ຜູ້ຍິງ​ຕ້ອງ​ຮູ້​! 9 ສັນຍາ​ນ​ ບອກ​ພະຍາດ​ຈາກ​ສີ​, ກິ່ນ​ ຂອງ​ປະຈຳ​ເດືອນ​

 

ການ​ມີ​ປະຈຳ​ເດືອນ​ມາ​ເປັນ​ປົກກະຕິ​ທຸກ​ເດືອນ​ ອາດ​ເປັນ​ສັນຍາ​ນ​ທີ່​ດີ​ສຳລັບ​ສຸຂະພາບ​ຂອງ​​ແມ່​ ແລະ ​ຜູ້ຍິງ​ທຸກ​ຄົນ​ ເພາະ​ການ​ມີ​ປະຈຳ​ເດືອນ​ ເປັນ​ສິ່ງ​ທີ່​ບົ່ງ​ບອກ​ເຖິງ​ການ​ເຮັດ​ວຽກຂອງ​ລະບົບ​ສືບ​ພັນ​ວ່າປົກກະ​ຕິ​ ແລະ​ ການ​ເຮັດ​ວຽກ​ຂອງ​ຮ່າງກາຍ​ພາຍ​ໃນ​ຂອງ​ເຮົາ​ມີ​ຄວາມປົກກະຕິ​ດີ 

ແຕ່​ສຳຄັນ​​ກວ່າ​ນັ້ນ​ ປະຈຳ​ເດືອນ​ ຍັງ​ສາມາດ​ບອກ​ເຖິງ​ສຸຂະພາບ​ຂອງ​ຮ່າງກາຍ​ໄດ້​ອີກ​ດ້ວຍ​ ໂດຍ​ເຮົາ​ສາມາດ​ສັງເກດ​ໄດ້​ງ່າຍ​ໆ​ ຈາກ​ 3 ຢ່າງ​ຄື:​ ສີ,​ ກິ່ນ​ ແລະ ​ອາການ​ ດັ່ງ​ຕໍ່ໄປ​ນີ້​:

1. ປະຈຳ​ເດືອນ​ສີ​ເຂັ້ມ​, ອອກ​ນ້ອຍ​: ມີ​ອາການ​ເມື່ອຍ​ງ່າຍ​ເວລາ​ຕ້ອງ​ອອກ​ແຮງ,​ ອ່ອນ​ເພຍ​ກວ່າປົກກະ​ຕິ​, ວຽນ​ຫົວ​ ມັນອາດ​ບົ່ງ​ບອກ​ວ່າ​ເປັນ​ສັນຍາ​ນ​ຂອງ​ພະຍາດ​ເລືອດ​ຈາງ​ໄດ້​. 

2. ປະຈຳ​ເດືອນ​ອອກ​ມາ​ເປັນ​ກິ່ມ​​ຄາວຄ້າຍ​ຄືເລືອດ​ໝູ​: ມີ​ເລືອດ​ອອກ​ພາຍ​ໃນ​ຂ້ອນ​ຂ້າງ​ຫລາຍ​ ອາດຈະ​ເປັນ​ສັນຍາ​ນ​ເຕືອນ​ວ່າ​ ອຸ້ງ​ເຊີງ​ການ(ທ້ອງ)ກຳ​ລັງ​ອັກ​ເສບ​ 

3. ມີກິ່ນ​ຜິດ​ປົກກະຕິ,​ ຄັນ,​ ເຈັບ​ແສບ​ໃນ​ຊ່ອງຄອດ​: ຖ້າ​ເປັນຮ່ວມ​ກັບ​ອາການ​ຕົກ​ຂາວ​ ສະແດງ​ວ່າຕົກ​ຂາວ​ຈາກ​ເຊື້ອ​ໄວ​ຣັດ,​ ເຊື້ອ​ແບກ​ທີ​ເຣຍ​, ເຊື້ອ​ຣາ,​ ພະຍາດ​ໃນ​ຊ່ອງຄອດ​ ຫລື​ ຕິດ​ເຊື້ອ​ໃນ​ມົດລູກ​ ​ 

4. ປະຈຳ​ເດືອນ​ມາ​ບໍ່​ໝໍ່າ​ສະເໝີ​ ບໍ່​ປົກກະຕິ:​ ໃຫ້​ສັງເກດ​ວ່າ​ ມີ​ອາການ​ເຈັບ​ຫົວ​ຊຳເຮື້ອ,​ ຕາ​ມືດ​ມົວ​ລົງ​ເລື້ອຍ​ໆ,​ ມີ​ໜວດ ​ແລະ ​ຂົນ​ຂຶ້ນ​ຜິດ​ທຳມະຊາດ​ ນ້ຳ​ນົມ​ອອກ​ຜິດ​ປົກກະຕິ​ ຖ້າ​ມີ​ອາການ​ເຫຼົ່າ​ນີ້​ຄວນ​ພົບ​ແພດດ່ວນ​ ເພື່ອ​ກວດ​ຫາ​ເນື້ອງ​ອກ​ຂອງ​ຮວຍໄຂ່​ ຫລື​ ກວດ​ຫາ​ຄວາມ​ຜິດ​ປົກກະຕິ​ຂອງ​ຕ່ອມ​ໝວກ​ຫມາກໄຂ່ຫລັງ ​ຫລື​ ຕ່ອມ​ໃຕ້​ສະຫມອງ​ 

