ຜີແດງເຕັງໜຶ່ງດຶງມາຄິນຢອສ

 

“ສະປອດ” ສື່ສະເປນຕີຂ່າວ ແມນເຊສເຕີ ຢູໄນເຕັດ ເປັນເຕັງທີ່ຈະໄດ້ ມາຄິນຢອສ ເສີມແນວຮັບລະດູການໜ້າເໜືອກວ່າ ບາເຊໂລນາ ເຫດເພາະວ່າ ປາຣີ ແຊງ-ແຊັກແມງ ບໍ່ຢາກລົມກັບ “ບາຊາ” ໂດຍທີ່ພ້ອມຂາຍໃຫ້ “ຜີສາດແດງ” ໃນລາຄາ 60 ລ້ານປອນ.

 

“ສະປອດ” ສື່ກິລາແດນກະທິງເຜີຍ ປາຣີ ແຊງ-ແຊັກແມງ ຍັກໃຫຍ່ຂອງ ລີກແອງ ພ້ອມຂາຍ ມາຄິນຢອສ ກອງຫຼັງທີມຊາດບາຊິວອອກຈາກທີມໃນຊ່ວງຕະຫຼາດຂາຍນັກເຕະຊຳເມີໜ້າ ຖ້າມີໃຜໜ້າມືດຍອມຈ່າຍຄ່າຫົວໃຫ້ 60 ລ້ານປອນຫຼັງຈາກທີີ່ມີຂ່າວລືໜ້າຫູວ່າເປັນເປົ້າໝາຍລ່າຕົວຂອງ ໂຊເຊ ມູຣິນໂຢ ຜູ້ຈັດການທີມ ແມນເຊສເຕີ ຢູໄນເຕັດ.

 

ກອງຫຼັງອາຍຸ 22 ປີໃຊ້້ຊີວິດໃນເມືອງຫຼວງແດນນຳ້ຫອມມາດົນ 4 ປີຕັ້ງແຕ່ຍ້າຍມາຈາກ ໂຣມາ ແລະ ຖືກລືວ່າຈະຍ້າຍທີມຕໍ່ເນື່ອງໂດຍສະເພາະຊ່ວງທີ່ ປາຣີ ໄປສອຍ ດາວິດ ຫຼຸຍ ມາຈາກ ເຊວຊີ ແຕ່ພໍ ຫຼຸຍ ຖືກຂາຍກັບໄປລອນດອນ ມາຄິນຢອສ ທີ່ມີສັນຍາເຖິງປີ 2019 ກໍກັບມາລົງສະໜາມເປັນຕົວຫຼັກຕົວເນື່ອງ ລະດູການນີ້ລົງຫຼິ້ນເກມລີກ 28 ນັດຍິງໄປ 3 ລູກ ແລະ ບໍ່ແປກທີ່ມີຂ່າວລືວ່າເປັນເປົ້າໝາຍຂອງທີມ “ຜີສາດແດງ” ແລະ ບາເຊໂລນາ.

 

ເຖິງແບບນັ້ນ “ສະປອດ” ອ້າງວ່າ ປາຣີ ບໍ່ມັກວິທີຈີບນັກເຕະຂອງ ບາຊາ ແລະ ພວກເຂົາຍິນດີທີ່ຈະເຈລະຈາກັບ ຢູໄນເຕັດ ຫຼາຍກວ່າໂດຍຄາດວ່າການຍ້າຍທີມຄັ້ງນີ້ຈະລຸລ່ວງທັນທີຖ້າວ່າ “ຜີສາດແດງ” ຍອມຈ່າຍ 60 ລ້ານປອນໂດຍທີ່ ມູຣິນໂຢ ຕ້ອງການກອງຫຼັງດີໆ ໄວ້ໃຈໄດ້ມາອັດເກມຮັບຫຼັງຈາກທີ່ລະດູການປັດຈຸບັນທັງ ຟິວ ໂຈນ ແລະ ຄຣິສ ສະມອນລິງ ປ່ຽນກັນເຈັບເຮັດໃຫ້ມີພຽງແຕ່ ອິຣິກ ໄບຢີ ກັບ ມາກອສ ໂຣໂຮ ທີ່ຫຼິ້ນສະໝຳ່ສະເໝີ.