ຜູ້ຄ້າຢາເສບຕິດຖືກສານຕັດສິນປະຫານຊີວິດ ຍ້ອນສາເຫດນີ້!!

ອີງ​ຕາມ​ແຫຼ່ງ​ຂ່າວ​ຈາກ​ໜັງສື​ພິມ​ຄວາມ​ສະຫງົບ ໃຫ້​ຮູ້​ວ່າ: ຄະນະ​ສານ​ອາຍາ ສານ​ປະຊາຊົນ​ຂັ້ນ​ຕົ້ນ ນະຄອນຫຼວງ​ວຽງ​ຈັນ ໄດ້​ນຳ​ເອົາ​ຄະດີ​ຄ້າຂາຍ​ຢາ​ເສບຕິດ​ໃຫຍ່ ​ທີ່​ມີ​ຢາ​ບ້າຈຳນວນ 66 ມັດ ທີ່​ຖືກ​ດຳເນີນ​ຄະດີ​ມາ​ແຕ່​ວັນທີ 17 ພະຈິກ 2014 ຂຶ້ນ​ມາ​ພິ​ຈາລະ​ນາ​ຕັດສິນ​ຕາມ​ກົດໝາຍ​ໃນວັນ​ທີ 28 ກໍລະກົດ 2016 ໂດຍສານ​ໄດ້​ຕັດສິນ​ປະຫານ​ຊີວິດ​ຈຳເລີຍ​ທັງ 3 ຄົນ​ຄື: ນາງ ໄມ​ຈົວ​ລີ ອາຍຸ 26 ປີ ຢູ່​ບ້ານ​ເຕົ່າ​ຖານ ເມືອງ​ໂພນ​ໂຮງ ແຂວງ​ວຽງ​ຈັນ ທ້າວ ຕູ້​ວື່ ອາຍຸ 35 ປີ​ຢູ່​ບ້ານ​ຊຽງດາ ເມືອງ​ໄຊ​ເຊດ​ຖາ ແລະ ທ້າວ ເຢີ​ວື່ ອາຍຸ 21 ປີ​ຢູ່​ບ້ານ​ທົ່ງ​ກາງ ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ.

ຜ່ານ​ການ​ໄຕ່​ສວນ​ໃນ​ຫ້ອງປະຊຸມ​ສານ​ໃຫ້​ຮູ້​ວ່າ: ໃນ​ເດືອນຕຸລາ 2014 ທ້າວ ຕູ້​ວື່ ໄດ້​ໂທລະສັບ​ສັ່ງ​ຊື້​ຢາ​ບ້າ​ນຳ​ທ້າວ ບົງ ຢູ່ບ້ານ​ເທວະ​ດາ ເມືອງ​ຊຽງ​ຄານ ແຂວງ​ພະ​ເຍົາ ປະເທດ​ໄທ ຈຳນວນ 66 ມັດ ເທົ່າ​ກັບ 132.000 ເມັດ ມີ​ນ້ຳໜັກ 15 ກິ​ໂລ​ກຼາມ ຈາກ​ນັ້ນ ທ້າວ ບົງ ໄດ້​ໃຫ້​ທ້າວ ຫວ່າງ​ລີ (ບໍ່​ຮູ້​ບ້ານ) ຢູ່​ແຂວງ​ບໍ່ແກ້ວ ເອົາ​ຢາ​ບ້າ​ມາ​ສົ່ງ​ໃຫ້​ຢູ່​ເສັ້ນທາງ​ບ້ານ​ໜອງ​ພະຍາ ເມືອງ​ໄຊທານີ ນະຄອນຫຼວງ​ວຽງ​ຈັນ ໂດຍຜູ້ກ່ຽວ​ນຳ​ໃຊ້​ລົດ​ກະບະ​ວີ​ໂກ້ ສີປອນ​ເງິນ ມາ​ສົ່ງ​ຢາ​ບ້າ ເມື່ອ​ໄດ້ຢາ​ບ້າ​ແລ້ວ​ທ້າວ ຕູ້​ວື່ ກໍ່​ເອົາ​ຢາໃສ່​ລົດ​ຕູ້​ມາດ​ສະ​ດ້າ ສີ​ປອນ​ຟ້າ ໝາຍ​ເລກ​ທະບຽນ ​ກຜ 2555 ມາ​ເຊື່ອງ​ໄວ້​ຢູ່​ເຮືອນ​ທີ່​ບ້ານ​ຊຽງດາ ມາ​ຮອດ​ວັນ​ທີ 15 ພະຈິກ 2014 ນາງ ໄມ​ຈົວ​ລີ ຢູ່​ຫຼັກ 52 ເມືອງ​ໂພນ​ໂຮງ ໄດ້​ຕິດຕໍ່​ຊື້​ຢາ​ບ້ານຳ​ທ້າວ ຕູ້​ວື່ ຈຳນວນ 50 ມັດ.

ຈາກ​ນັ້ນ ປະມານ 2 ມື້ຕໍ່ມາ ນາງ ໄມ​ຈົວ​ລີ ໄດ້​ໂທລະສັບ​ຫາທ້າວ ຕູ້​ວື່ ໃຫ້​ອອກ​ມາ​ຮັບ​ຢູ່​ເຂດດົງ​ໂດກ ແຕ່​ຜູ້ກ່ຽວ​ໄດ້​ໃຫ້​ນ້ອງຊາຍ​ຊື່​ທ້າວ ເຢີ​ວື່ ຂີ່​ລົດ​ໝາຍ​ເລກທະບຽນ ​ຍຜ 3135 ໄປ​ຮັບ​ແທນ ຈາກ​ນັ້ນ ທ້າວ ຕຸ້ຍ ໄດ້​ໂທລະສັບຫາ​ນາງ ໄມ​ຈົວ​ລີ ໃຫ້​ໄປ​ຫາ​ຢູ່ໂຮງແຮມ​ແຫ່ງ​ໜຶ່ງ ເພື່ອ​ກວດເບິ່ງ​ເງິນ​ທີ່​ເຖົ້າ​ແກ່​ຈະ​ມາ​ຊື້​ຢາ​ບ້າ ຈາກ​ນັ້ນ ຈຶຶຶ່ງ​ໄດ້​ໂທລະສັບ​ຫາທ້າວ ຕູ້​ວື່ ເອົາ​ຢາ​ບ້າ​ຈຳນວນ 50 ມັດ​ມາ​ສົ່ງ​ໃຫ້ ພາຍຫຼັງ​ມາ​ຮອດ ກໍ່​ຖືກ​ເຈົ້າ​ໜ້າທີ່​ກັກ​ຕົວ ພ້ອມ​ຢາບ້າ ແລະ ກວດ​ຄົ້ນ​ລົດ​ພົບ​ຢາ​ບ້າຕື່ມ​ອີກ 3 ມັດ ຈາກ​ນັ້ນ ກໍ່​ໄດ້​ເຂົ້າກວດ​ຄົ້ນ​ເຮືອນຂອງ​ທ້າວ ຕູ້​ວື່ ພົບ​ເຫັນ​ຢາ​ບ້າ ຈຳນວນ 13 ມັດ ລວມ​ທັງ​ໝົດ 66 ມັດ ມາ​ດຳເນີນຄະດີ​ຕາມ​ກົດໝາຍ.

ແຫຼ່ງຂ່າວ: ໜັງສືພິມວຽງຈັນໃໝ່.