ຜີ-ສິງເປີດເສິກຍາດ ກຣິສມັນ ເສີມຄົມ

 

ໃຈຕົງກັນສຳລັບ ຜີສາດແດງ ແລະ ສິງໂຕນ້ຳເງິນ ທີ່ຫວັງເສີມທັບໃນແດນໜ້າເມື່ອພ້ອມໃຈກັນຕັ້ງເປົ້າໝາຍທີ່ ອອງຕວນ ກຣິສມັນ ກອງໜ້າເລືອດນ້ຳຫອມ ກຽມທາບທາມກັບ ແອັດ ມາດຣິດ ຊ່ວງໜ້າຮ້ອນນີ້.

 

ແມນເຊສເຕີ ຢູໄນເຕັດ ສະໂມສອນດັງໃນ ພຣີເມຍລີກ ພ້ອມເປີດເສິກກັບ ເຊວຊີ ທີມຮ່ວມລີກເພື່ອລ່າໂຕ ອອງຕວນ ກຣິສມັນ ດາວຍິງຈາກ ແອັດ ມາດຣິດ ເຂົ້າມາເສີມທັບໃນຊ່ວງໜ້າຮ້ອນນີ້ ຈາກການລາຍງານຂອງ ເດລີ ເມວ ໜັງສືພິມແດນຜູ້ດີເມື່ອວັນພະຫັດທີ່ຜ່ານມາ.

ກອງໜ້າທີມຊາດຝຣັ່ງລະເບີດຟອມເທບຍິງລວມ 30 ເມັດໃຫ້ກັບຕົ້ນສັງກັດ ແລະ ທີມຊາດໃນລະດູການນີ້ຊ່ວຍໃຫ້ “ກາໝີ” ມີລຸ້ນແຊມລີກ ລາ ລີກາ ແລະ ຢູຟາ ແຊມປຽນລີກ ໃນປັດຈຸບັນ ຂະນະທີ່ ຜີສາດແດງ ແລະ ເຊວຊີ ຫວັງເສີມປະສິດທິພາບເກມບຸກເພື່ອໄລ່ລ່າແຊມໃນລະດູການໜ້າ ແລະ ຕາງກໍເບິ່ງວ່າ ກຣິສມັນ ອາດຈະເປັນຕົວເລືອກທີ່ເໝາະສົມ.

 

ຢ່າງໃດກໍຕາມ ມີລາຍງານຈາກແຫຼ່ງຂ່າວໃກ້ຊິດກັບ ກຣິສມັນ ທີ່ສະແດງຄວາມເຫັນວ່າ ບໍ່ແນ່ໃຈວ່າສະພາບຮ່າງກາຍຂອງອະດີດດາວເຕະ ເຣອັນ ໂຊຊີດາດ ແຂງແກ່ນພໍຟາດແຄ່ງໃນ ພຣີເມຍລີກ ຫຼື ບໍ່.