ພາຍຸທະເລຊາຍເຮັດໃຫ້ອາກາດໃນປັກກິ່ງ ເຖິງລະດັບອັນຕະລາຍ

ພາຍຸທະເລຊາຍເຮັດໃຫ້ອາກາດໃນປັກກິ່ງ ເຖິງລະດັບອັນຕະລາຍ

ຂ່າວຕ່າງປະເທດລາຍງານ ໃນວັນທີ 28 ມີນາ ທີ່ຜ່ານມາ ວ່າ: ດັດຊະນີຄຸນນະພາບອາກາດ ນະຄອນຫຼວງປັກກິ່ງ ສູງເຖິງລະດັບອັນຕະລາຍແລ້ວ ເນື່ອງຈາກພາຍຸທະເລຊາຍທີ່ພັດມາຈາກເຂດມົງໂກລີ ພັດພາຝຸ່ນປົກຄຸມທົ່ວເມືອງຫຼວງ ແລະ ຫຼາຍພື້ນທີ່ທາງພາກເໜືອຂອງປະເທດ.

ສູນອຸຕຸນິຍົມິວິທະຍາແຫ່ງຊາດຂອງຈີນ ແຈ້ງເຕືອນໄພພາຍຸທະເລຊາຍລະດັບສີຟ້າ ຕັ້ງແຕ່ວັນທີ 27 ມີນາ ຈົນເຖິງເວລາ 19:00 ໂມງ ຂອງວັນທີ 28 ມີນາ ເຊິ່ງເປັນລະດັບຕ່ຳສຸດຈາກທັງໝົດສີ່ລະດັບ ຂໍໃຫ້ປະຊາຊົນທາງພາກເໜືອປິດປະຕູ ແລະ ປ່ອງຢ້ຽມ, ໃສ່ໜ້າກາກກັນຝຸ່ນ, ໃຊ້ຜ້າຄຸມຫົວ ແລະ ຂັບລົດຊ້າໆ ເພາະທັດສະນະວິໃສໃນການເບິ່ງເຫັນຕ່ຳ ໂດຍໃນເວລາ 13:00 ໂມງ. ຝຸ່ນຊາຍຟົ້ງຄວບຄຸມພື້ນທີ່ລວມ 1,5 ລ້ານຕາລາງກິໂລແມັດ ປະກອບດ້ວຍເມືອງໃຫຍ່ຫຼາຍເມືອງ ເຊັ່ນ: ປັກກິ່ງ, ທຽນຈິນ, ເຮີເປຍ, ຊານຊີ, ຈີຫຼິນ, ຫຼຽວໜິງ, ເຫີຍຫຼົງຈຽງ, ເຂດມົງໂກລີ ແລະ ເຂດປົກຄອງຕົນເອງ ຊິນຈຽງ.

ສະເພາະ ນະຄອນຫຼວງປັກກິ່ງ ຄາດວ່າ: ຝຸ່ນທະເລຊາຍຈະຍັງຄົງມີຢູ່ເຖິງ ວັນທີ 29 ມີນາ ເຖິງແມ່ນວ່າ ປະລິມານຈະເລີາມຫຼຸດລົງ; ທາງການຈີນ ແຈ້ງວ່າ: ປະລິມານຝຸ່ນລະອອງຂະໜາດ PM2,5 ໃນນະຄອນຫຼວງປັກກິ່ງ ຢູ່ 871 ໄມໂຄຼກຼາມຕໍ່ແມັດກ້ອນ ໃນເວລາ 15:00 ໂມງ ຂອງວັນທີ 28 ມີນາ, ເຊິ່ງຈັດວ່າເປັນອັນຕະລາຍ; ຂະນະທີ່ກະຊວງການຕ່າງປະເທດ ສະຫະລັດ ອາເມລິກາ ລາຍງານວ່າ: ປະລິມານຝຸ່ນລະອອງຂະໜາດ PM2,5 ໃນນະຄອນຫຼວງປັກກິ່ງ ຢູ່ທີ່ 164 ໄມໂຄຼກຼາມຕໍ່ແມັດກ້ອນ ໃນເວລາ 16:00 ໂມງ ຂອງວັນທີ 28 ມີນາ, ຈັດວ່າ ບໍ່ປອດໄພຕໍ່ສຸຂະພາບ; ໂດຍໄດ້ຫຼຸດລົງຈາກ 244 ໄມໂຄຼກຼາມຕໍ່ແມັດກ້ອນ ໃນເວລາ 08:00 ໂມງ ຂອງວັນດຽວກັນ ທີ່ໄດ້ຈັດວ່າ ບໍ່ປອດໄພຕໍ່ສຸຂະພາບຫຼາຍ.