ຝົນຕົກຕິດຕໍ່ກັນຫລາຍວັນ ພາໃຫ້ເສັ້ນທາງ ຫລາຍບ່ອນເປ່ເພ

ນະຄອນຫລວງ​ວຽງ​ຈັນ​ ຖື​ວ່າ​ເປັນ​ໝາກ​ຫົວ​ໃຈ​ ຂອງ​ປະ​ເທດ​ເຮົາທີ່ລວບ​ລວມ ​ເອົາ​ຄວາມ​ຈະ​ເລີ​ນ ຮຸ່ງ​ເຮືອງສີວິ​ໄລ, ​ເປັນ​ສູນ​ກາ​ງເສດຖະກິດ, ວັດທະນະ​ທໍາ, ການ​ສຶກສາ ​ແລະ ອື່ນໆ ສະ​ນັ້ນ​ ຖ້າ​ພວກ​ເຮົາ​ເບິ່ງ​ກັບ​ຄືນ​ ຫລາຍ​ຊຸມ​ປີ ຜ່ານມາ​ນັ້ນ​ເຫັນ​ວ່າ ​ພັກ-ລັດຖະບານ​ ພວກ​ເຮົາ​ໄດ້​ລົງທຶນ​ມະຫາສານ ​ແລະ ​ເອົາ​ໃຈ​ເຂົ້າ​ໃນ​ ການ​ພັດທະນາ-ກໍ່ສ້າງ​ພື້ນຖານ​ໂຄງ​ລ່າງ ທີ່​ມີ​ການ​ຂະຫຍາຍຕົວ​ຢ່າງ​ວ່ອງ​ໄວ ຍົກ​ຕົວຢ່າງ​ເສັ້ນທາງ​ ຈາກ​ສະພາບ​ເປັນ​ດິນ​ແດງ ​ໃນໃຈກາງ​ເມືອງ ​ກາຍ​ມາ​ເປັນ​ເສັ້ນທາງ ປູ​ຄອນ​ກຣີດ ​ແລະ ປູຢາງ, ​ສອງ​ເບື້ອງ​ເສັ້ນທາງ​ ກໍ​ໄດ້​ປູກ​ຕົ້ນ​ໄມ້ ​ແລະ ດອກ​ໄມ້ຫລາຍ​ສີສັນ​ ໄປ​ຄວບ​ຄູ່​ກັບ​ການ​ຂະຫຍາຍຕົວ​ອາຄານ​ ບ້ານ​ເຮືອນຂອງ​ພໍ່​ແມ່​ປະຊາຊົນ, ສໍານັກງານ ​ແລະ ສູນ​ການ​ຄ້າ​ແບບ​ກ້າວ​ກະ​ໂດດ ອັນ​ນີ້​​ໄດ້​ດຶງ​ດູດ​ສາຍ​ຕາ ​​ແລະ ຄວາ​ມຮູ້ສຶກ​ດີໆ​ຈາກ​ນັກ​ທ່ອງ​ທ່ຽວ​ ທັງ​ພາຍ​ໃນ ​ແລະ ຕ່າງປະ​ເທດ ເຂົ້າ​ມາ​ຢ້ຽມຢາມ​ນະຄອນຫລວງ​ ນັບ​ມື້​ນັບ​ຫລາຍ​ຂຶ້ນ​ເປັນ​ກ້າວໆ.
ສະ​ນັ້ນ ​ເມື່ອ​ພັກ​-ລັດ​ ພວກ​ເຮົາ​ໄດ້​ປູ​ພື້ນຖານ, ​ໄດ້​ລົງທຶນ​ລົງ​ຮອນ​ມະຫາສານ ​ເຂົ້າ​ໃນ​ການ​ພັດທະນາ ​ແລະ ສ້າງສາ​ສິ່ງ​ດັ່ງກ່າວ​ ເກີດ​ຂຶ້ນ​ເປັນ​ປະຈັກ​ຕາ​ແລ້ວ ພວກ​ເຮົາ​ຈະ​ຕັ້ງ​ຜັນ​ຂະ​ຫຍາ​ຍ​ແນວ​ໃດ?