ຜີ-ປືນຫູຕັ້ງ!!ນາຍໃຫຍ່ກະທິງຫີນເຜີຍພ້ອມປ່ອຍເບລັອດຕິ

 

ແມນ ຢູໄນເຕັດ ແລະ ອາເຊນອນ ຕ້ອງໄດ້ຕິດຕາມສະຖານະການຂອງ ອັນເດຣຍ ເບລັອດຕິ ຫົວຫອກຂອງ ໂຕຣິໂນ ຢ່າງໃກ້ຊິດຫຼັງ ຊິນິຊາ ມິໄຮໂລວິດ ນາຍໃຫຍ່ຂອງ “ກະທິງຫີນ” ຮັບຄົງເປັນເລື່ອງຍາກທີ່ຈະດຶງນັກເຕະໃຫ້ຢູ່ກັບທີມຕໍ່ໄປໃນລະດູການໜ້າໄດ້ ຊີ້ຖ້າໄດ້ເງິນກ້ອນໃຫຍ່ກໍຄືຈະຍອມຂາຍອອກໄປ.

 

ຊິນິຊາ ມິໄຮໂລວິດ ນາຍໃຫຍ່ຂອງ ໂຕຣິໂນ ສະໂມສອນດັງຂອງ ກັນໂຊ ຊີຣີ ອາ ອີຕາລີອາດຈະຕ້ອງປ່ອຍ ອັນເດຣຍ ເບລັອດຕິ ກອງໜ້າຕົວເກັ່ງຂອງທີມອອກໄປໃນຊ່ວງຊຳເມີນີ້ຖ້າໄດ້ເງິນກ້ອນໃຫຍ່ ຫຼັງຈາກທີ່ມີລາຍງານວ່າ ແມນເຊສເຕີ ຢູໄນເຕັດ ແລະ ອາເຊນອນ 2 ຍັກໃຫຍ່ຂອງ ພຣີເມຍລີກ ສົນໃຈດຶງເຂົາໄປເສີມທັບ.

 

ດາວຍິງທີມຊາດອີຕາລີອາຍຸ 23 ປີຕົກເປັນເປົ້າໝາຍຂອງທີມດັງໃນເອີຣົບຫຼັງຈາກທີ່ເຮັດຜົນງານໄດ້ດີໂດຍການຍິງໄປແລ້ວເຖິງ 24 ປະຕູໃນລະດູການນີ້ໂດຍກ່ອນໜ້ານີ້ ໂຕຣິໂນ ເຄີຍປະຕິເສດຂໍ້ສະເໜີ 65 ລ້ານເອີໂຣແຕ່ຫຼ້າສຸດ ມິໄຮໂລວິດ ຍອມຮັບວ່າເປັນເລື່ອງທີ່ຍາກທີ່ຈະດຶງໃຫ້ຢູ່ກັບທີມຕໍ່ໄປໄດ້ໃນລະດູການໜ້າ.

 

ນາຍໃຫຍ່ “ກະທິງຫີນ” ເຜີຍວ່າ “ມັນຍາກທີ່ຈະຊອກໃຜມາແທນ ເບລັອດຕິ ຂ້ອຍຫວັງວ່າເຂົາຈະຢູ່ກັບທີມຕໍ່ແຕ່ມັນຕ້ອງມີຂໍ້ສະເໜີກ້ອນໃຫຍ່ເຂົ້າມາບໍ່ຊ້າກໍໄວ ແລະ ເມື່ອຮອດບ່ອນນັ້ນມັນກໍຍາກທີ່ເຂົາຈະຢູ່ກັບທີມຕໍ່ໄປ ເບລັອດຕິ ອາຍຸ 23 ປີ ແລະ ສາມາດຍິງໄດ້ເຖິງ 30 ປະຕູຕໍ່ລະດູການ”.

 

“ຕ້ອງມີສະໂມສອນໃຫຍ່ໆບາງທີມທີ່ມາທີ່ນີ້ ແລະ ຍື່ນຄ່າເມື່ອຍໃຫ້ເຂົາ 5, 6 ຫຼື 7 ລ້ານເອີໂຣຕໍ່ປີເປັນເວລາ 5 ປີເຮັດໃຫ້ເຂົາຈະໄດ້ເຖິງ 30 ລ້ານເອີໂຣ ຄິດເບິ່ງແມະວ່າເຂົາຈະຢູ່ຕໍ່ ຫຼື ບໍ່” ມິໄຮໂລວິດ ກ່າວ.

 

ບົດຄວາມໃຫມ່ໆ