5. ປະຈຳ​ເດືອນ​ມາ​ນ້ອຍ ​ແລະ​ ມີ​ອາການ​ອ່ອນ​ເພຍ:​ ເຕົ້າ​ນົມ​ຫ່ຽວ,​ ຂົນ​ຂີ້ແຮ້ຫລົ່ນ​​ ອາດຈະ​ເຄີຍ​ຕົກ​ເລືອດ​ຢ່າງ​ຮຸນແຮງ​ ຫລື ​ເປັນ​ລົມ​ຂະນະ​ເກີດ​ລູກ​ ຄວນ​ພົບ​ແພດ​ ເພື່ອ​ກວດ​ຫາ​ພະຍາດ​ຊີ​ແຮນ​ ຫລື​ ພະຍາດ​ທີ່​ຕ່ອມ​ໃຕ້​ສະຫມອງ​ຂາດ​ເລືອດ​ ເຮັດໃຫ້​ເຮັດວຽກ​ນ້ອຍ​ລົງ​ແລະ ​ເຮັດໃຫ້​ຮວຍໄຂ່​ເຮັດວຽກ​ນ້ອຍ​ລົງອີກ​ດ້ວຍ​ 

6. ປະຈຳ​ເດືອນ​ມາ​ຫລາຍ​ຈົນ​ມີ​ອາການ​ໂຕເຫຼືອງ (ໂຕຈືດ) ຄວນ​ໄປ​ພົບ​ແພດ​ ແຕ່​ທີ່​ບໍ່​ຄວນຢູ່ເສີຍ​ ຄື​ຖ້າ​ເລືອດ​ທີ່​ອອກ​ມາ​ມີກິ່ນ​ເໝັນ​ ແລະ ​ມີ​ອາການ​ເຈັບບໍລິເວນ​ທ້ອງ​ນ້ອຍ​ ຕ້ອງ​ລະ​ວັງ​ເລື່ອງ​ປີກ​ມົດລູກ​ອັກ​ເສບ​ 

7. ປະຈຳ​ເດືອນ​ມາ​ຫລາຍ​ລວມ​ກັບ​ມີ​ອາການ​ປວດ​ປະຈຳ​ເດືອນ​ ຫລື​ຮູ້ສຶກ​ເຈັບ​ເວລາ​ຮ່ວມ​ເພດ​ ແລະ ​ລູບ​ພົບ​ກ້ອນ​ທີ່​ທ້ອງ​ນ້ອຍ​ອັນ​ນີ້​ບໍ່​ຄວນລະເລີຍ​ ເພາະ​ອາດຈະ​ເປັນ​ເນື້ອງ​ອກ​ໃນ​ມົດລູກ​ໄດ້​ 

8. ເຈັບ​ປະຈຳ​ເດືອນ​ຫລາຍ​ຈົນ​ໜ້າ​ຈືດໜ້າ​ຈາງ​ ຫລື ​ໃນ​ມື້​ທ້າຍ​ໆ​ ຍິ່ງ​ປວດ​ຫລາຍ​ຂຶ້ນ ແບບ​ນີ້​ຄວນ​ຈະ​ໄປ​ກວດ​ພະຍາດ​ເຍື່ອຫຸ້ມ​ມົດລູກ​ຈະເລີນ​ຜິດ​ບ່ອນ​

9. ປະຈຳ​ເດືອນ​ມາ​ດົນ​ຜິດ​ປົກກະຕິ​ເກີນ​​ 7 ມື້​ ອາດ​ເປັນ​ຕອນ​ຫຼັງ​ເກີດ​ໃໝ່​ໆ​ ຫລື ​ຫຼັງ​ໃສ່​ຫ່ວງ​ຄຸມ​ກຳ​ເນີດ​ກໍ​ຖື​ເປັນ​ເລື່ອງ​ປົກກະຕິ​ ແບບ​ດຽວ​ກັບ​ປະຈຳ​ເດືອນ​ທີ່​ຂາດ​ໆ​ ຫາຍໆ​ ແລ້ວ​ພໍ​ມາ​ກໍ​ມາ​ຫລາຍ​ ແຕ່​ກໍ​ບໍ່​ມີ​ຜິດ​ປົກກະຕິ​ອື່ນ​ໆ​ ແລະ​ ບໍ່​ໄດ້​ຖືພາ​ ມັກ​ຈະ​ເປັນ​ໃນ​ຊ່ວງ​ທີ່​ອ້ວນ​ເກີນ​ໄປ,​ ຄຽດ​ ແລະ ອອກ​ກຳ​ລັງ​ກາຍ​ຫລາຍ​ເກີນ​ໄປ​ 

ປະຈຳ​ເດືອນ​ ເປັນ​ສິ່ງ​ທີ່​ທຳມະຊາດ​ສ້າງ​ມາ​ເພື່ອ​ຜູ້ຍິງ​ທຸກ​ຄົນ​ ຫາກ​ເຮົາ​ໝັ່ນ​ສັງເກດ​ສິ່ງ​ຕ່າງໆ​ ເຫຼົ່າ​ນີ້​ຢ່າງ​ສະໝ່ຳ​ສະເໝີ​ ແລະ​ ໝັ່ນ​ເບິ່ງ​ແຍງ​ໂຕເອງ​ໃຫ້​ດີ​ ກໍ​ຈະ​ສາມາດ​ຊ່ວຍ​ປ້ອງ​ກັນ​ພະຍາດ​ໄດ້​ເປັນ​ຢ່າງ​ດີ​​