​ ເພື່ອ​ເຮັດ​ໃຫ້ການ​ພັດທະນາ ​ມີ​ຄວາມ​ຍືນ​ຍົງ ​ແລະ ສະອາດ​ສວຍ​ງາມ​ຕະຫລອດ​ໄປ ​ເຊິ່ງບັນຫາ​ນີ້​ອາດ​ເປັນຄວາມ​ຮັບຜິດຊອບ​ ຂອງ​ໜ່ວຍ​ງານ​ກ່ຽວ ຂ້ອງ​ໃດ? ຄື​ດັ່ງ​ທີ່ຫລາຍທ່ານກໍ​ໄດ້​ເຫັນ ​ແລະ ​ໄດ້ສໍາ​ພັດ​ກັບ​ເຫດການ​ນໍ້າ​ຖ້ວມ ​ຢູ່​ຫລາຍ​ຈຸດ​ທົ່ວ​ນະຄອນ ຫລວງ​ວຽງ​ຈັນລະຫວ່າງ​ອາທິດ​ຜ່ານ ສົ່ງ​ຜົນ​ເຮັດ​ໃຫ້ການ​ສັນຈອນ​ຕິດ​ຂັດ ​ແລະ ສ້າງ​ຄວາມ​ຫຍຸ້ງ​ຍາກ​ ໃຫ້​ແກ່​ຜູ້​ເດີນທາງ​ໄປ​ມາ​ບໍ່​ໜ້ອຍ. ສິ່ງ​ທີ່​ເກີດ​ຂຶ້ນ​ນັ້ນ​ສືບເນື່ອງ ​ຈາກ​ຝົນໄດ້ຕົກ​ຕິດ​ຕໍ່​ກັນ​ ເປັນ​ເວລາ​ຫລາຍ​ວັນ ເຮັດໃຫ້ຮ່ອງນໍ້າ​ເປື້ອນຕັນ ​ແລະ ບໍ່​ສາມາດລະບາຍທັນ ​ພາໃຫ້​ນ້ຳ​ຖ້ວມ​ຢູ່​ຫລາຍ​ບ່ອນ​ເປັນ​ຕົ້ນ​ ຢູ່ເຂດ​ບ້ານ​ໜອງທາ​ໃຕ້ ​ເມືອງ​ ຈັນທະ​ບູລີນະ ຄອນຫລວງ​ວຽງຈັນ,  ເສັ້ນທາງຢູ່​ບໍລິ​ເວນໂຮງຮຽນປະຖົມ ​ໄປ​ຫາ​ບ້ານ​ພັກ​ກະຊວງ​ແຮງ​ງານ ​ແລະ ​ເສັ້ນທາງ​ລະ ຫວ່າງ​ ສາມ​ແຍກ​ໄຟ​ແດງ​ດົງ​ໂດກ ຫາ ບ້ານ​ພະ​ຂາວ. ພ້ອມ​ດຽວ​ກັນ​ນັ້ນ​ ເສັ້ນທາງ​ຫລາຍ​ຈຸດ​ກໍ​ເກີດ​ສະພາບ​ເປ່​ເພ​ແກ່ຍາວ​ຊ້ຳ​ເຮື້ອມາ​ດົນ​ນານ​ແລ້ວ ​ແລະ ພໍຕົກ​ຮອດ​ລະດູ​ແລ້ງ​ກໍ​ມີ​ຂີ້ຝຸ່ນ, ​ໄງ່, ​ເປັນ​ຂຸມ ​ແລະ ມີນ້ຳ​ອັ່ງອໍ​ຢູ່​​ເສັ້ນທາງ​ ສົ່ງ​ກິນ​ເໝັນ​​ໃສ່​ຄົນ​ອອ້ມຂ້າງ. ​ ​​ແຕ່​ຖ້າ​ພວກ​ເຮົາ​ເບິ່ງ​ ຕາມ​ຄວາມ​ເປັນ​ຈິງ​​ແລ້ວ ນໍ້າ​ຖ້ວມ​ຕາມ​ເສັ້ນທາງ​, ​ເສັ້ນທາງ​ປູຢາງ ​ແລະ ປູ​ຄອນ​ກຣີດ ​ເກີດ​ມີ​ຂີ້​ຝຸ່ນ​ຢ່າງ​ຫລວງຫລາຍ ຢູ່​​ນະຄອນຫລວງວຽງ​ຈັນ​ ນັ້ນ​​ໄດ້​ເກີດ​ຂຶ້ນ​ມາ​ດົນ​ນານ​ແລ້ວ ຍິ່ງ​ກວ່າ​ເສັ້ນທາງ​ຫາ​ກໍ​ສໍາ​ເລັດ​ການ​ກໍ່ສ້າງ ​ແຕ່​ກໍ​ມີ​ສະ​ພາບ​ເປ່​ເພ​ວ່ອງ​ໄວ ກ່ຽວ​ກັບ​ສິ່ງ​ທີ່​ເກີດ​ຂຶ້ນ​ນັ້ນ​ແມ່ນ​ໃຜ​ຈະ​ຮັບຜິດຊອບ ​ແລະ ສອດສ່ອງກວດກາ.

…………………………………………………………………………………………………………………………........................................................

ທີ່​ມາ: www.kpl.gov.la