ພາກສ່ວນກ່ຽວຂ້ອງສັ່ງຫ້າມ!! ຂາຍເຄື່ອງຕາມແຄມທາງ ຫຼື ທາງຍ່າງຕາມທາງເສັ້ນນີ້

        ເຖິງ: ບັນດາ ເຈົ້າຂອງຕະຫລາດ ສູນການຄ້າ ຫ້າງຮ້ານ ຊາວຄ້າຂາຍ ແລະ ປະຊາຊົນບັນດາເຜົ່າ ໃນທົ່ວ
ນະຄອນຫລວງວຽງຈັນ.
ເລື່ອງ: ການຈັດສັນຄວາມບໍ່ເປັນລະບຽບຮຽບຮອຍ ຂອງຊາວຄ້າຂາຍເຄື່ອງ ຢູ່ພາຍໃນຕະຫລາດ ສູນການຄ້າ ແລະ ຕາມເສັ້ນທາງຫລັກ ໃນນະຄອນຫລວງວຽງຈັນ.
- ອີງຕາມ ຄຳສັ່ງເລກທີ 01/ຈນວ ລົງວັນທີ 24/2/2014
- ອີງຕາມ ຂໍ້ຕົກລົງສະບັບເລກທີ 0136/ຈນວ ລົງວັນທີ 24 ກຸມພາ 2016 ວ່າດ້ວຍການປະດັບປະດາຕົວເມືອງໃນນະຄອນຫລວງວຽງຈັນ ເພື່ອກະກຽມດຳເນີນການເປັນເຈົ້າພາບ ແລະ ປະທານກອງປະຊຸມອາຊຽນ 2016
       ເນື່ອງຈາກວ່າການຈັດຕັ້ງປະຕິບັດຄຳສັ່ງ ຂໍ້ຕົກລົງ ກົດໝາຍ ທີ່ວາງອອກນັ້ນຍັງບໍ່ທັນໄດ້ດີເທົ່າທີ່ຄວນ ເປັນຕົ້ນ ການຂາຍເຄື່ອງຊະຊາຍຕາມແຄມທາງ ຖະໜົນໜອງບອນ, ຖະໜົນຄູວຽງ ຖະໜົນ T4 ແລະ ຖະໜົນອື່ນໆ… ການວາງຂາຍສິນຄ້າຢູ່ຕາມເສັ້ນທາງຄົນຍ່າງ ການຈອດລົດຂາຍເຄື່ອງຕາມຖະໜົນ ເຊິ່ງເປັນລະເມີດກົດລະບຽບກົດ ໝາຍ ອັນໄດ້ສ້າງຄວາມບໍ່ເປັນລະບຽບຮຽບຮ້ອຍເປີະເປື້ອນ ໃສ່ຖະໜົນຫົນທາງ ແລະ ເຮັດໃຫ້ການຈະລາຈອນເກີດຄວາມແອອັດ. ເພື່ອເຮັດໃຫ້ວຽກງານດັ່ງກ່າວຖືກແກ້ໄຂ ແລະ ສ້າງຂະບວນການຂ່ຳນັບຮັບຕ້ອນ ກອງປະຊຸມສຸດຍອດອາຊຽນ ຄັ້ງທີ 28, 29 ທີ່ຈະເປີດຂຶ້ນ ໃນເດືອນກັນຍານີ້ ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ອອກແຈ້ງການ ແລະ ຮຽກຮ້ອງມາຍັງບັນດາເຈົ້າຂອງຕະຫລາດ ສູນການຄ້າ ຫ້າງຮ້ານຊາວຄ້າຂາຍ ຕະ ຫລອດຮອດ ທະຫານ, ຕຳຫລວດ ແລະ ພໍ່ແມ່ປະຊາຊົນ ຊາວນະຄອນຫລວງວຽງຈັນ ທຸກຖ້ວນໜ້າ ເພື່ອຮ່ວມແຮງຮ່ວມໃຈກັນ ຈັດຕັ້ງປະຕິບັດກົດໝາຍ, ແຈ້ງການສະບັບນີ້ ແລະ ຮ່ວມກັນເປັນເຈົ້າພາບທີ່ດີດັ່ງນີ້:
1.../ຊາວຄ້າຂາຍທີ່ມີຫ້າງຮ້ານ ໃຫ້ວາງສິນຄ້າ ປ້າຍໂຄສະນາຢູ່ພາຍໃນຂອບເຂດຮ້ານຂອງຕົນເທົ່ານັ້ນ ບໍ່ໃຫ້ວາງອອກມາກວມເອົາເຂດທາງຄົນຍ່າງ ( ຟຸດບາດ).
2.../ຊາວຄ້າຂາຍທຸກພາກສ່ວນ ບໍ່ໃຫ້ວາງສິນຄ້າ, ຕັ້ງໂຕະລໍ້, ລົດບັນທຸກ ເພື່ອຂາຍສິນຄ້າຕາມທາງຄົນຍ່າງຖະໜົນ ແລະ ພື້ນທີ່ສາທາລະນະ ໃຫ້ເຂົ້າໄປຂາຍພາຍໃນຂອບເຂດຕະຫລາດ ທີ່ມີຄວາມເໝາະສົມ ແລະ ສາມາດຮອງຮັບໄດ້.
3.../ໃຫ້ບັນດາຕະຫລາດ ສູນການຄ້າ ຫ້າງຮ້ານ ເພີ່ມທະວີຄວາມເອົາໃຈໃສ່ ໃນການຮັກສາຄວາມສະອາດຈົບງາມ ແລະ ຄວາມເປັນລະບຽບຮຽບຮ້ອຍພາຍໃນຕະຫລາດ ສູນການຄ້າ ຫ້າງຮ້ານ ແລະ ບໍລິເວນອ້ອມ ແອ້ມຕະຫລາດ ສູນການຄ້າ ( ທາງໜ້າ-ທາງຂ້າງ) ໃຫ້ສະອາດຈົບງາມ.
4.../ມາດຕະການໃນການຈັດຕັ້ງປະຕິບັດ ມອບໃຫ້ຂະແໜງການຄ້າພາຍໃນ ຫ້ອງການອຸດສາຫະກຳ ແລະ ການຄ້າເມືອງ ຄະນະກຳມະການຄຸ້ມຄອງຕະຫລາດຂັ້ນເມືອງ ແລະ ພາກສ່ວນກ່ຽວຂ້ອງ ເປັນຜູ້ກວດກາຕິດຕາມ ແລະ ໃຫ້ໃຊ້ມາດຕະການຕາມລະບຽບ ກົດໝາຍຢ່າງເຂັ້ມງວດ
5.../ແຈ້ງການສະບັບນີ້ ມີຜົນສັກສິດ ນັບແຕ່ວັນລົງລາຍເຊັນ ເປັນຕົ້ນໄປ 
     ດັ່ງນັ້ນ ຈຶ່ງແຈ້ງມາຍັງທ່ານ ເພື່ອຊາບ ແລະ ຈັດຕັ້ງປະຕິບັດຕາມແຈ້ງການສະບັນນີ້ຢ່າງເຂັ້ມງວດ.

ແຫຼ່ງຂ່າວ:  Pathedlao Lao

ໝາຍເຫດ: ຮູບພາບເປັນພຽງພາບປະກອບບໍ່ກ່ຽວກັບບົດ