ພວກໝາ ຮັບການເຝິກແອບ ໃຫ້ດົມກິ່ນ ຫາພະຍາດມະເຮັງ ໃນຕ່ອມນ້ຳກາມ

ຜູ້​ຊ່ຽວຊານ​ດ້ານ​ລະບົບ​ປັດ​ສະວະຫຼາຍທ່ານ​ເຫັນ​ດີ​ນຳ​ກັນ​ວ່າການ​ກວດສອບ​ຫາພະຍາດມະ​ເຮັງໃນ​ຕ່ອມ​ນ້ຳກາມ ຫຼື ​ໂປຣສ​ເຕດທີ່​ເອີ້ນກັນ​ວ່າການກວດ​ສອບ PSA ໃນ​ປັດຈຸບັນ​ນີ້​ສ່ວນ​ໃຫຍ່ແລ້ວແມ່ນບໍ່​ໜ້າເຊື່ອ​ຖື​ແຕ່​ມັນ​ຍັງ​ຄົງ​ຖືກ​ນຳ​ໃຊ້​ຢ່າງ​ກວ້າງຂວາງເພາະວ່າຍັງບໍ່ມີການກວດ​ສອບ​ປະເພດ​ອື່ນ​ໃດ​ເລີຍ. ບັນດາ​ນັກຄົ້ນຄວ້າ​ໃນ​ອັງກິດ​ກ່າວ​ວ່າໃນ​ໄວໆ​ນີ້ວິທີ​ການກວດ​ສອບ​ດັ່ງກ່າວອາດຈະຖືກປ່ຽນໄປໃຊ້ພວກໝາ​ທີ່ໄດ້ຮັບການເຝິກແອບໃຫ້ດົມເອົາກິ່ນຂອງ​ພະຍາດມະ​ເຮັງທີ່​ມີ​ຜົນ​ກະທົບຕໍ່​ພວກຜູ້ຊາຍໜຶ່ງໃນທຸກໆເຈັດຄົນໃດອີງຕາມສະມາຄົມ​ພະຍາດມະ​ເຮັງອາ​ເມຣິກາ. ຜູ້​ສື່​ຂ່າວ​ວີ​ໂອ​ເອ George Putic ມີລາຍ​ງານກ່ຽວກັບເລື້ອງນີ້​ເຊິ່ງ ໄຊ​ຈະ​ເລີ​ນສຸກ ຈະ​ນຳ​ມາສະ​ເໜີ​ທ່ານໃນ​ອັນ​ດັບ​ຕໍ່​ໄປ.

ພະຍາດມະ​ເຮັງ​ໃນ​ຕ່ອມນ້ຳກາມ ຫຼື​ ໂປຣສ​ເຕດ ​ແມ່ນ​ນຶ່ງ​ໃນ​ປະ​ເພດຂອງ​ໂຣກມະ​ເຮັງ​ທີ່ມີ​ຜົນກະທົບຫຼາຍກວ່າໝູ່​ຕໍ່​ພວກ​ຜູ້​ຊາຍ ​ໄວຫົກ​ສິບປີ​ກວ່າອີງ​ຕາມ​ກອງ​ທຶນເພື່ອ​ການວິ​ໄຈ​ໂຣກມະ​ເຮັງ​ສາກົນ​ຂອງ​ໂລກ ຫຼື World Cancer Research Fund International ​ຊຶ່ງໃນ​ປີ 2012 ​ໄດ້ວິນິດ​ໄສພະຍາດດັ່ງກ່າວທີ່ພົບ​ເຫັນ​ໃນ​ພວກ​ຜູ້​ຊາຍຫຼາຍກວ່າ 1 ລ້ານ​ຄົນ.

