ຂປລ. ໃນຕອນເຊົ້າວັນທີ 24 ກໍລະກົດ 2016 ພິທີເປີດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ໄດ້ຈັດຂຶ້ນທີ່ໂຮງແຮມດອນຈັນພາເລັດ ໂດຍການເຂົ້າຮ່ວມ ຂອງ ລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາຊຽນ, ພັນລະຍາຂອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ, ຄະນະຜູ້ແທນ. ນອກຈາກນີ້ ລັດຖະມົນຕີຕ່າງປະເທດຂອງຕີມໍເລດສະເຕ, ປາປົວນິວກີນີ ແລະ ນອກແວ ກໍໄດ້ເຂົ້າຮ່ວມໃນນາມແຂກຂອງ ສປປ ລາວ ທີ່ເປັນປະທານອາຊຽນ.

ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນນາມປະທານກອງປະຊຸມລັດຖະມົນຕີຕ່າງປະເທດອາຊຽນ ໄດ້ກ່າວຕ້ອນຮັບ ບັນດາລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ອາຊຽນ ແລະ ບັນດາຄະນະຜູ້ແທນ ເພື່ອເຂົ້າຮ່ວມກອງປະຊຸມລັດຖະມົນາຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມອື່ນໆທີ່ກ່ຽວຂ້ອງ; ໃນໂອກາດນີ້ ທ່ານ ສະເຫລີມໄຊ ກົມມະສິດ ໄດ້ສະແດງຄວາມຂອບໃຈບັນດາປະເທດອາຊຽນ, ຄູເຈລະຈາອາຊຽນ, ປະເທດເພື່ອນມິດ ແລະ ອົງການຈັດຕັ້ງພາກພື້ນ ແລະ ສາກົນ ທີ່ໄດ້ໃຫ້ການຮ່ວມມື ແລະ ຊ່ວຍເຫລືອ ສປປ ລາວ ໃນການເປັນປະທານອາຊຽນ ພາຍໃຕ້ຄຳຂວັນ “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະ ຊາຄົມອາຊຽນ” ແລະ ຜົນສຳເລັດຂອງບັນດາກອງປະຊຸມຄັ້ງນີ້ ຈະເປັນການກະກຽມອັນດີໃຫ້ແກ່ກອງປະ ຊຸມສຸດຍອດອາຊຽນຄັ້ງທີ 28 ແລະ 29 ທີ່ຈະຈັດຂຶ້ນໃນເດືອນກັນຍາ 2016 ທີ່ນະຄອນຫລວງວຽງຈັນ.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ໃຫ້ກຽດກ່າວເປີດກອງປະຊຸມ ເຊິ່ງທ່ານໄດ້ຍົກໃຫ້ເຫັນຄວາມສຳເລັດ ຂອງ ອາຊຽນ ໃນໄລຍະ 49 ປີຜ່ານມາ ໂດຍສະເພາະການປະກາດສ້າງຕັ້ງເປັນປະຊາຄົມອາຊຽນ ໃນວັນທີ 31 ທັນວາ 2015 ແລະ ເນັ້ນເຖິງຄວາມສຳຄັນ ໃນການສືບຕໍ່ຮັດແໜ້ນ ການຮ່ວມມື ກັນພາຍໃນອາຊຽນ ແລະ ລະຫວ່າງອາຊຽນ ກັບຄູ່ຮ່ວມມືພາຍນອກ ເພື່ອສົ່ງເສີມ ແລະ ຮັດແໜ້ນປະຊາຄົມອາຊຽນ ໃຫ້ເຂັ້ມແຂງ ແລະ ຈະເລີນກ້າວໜ້າ.

ພາຍຫລັງພິທີເປີດ ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49, ທ່ານ ສະເຫລີມໄຊ ກົມມະສິດ ກໍໄດ້ນຳພາລັດຖະມົນຕີຕ່າງປະເທດອາຊຽນ ເຂົ້າຢ້ຽມຂໍ່ານັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໃນໂອກາດນີ້, ທ່ານ ໄດ້ຕີລາຄາສູງຕໍ່ບົດບາດສຳຄັນ ຂອງກອງປະຊຸມລັດຖະມົນຕີຕ່າງປະເທດອາຊຽນ ໄດ້ຮັບ ການສ້າງຕັ້ງຂຶ້ນ ໃນປີ 1967 ປະກອບສ່ວນເຂົ້າໃນການຊຸກຍູ້ ແລະ ສົ່ງເສີມການຮ່ວມມືຂອງອາຊຽນ ໃນຂົງເຂດຕ່າງໆກໍຄື ການຮ່ວມມືກັບຄູ່ເຈລະຈາຂອງອາຊຽນ ແລະ ຄູ່ຮ່ວມມືພາຍນອກອື່ນໆ ພາຍໃຕ້ກົນໄກທີ່ອາຊຽນ ເປັນຜູ້ລິເລີ່ມຂຶ້ນ.

 

======================

ພາບແລະຂ່າວ: Pathedlao Lao

ບົດຄວາມໃຫມ່ໆ