ພະແນກສ່ວຍສາອາກອນນະຄອນຫລວງເຄື່ອນ ໄຫວເກັບກຳສະຖິຕິ ຮ້ານຄ້າໃນຕະຫລາດເຊົ້າ

ເພື່ອປະຕິບັດ​ຕາມ​ທິດ​ທາງ​ແຜນ​ງານ ​ໃນ​ການ​ສ້າງ​ແຜນການ​ຈັດ​ເກັບ​ລາຍ​ຮັບ​ ຂອງ​ພະ​ແນກສ່ວຍ​ສາ​ອາກອນ ນະ​ຄອນ​ຫລວງ​ວຽງ​ຈັນ ​ໃນ​ສົກ​ປີ 2015-2016 ​ໃຫ້​ເປັນ​ຮູບ​ປະ​ທຳ ​ພາຍ​ໃຕ້​ຄວາມ​ຖືກຕ້ອງ​ສອດຄ່ອງກັບ​ສະພາບ​ຄວາມ​ເປັນ​ຈິງ, ​ຮັບປະກັນ​ຄວາມ​ຖືກຕ້ອງຄົບ​ຖ້ວນການ​ຊື້-​ຂາຍລາຍ​ຮັບ​ຕົວ​ຈິງ ​ໂດຍ​ການ​ມີ​ສ່ວນ​ຮ່ວມ​ຢ່າງ​ຕັ້ງຫນ້າ​ ຂອງ​ບັນດາ​ຜູ້​ປະກອບ​ການ ​ໃນ​ການ​ປະກອບສ່ວນ​ພັນທະ​ເຂົ້າ​ງົບປະມານ​ລັດ.

​ໃນ​ວັນ​ເສົາ​ທີ 18 ກໍລະກົດ 2015 ພະ​ແນ​ກສ່ວຍ​ສາ​ອາກອນ ​ນະ​ຄອນ​ຫລວງ​ວຽງ​ຈັນ ​ໄດ້​​ເຄື່ອນ​ໄຫວ​ເກັບ​ກຳສະຖິຕິ​ບັນດາ​ຮ້ານ​ຄ້າ​ພາຍ​ໃນ​ຕະຫລາດ​ເຊົ້າ (ຕະຫລາດ​ເຊົ້າມໍ) ນຳ​ໂດຍ ທ່ານ ​ແອ​ລະ​ວັນ ຈັນທະວີ​ໄຊ ຮອງຫົວໜ້າພະ  ​ແນ​ກສ່ວຍ​ສາ​ອາກອນນະ​ຄອນ​ຫລວງ​ວຽງ​ຈັນທັງ​ເປັນ​ຮອງ​ຫົວໜ້າ​ຄະນະ​ຮັບຜິດຊອບຊີ້​ນຳ​ລວມແຜນ​ງານ​ດັ່ງ ກ່າວ ພ້ອມ​ທັງ​ພະນັກງານວິຊາ​ການ​ພາຍ​ໃນ​ກົມ​ສ່ວຍ​ສາ​ອາກອນ ລົງ​ຈັດ​ຕັ້ງ​ປະຕິບັດ ຈຳນວນ 50 ກວ່າ​ຄົນ.

ທ່ານ ​ແອ​ລະ​ວັນ ຈັນທະວີ​ໄຊ ​ໄດ້​ໃຫ້ສຳພາດ​​ວ່າ: ການ​ລົງ​ຊຸກຍູ້ເກັບ​ກຳ​ສະຖິຕິຄັ້ງ​ນີ້ ຍັງ​ເປັນ​ການໃຫ້​ຄຳ​ປືກສາຊີ້​ແຈງ​ບັນດາ​ຂໍ້​ຂ້ອງ​ໃຈ ​ແລະ ຮັບ​ຟັງ​ຂໍ້ສະ​ເໜີ, ຄວາມຈຳ​ເປັນໃນ​ສະພາບ​ຕົວ​ຈິງຂອງ​ບັນດາ​ຜູ້ປະກອບ​ການເພື່ອນຳມາຄົ້ນຄວ້າ​ສະຫລຸບສັງ​ລວມລາຍ​ງານ​ຂັ້ນ​ເທິງເພື່ອ​ພ້ອມ​ກັນ​ຊອກ​ຫາ​ຊ່ອງທາງ​ແກ້​ໄຂ​ບັນຫາ ສ້າງ​ເງື່ອນ​ໄຂ​ອຳ​ນວຍ​ຄວາມ​ສະດວກ​ໃຫ້ຜູ້​ປະກອບ​ການພາຍ​ໃຕ້​ຄວາມ​ຖືກຕ້ອງຕາມ​ລະບຽບ​ກົດໝາຍ​ໂດຍ​ບໍ່​ສົ່ງ​ຜົນ​ກະທົບ​ໃນ​ດ້ານ​ລົບ​ຕໍ່​ຜູ້​ປະກອບ​ການ ​ແລະ ພາກ​ລັດ.

………………………………………………………………………………………………………………………………………………………………………………

ທີ່​ມາ: www.kpl.gov.la