ຜູ້ນໍາເອີຣົບສະຫຼົດໃຈຕໍ່ເຫດການກໍ່ການຮ້າຍຢູ່ແອັດສະປາຍ

ບັນດາຜູ້ນໍາແຫ່ງສະຫະພາບເອີຣົບ ຫຼື ອີຢູ ໄດ້ອອກມາກ່າວສະແດງຄວາມເສຍໃຈຕໍ່ເຫດໂຈມຕີເມືອງບາເຊໂລນາ ປະເທດແອັດສະປາຍ ຫຼັງຈາກຄົນຮ້າຍໄດ້ຂັບລົດແລ່ນຕໍາຜູ້ຄົນໃຈກາງເມືອງ ເມື່ອທ້າຍອາທິດທີ່ຜ່ານມາ ເຮັດໃຫ້ມີຜູ້ເສຍຊີວິດ 14 ຄົນ ແລະ ບາດເຈັບກວ່າ 100 ຄົນ.

ຜູ້ເຫັນເຫດການເລົ່າວ່າ: ຢູ່ທາງຍ່າງ ຣາມບລັດ ເຂດທ່ອງທ່ຽວປະຫວັດສາດທີ່ມີຊື່ສຽງຢູ່ໃຈກາງເມືອງບາເຊໂລນາ ມີລົດບັນທຸກສີຂາວຄັນໜຶ່ງແລ່ນໄປຕຳຄົນຍ່າງດ້ວຍຄວາມໄວສູງ ເຮັດໃຫ້ຫຼາຍຄົນລົ້ມ, ຂະນະບາງຄົນທັງຮ້ອງທັງແລ່ນໜີ.

ຕໍ່ມາຕຳຫຼວດໄດ້ມາເຖິງຈຸດເກີດເຫດ ແລະ ປິດລ້ອມເຂດຖະໜົນດັ່ງກ່າວ ນຳປະຊາຊົນອອກຈາກພື້ນທີ່ເກີດເຫດ, ທັງນຳຈັບຜູ້ກໍ່ເຫດທັນທີ. ຂະນະທີ່ຜູ້ເສຍຊີວິດ ແລະ ບາດເຈັບນັ້ນໄດ້ຖືກສົ່ງໄປໂຮງໝໍ.

ໃນວັນດຽວກັນ, ກຸ່ມຫົວຮຸນແຮງ ໄອເອັສ ໄດ້ຖະແຫຼງໂດຍຜ່ານຂ່າວສານອາມັກ ວ່າ: ເຫດການດັ່ງກ່າວແມ່ນ ” ນັກຮົບ ” ຂອງອົງການຕົນເອງກໍ່ຂຶ້ນ.

Cr: https://laoedaily.com