ການຮັກສາປິ່ນປົວສາມາດປະສົບຜົນສຳເລັດໄດ້ຖ້າພະຍາດມະເຮັງແມ່ນຖືກວິນິດໄສໃນຕອນຕົ້ນໆອັນເປັນເຫດຜົນທີ່ບັນດານາຍແພດສັ່ງໃຫ້ກວດສອບຫາສານສະ​ເພາະທີ່ເອີ້ນວ່າ prostate-specific antigen ທີ່ເອີ້ນຫຍໍ້ວ່າ PSA ທີ່ພົບເຫັນຢູ່ໃນປັດສະວະນັ້ນ. ແຕ່ການກວດສອບດັ່ງກ່າວສ່ວນຫຼາຍໃຫ້ຜົນທີ່ຜິດ ຫຼື ລະບຸພວກພະຍາດມະເຮັງທີ່ຂະຫຍາຍໂຕຊ້າເກີນໄປທີ່​ຈະບໍ່ຕ້ອງການຮັກສາປິ່ນປົວເທື່ອ. ແຕ່ ດຣ. Claire Guest ຜູ້ຮ່ວມຈັດຕັ້ງການກວດສອບດ້ວຍໝາກ່າວວ່າດ້ວຍການຊ່ວຍເຫຼືອຂອງເພື່ອນທີ່ແສນດີຂອງຄົນນັ້ນການກວດສອບຫາໂຣກມະເຮັງໃນຕ່ອມນ້ຳກາມອາດມີຄວາມແນ່​ນອນຫຼາຍ ຂຶ້ນຕື່ມໃນໄວໆນີ້.

ດຣ. Guest ເວົ້າວ່າ ພວກໝາ ມີຄວາມຮູ້ສຶກຂອງການດົມກິ່ນທີ່ມະຫັດສະຈັນ ​ໂດຍ​ມີອະ​ໄວ​ຍະ​ວະ​ ຮັບ​ຄວາມ​ຮູ້ສຶກ​ຂອງ​ກິ່ນຫຼາຍຮ້ອຍລ້ານ​ເສັ້ນສ່ວນ​ມະນຸດ​ເຮົາ​ນັ້ນມີ​ພຽງ 5 ລ້ານ​ເທົ່າ​ນັ້ນ. ສະນັ້ນ ພວກ​ໝາ​ແມ່ນ​ສາມາດ​ຊອກ​ຫາ​ກິ່ນ​ຂະໜາດ​ນ້ອຍ​ທີ່​ສຸດໄດ້​ເປັນ​ຢ່າງ​ດີຫຼາຍ.

​ໃນ​ຂະນະ​ທີ່ເຊວພະຍາດມະ​ເຮັງ​ໃນຕ່ອມ​ນ້ຳກາມແບ່ງ​ແຍກ​ອອກພວກ​ມັນ​ປ່ອຍ​ສານ​ປະກອບ​ຕ່າງໆບາງ​ຢ່າງອອກ​ມາທີ່ພວກ​ໝາ​ສາມາດ​ດົມ​ກິ່ນ​ໄດ້. ​ໃນ​ລະ​ຫວ່າງການທົດສອບຂັ້ນຕົ້ນຢູ່​ທີ່​ໂຮງໝໍມະຫາວິທະຍາ​ໄລ Milton Keynes ຂອງ​ອັງກິດພວກ​ໝາສາມາດ​ດົມ​ຫາ​ກິ່ນ​ພະຍາດ​ໄດ້​ເຖິງ 93% ​ຂອງ​ກໍລະນີ​ທັງຫຼາຍ. ນອກຈາກມີ​ຄວາມ​ຊັດເຈນ​ແລ້ວການກວດ​ສອບດ້ວຍ​ພວກ​ໝາແມ່ນໄວ​ຂຶ້ນຫຼາຍ ​ແລະ ມີ​ລາຄາຖືກກວ່າການກວດ​ສອບ​ຫາສານ PSA ຢູ່​ໃນ​ຫ້ອງ​ທົດ​ລອງ.

