ພະຍຸຊົງກາ ສົ່ງຜົນກະທົບແກ່ 181 ບ້ານໃນແຂວງສະຫວັນນະເຂດ

 ເນື່ອງຈາກ​ຜົນ​ກະທົບ​ ຈາກພາຍຸຊົງ​ກາ ​ເຮັດ​ໃຫ້ເກີດມີສະພາບຝົນຕົກ ຕິດຕໍ່ກັນຫລາຍວັນ ນັບແຕ່ວັນທີ 24-28/7/2017 ​ເຊິ່ງ​ໄດ້​ເຮັດ​ໃຫ້ນ້ຳ​ຖ້ວມຂັງ ເປັນບໍລິເວນກວ້າງ ​ເຮັດ​ໃຫ້ບ້ານ​ເຮືອນ​​ ແລະ ເນື້ອ​ທີ່​ການ​ຜະລິດ ຂອງປະຊາຊົນ ເສຍຫາຍ​ຫລາຍພໍສົມຄວນ ຢູ່ 7 ເມືອງ ຂອງແຂວງສະຫວັນ​ນະ​ເຂດ, ລວມມີ 181 ບ້ານ, ມີ 9.304 ຄອບຄົວ, ປະຊາກອນ 40.759 ຄົນ, ມີເນື້ອທີ່ນາຖືກນ້ຳຖ້ວມ ຈຳນວນທັງໝົດ 15.680 ເຮັກຕາ. ມາ​ຮອດ​ປັດຈຸບັນ ແມ່ນຍັງບໍ່ສາມາດປະເມີນມູນຄ່າ ຄວາມເສຍຫາຍໄດ້.

ຕາມການລາຍງານ ຂອງພະແນກກະສິກຳ-ປ່າໄມ້ ແຂວງສະຫວັນນະເຂດ ໃຫ້ຮູ້ວ່າ: ສຳລັບ​ບັນດາ​ເມືອງ ທີ່​ໄດ້​ຮັບ​ຜົນ​ກະທົບ​ ຈາກ​ໄພນ້ຳຖ້ວມປີ​ນີ້ ມີ​ເມືອງຈຳພອນ, ສອງຄອນ, ໄຊພູທອງ, ຊົນນະບູລີ, ທ່າປາງທອງ, ໄຊບູລີ ແລະ ເມືອງອາດສະພັງທອງ. ນອກຈາກ​ສ້າງຄວາມ​ເສຍ​ຫາຍ ​ແກ່​ຊັບ​ສິນ ​ແລະ ​ເນື້ອ​ທີ່​ການ​ຜະລິດ​ແລ້ວ ຍັງ​ສ້ງຄວາມ​ເສຍ​ຫາຍ​ແກ່ສັດລ້ຽງ ​ໂດຍ​ສະ​ເພາະ​ງົວຕາຍ 29 ໂຕ ​ແລະ ສັດປີກຫລາຍ ກວ່າ 213 ໂຕ, ໜອງປາ​ເສຍ​ຫາຍ 265 ໜອງ ແລະ ລະບົບຊົນລະປະທານ 8 ແຫ່ງ, ຝາຍ 2 ແຫ່ງ, ປະຕູນ້ຳ 4 ແຫ່ງ ແລະ ຄອງສົ່ງນ້ຳ 2 ແຫ່ງ. 

ພາຍຫລັງ​ເກີດ​​ໄພ​ທຳ​ມະ​ຊາດ ນ້ຳ​ຖ້ວມຂັງ, ທ່ານ​ ສັນ​ຕິ​ພາບ ພົມວິຫານ ​ເຈົ້າ​ແຂວງ​ສະຫວັນ​ນະ​ເຂດ ພ້ອມ​ຄະນະ ກໍ​ໄດ້​ລົງ​ຕິດຕາມ ​ແລະ ຢ້ຽມຢາມ​ປະຊາຊົນ ​ຜູ້​ທີ່​ໄດ້​ຮັບ​ຜົນ​ກະທົບ ຢູ່​​ເມືອງ​ຕ່າງໆ, ພ້ອມ​ທັງ​ນຳ​ເອົາ ​ເຄື່ອງຊ່ວຍ​ເຫລືອ​ສຸກ​ເສີນ ປະ​ເພດ​ນ້ຳ​ດື່ມ ​ແລະ ອາຫານ​ສຳ​ເລັດ​ຮູບ ຈຳນວນໜຶ່ງ​ ມອບ​ໃຫ້​ປະຊາຊົນ ​ເພື່ອ​ເປັນ​ກຳລັງ​ໃຈ, ທັງ​ຊີ້​ນຳ​ໃຫ້​ມີສະຕິ ຕໍ່ສະພາບດິນຟ້າອາກາດ ທີ່ອາດຈະເກີດຂຶ້ນໄດ້ທຸກເມື່ອ ນັບທັງປີນີ້ ແລະ ປີຕໍ່ໄປ ​ແລະ ເມື່ອບໍ່ດົນມານີ້, ທ່ານ ໄຊສົມພອນ ພົມວິຫານ ກໍໄດ້ນຳເອົາເຄື່ອງຊ່ວຍເຫລືອບັນເທົາທຸກ ປະເພດເຂົ້າສານ-ອາຫານແຫ້ງ, ນ້ຳດື່ມ ແລະ ຢາປົວພະຍາດ ໄປມອບໃຫ້ປະຊາຊົນຜູ້ທີ່ໄດ້ຮັບຜົນກະທົບ ຢູ່ເມືອງຈຳພອນ ແລະ ເມືອງຊົນນະບູລີ, ມູນຄ່າກວ່າ 70 ລ້ານກີບ. 

ຫລ້າສຸດ, ຄະນະນຳວິທະຍາໄຊສົມບັດ ເຕັກໂນໂລຊີ ແຂວງ ສະຫວັນນະເຂດ ກໍໄດ້ນຳເຄື່ອງອຸປະໂພກ-ບໍລິໂພກ ໄປຊ່ວຍບັນເທົາທຸກ ໃຫ້ປະຊາຊົນຜູ້ໄດ້ຮັບຜົນກະທົບ ຢູ່ເມືອງອາດສະພອນ, ຊຶ່ງເມືອງດັ່ງກ່າວ ມີປະຊາຊົນ ໄດ້ຮັບຜົນກະທົບ 27 ບ້ານ, ເນື້ອທີ່ນາຖືກນ້ຳຖ້ວມທັງໝົດ 500 ກວ່າເຮັກຕາ ແລະ ເສຍຫາຍໜັກ 244 ເຮັກຕາ.

ຂ່າວ-ພາບ: ພຸດທະສິນ

cr: http://kpl.gov.la/detail.aspx?id=27125