ພະຍາດວໍ້ ເປັນອັນຕະລາຍເຖິງຊີວິດ ແຕ່ສາມາດປ້ອງກັນໄດ້

ພະຍາດ​ວໍ້​ ເປັນ​ພະຍາດ​ ຕິດ​ຕໍ່​ຮ້າຍ​ແຮງ ຈາກ​ສັດ​ສູ່​ຄົນ ຖ້າ​ບໍ່​ໄດ້​ຮັບ ​ການ​ປິ່ນປົວ​ ທີ່​ຖືກຕ້ອງ ​ແລະ ທັນ​ເວລາ ຈະ​ເຮັດ​ໃຫ້​ເສຍ​ຊີວິດ, ​ໃນ​ປັດຈຸບັນ​ ຍັງ​ມີ​ລາຍ​ງານ ​ການລະບາດ ​ຂອງ​ພະຍາດ​ວໍ້ ສະ​ເພາະ​​ຢູ່ທະວິ​ບອາຊີ ມີ​ຄົນ​ເສຍ​ຊີວິດ ​ຍ້ອນ​ພະຍາດ​ດັ່ງກ່າວ ​ປະມານ 550.000 ຄົນ​ຕໍ່​ປີ. ສະ​ເພາະຢູ່ ສປປ ລາວ ນັບ​ແຕ່​ປີ 2002-2011 ມີ​ຜູ້​ເສຍ​ຊີວິດ ​ຍ້ອນ​ພະຍາດ​ດັ່ງກ່າວ​ແລ້ວ ​ປະມານ 19 ກໍລະນີ, ສະ​ເພາະ​ແຕ່​ເດືອນມັງກອນ ຫາ ​ເດືອນສິງຫາ ປີ 2015 ມີ​ຜູ້​ເສຍ​ຊີວິດ ​ຈາກ​ພະຍາດ​ວໍ້​ແລ້ວ 3 ກໍລະນີ.

ທ່າ​ນ ດຣ. ຈັນທະ​ໄລ ​ໄຊ​ຍະ​ວົງ ຫົວໜ້າ​ຂະ​ແໜງ​ ລະບາດ​ວິທະຍາ ພະ​ແນ​ກ ສາທາລະນະ​ສຸກ ນະຄອນຫລວງ​ວຽງ​ຈັນ ​ໄດ້​ກ່າວ​ວ່າ: ພະຍາດ​ວໍ້ ​ເປັນ​ພະຍາດ ​ທີ່​ອັນຕະລາຍ ​ແຕ່​ເຮົາ​ກໍ​ສາມາດ​ ປ້ອງ​ກັນ​ໄດ້ ​ໂດຍ​ການ​ສັກ​ຢາ​ວັກ​ແຊງ​ປ້ອງ​ກັນ​ໃຫ້​ສັດລ້ຽງ ປະ​ເພດ ໝາ, ​ແມວ, ລີງ… ຢ່າງ​ຖືກ​ວິທີ ​ແລະ ຄົບ​ຖ້ວນ ​ຕາມ​ຈຳນວນ, ພ້ອມ​ນີ້ ​ເມື່ອ​ຖືກ​ສັດ​ກັດ ຫລື ຂູດ ​ໃຫ້​ລ້າງ​ບາດ​ແຜ​ ດ້ວຍ​ນ້ຳສະອາດ ​ທັນທີ ​ແລ້ວ​ໄປ​ພົບ​ແພດ ​ເພື່ອ​ສັກ​ຢາ​ ວັກ​ແຊງ​ປ້ອງ​ກັນ, ພ້ອມ​ທັງ​ໃຫ້​ສັງ​ເກດ​ ສັດ​ທີ່​ກັດ​ ໃນ​ໄລຍະ 10 ວັນ ຖ້າ​ຫາກສັດ​ ມີ​ອາການ​ເບື່ອ​ອາຫານ, ບໍ່​ກິນນ້ຳ, ກະວົນກະວາຍ ແລ້ວ​ຕາຍ ​ໃຫ້​​ແຈ້ງ​ຫາ ​ສັດຕະວະ​ແພດ ​ເພື່ອນຳ​ເອົາ​ສັດ​ ໄປກວດ​ຫາ​ເຊື້ອວໍ້.

ທ່າ​ນ ດຣ.ຈັນທະ​ໄລ ​ໄຊ​ຍະ​ວົງ ຍັງ​ໃຫ້​ຮູ້​ຕື່ມ​ວ່າ: ພະຍາດ​ວໍ້​ ແມ່ນ​ສາມາດ ​ປ້ອງ​ກັນ​ໄດ້ ຖ້າ​ທຸກ​ຄົນ​ເອົາ​ໃຈ​​ໃສ່ ​ໃນ​ການ​ຮັກສາ​ສັດລ້ຽງ​ຂອງ​ຕົນ ​ໂດຍ​ການ​ສັກ​ຢາ ​ວັກ​ແຊງ​ໃຫ້​ສັດ ​ຄົບ​ຖ້ວນ​ຕາມ​ຈຳນວນ​ ທີ່​ສັດຕະວະ​ແພດ​ແນະນຳ ​ແລະ ຫລີກ​ລ້ຽງການ​ສຳ​ພັດ​ກັບ​ສັດ​ ທີ່​ມີ​ຄວາມ​ສ່ຽງ​ ເປັນ​ພະຍາດ​ວໍ້. ຍ້ອນ​ເຫັນ​ໄດ້​ ຄວາມ​ສຳຄັນ​ ໃນ​ການ​ປ້ອງ​ກັນ ​ພະຍາດ​ດັ່ງກ່າວ ​ໃນ​ວັນ​ທີ 28 ກັນຍາ 2015 ນີ້, ທາງ​ກະຊວງ​ ສາທາ​ລະນະ​ສຸກ ​ແລະ ກະຊວງ​ກະສິກຳ ​ແລະ ປ່າ​ໄມ້ ຈະ​ໄດ້​ຈັດ​ກິດຈະກຳ​ ສະຫລອງ​ວັນ​ຕ້ານ​ພະຍາດ​ວໍ້​ໂລກ​ຂຶ້ນ ທີ່​ໂຮງ​ກາ​ຍະ​ສິນ ​ແຫ່ງ​ຊາດ ​ເຊິ່ງ​ໃນ​ງານ​ດັ່ງກ່າວ ຜູ້​ທີ່​ມີ​ສັດລ້ຽງ ປະ​ເພດ ໝາ, ​ແມວ, ລີງ… ສາມາດ​ ນຳ​ມາ​ສັກ​ຢາ​ວັກ​ແຊງ ​ປ້ອງ​ກັນ​ພະຍາດ​ວໍ້​ໄດ້ ​ໂດຍ​ບໍ່​ເສຍ​ຄ່າ ​ເຊິ່ງ​ຈະ​ເລີ່​ມ​ແຕ່ ​ເວລາ 8:00-16:00 ​ໂມງ ຈຶ່ງ​ຂໍ​ເຊີນຊວນ​ ໃຫ້​ປະຊາຊົນ​ ນຳ​ເອົາ​ສັດລ້ຽງ​ ຂອງ​ຕົນ​ໄປ​ຮ່ວມ​ງານ ​ດັ່ງກ່າວ

ທີ່ມາ http://kpl.gov.la/