ດຣ. Guest ​ເວົ້າວ່າ ພວກ​ໝາ​ເຫຼົ່ານີ້ມີ​ຄວາມ​ສາມາດກວດ​ຫຼາຍຮ້ອຍຕົວຢ່າງຕໍ່​ມື້. ມັນ​ເປັນ​ສິ່ງ​ທີ່​ພວກ​ມັນຊອກ​ຫາ​ໄດ້​ງ່າຍ​ດາຍ. ພວກ​ມັນ​ມັກ​ ເຮັດ​ວຽກນີ້. ສຳ​ຫຼັບ​ພວກ​ມັນ​ແລ້ວມັນ​ເປັນ​ເກ​ມການ​ຕ່າ​ມລ່າຫາ​ພະຍາດມະ​ເຮັງຂອງ​ພວກ​ມັນ.

ມັນ​ໃຊ້​ເວລາປະມານ 6 ​ເດືອນ ​ເພື່ອ​ເຝິກ​ແອບໝາ​ໂຕ​ໜຶ່ງໃຫ້​ນັ່ງ​ລົງ ​ເຫົ່າ ຫຼື ຢ່າງ​ອື່ນ​ເຊັ່ນ ​ບົ່ງ​ບອກ​ວ່າຕົວຢ່າງ​ອັນ​ໜຶ່ງ​ນັ້ນມີ​ພວກເຊວ​ພະຍາດມະ​ເຮັງ.

ບັນດາ​ນັກຄົ້ນຄວ້າກ່າວ​ວ່າ ຖ້າ​ມີ​ການກວດ​ສອບ​ຕື່ມ​ອີກທີ່ຢັ້ງຢືນ​ວ່າການກວດ​ສອບ​ຫາພະຍາດມະ​ເຮັງຂອງພວກ​ໝານັ້ນມີຄວາມ​ເຊື່ອ​ຖືໄດ້ພວກ​ເຂົາ​ເຈົ້າ​ອາດ​ພະຍາຍາມເຝິກແອບ​ພວກ​ໝາ​ໃຫ້​ດົມ​ກິ່ນ​ເອົາ​ພະຍາດ​ອື່ນໆ​ອີກ​ດ້ວຍ. ​ແຕ່​ພວກ​ເຂົາ​ເຈົ້າ ຍອມຮັບວ່າ​ໂດ​ຍມີ​ໝາ​ຢູ່​ໃນ​ຫ້ອງການ​ຂອງ​ທ່ານໝໍ​ແຕ່ລະ​ແຫ່ງອາດ​ບໍ່​ເປັນ​ການ​ແກ້​ໄຂທີ່​ສະດວກ.

ທ່ານ​ນາງ Rowena Fletcher ນັກຄົ້ນຄວ້າຂອງໂຮງໝໍ​ມະຫາວິທະຍາ​ໄລ Milton Keynes ​ເວົ້າວ່າ “​ໃນ​ທີ່​ສຸດ​ແລ້ວ ພວກ​ເຮົາ​ຫວັງຈະ​ນຳ​ໃຊ້​ຂໍ້​ມູນທີ່​ເກີດ​ຜົນ​ອອກມາ​ຈາກພວກ​ໝານັ້ນເພື່ອຈະປະ​ດິດ​ດັງ​ອີ​ເລັກ​ໂທ​ນິກຂຶ້ນ​ມາໃນ​ທີ່​ສຸດ.

​ເທັກ​ໂນ​ໂລ​ຢີ​ອັນ​ນັ້ນອາດ​ຍັງຫ່າງ​ໄກຢູ່ເພາະວ່າຄວາມ​ຮູ້ສຶກ​ຂອງ​ການ​ສືບດົມ​ຂອງ​ໝາແມ່ນ​ຍັງເໜືອກ​ວ່າເຄື່ອງອີ​ເລັກ​ໂທຣ​ນິກດົມ​ກິ່ນຕ່າງໆທີ່​ດີທີ່​ສຸດຢູ່​ຕາມ​ທ້ອງ​ຕະຫຼາດ.

..............................................................................................................................................................

ທີ່ມາ : http://lao.voanews.com/